Luk 13 - Nde-Nsele-Nta LP NT Portions

Yanga nekpen si nasang ɔkpɔghɔkpɔ

¹ Ka ngara yi anɛ bantingi ajɔ fa ba atɔ Jisɔs ateb anɛ ba Galilian ba Falet ayon ka ngara yi ajɔ ajɔ Ɔsɔwɔ.

² Jisɔs akpɛ, “ɛkana si Galili ba ayonyon ane abibi afɛ aga Galilian baga ateb niyiri na ayɛ?

³ Ntɔ war, nasang! Ka erina yanga nekpen, war wɔɔ ɛtam ɛkpɔ nuku nkankan.

⁴ Ɛkana si anɛ bafa noko na asa ka Siloam ba nyar nju agbɔ ayon mbɔ abeb aga anɛ ba are ka Jɛrusalɛm?

⁵ Ntɔ war, nasang! Ka erina yanga nekpen, war wɔɔ ɛtam ɛkpɔ nuku nkankan.”

⁶ Ka Jisɔs atuu ɛbɛɛ jifa: “Munnu wiwi afɔ nasan ekokonadu ni ɛram ka ɛgbɛ ɛjɛ, ka amo ama bri nkab yayi ariyɛ.

⁷ Ka atɔ nkɔgha ɛgbɛ ‘Ka nnya ɛsa yi mbagha ma mbri nkab ka ete ji ka yayi ndam yɛ. Kɛbɛ tob! Jɛɛsɛrɛ ka ɛkɔghɔ ekpeghe nsisi jifa?’

⁸ “Nkɔgha ɛgbɛ akpɛ, ‘Ntaa, nɔngɔ ɛkpɛjɔ ka nnya yiyi, sɔng nsam nsisi nsibi nkag fɛtalaja.

⁹ Ɛkab na nkab nnya ɛwɔ, ɛnɔnɔb! Erina kab, ka kɛbɛ tob.’ ”

Jisɔs atab mbɛnnɛ a manka ka ofo esiayɔ

¹⁰ Ka ofo esiayɔ, Jisɔs ajɔ akpene ka nju a mfa Jus yiyi,

¹¹ ka manka wiwi ajɔ fa yi ebibi etughu ɛbɛnnɛ ka nnya noko na ɛsa. Njam ɛyɛ agrɛ arijɔ ama ayimi ntinnintinni.

¹² Ngara si Jisɔs ayiɛ, abengɛ ba ka atɔɛ, “Manka ɔmɔsɔ ka ɔya ɛba.”

¹³ Ka Jisɔs akonɛ abɔ, naosunosu atinni akag Ɔsɔwɔ.

¹⁴ Ka nnɛ isi ka nju a mfa Jus, asag nete yi Jisɔs atab nnɛ ka ofo esiayɔ, ka atɔ mbɔ, “Are afo asaghasa ya noto. Ma ba ka afo ya ɛmɛ kɔ nanagha, ofo esiayɔ sang.”

¹⁵ Ntaa akpɛɛ, “War anɛ a njam ɛba! Ɛrɛmɛ fɔngngɔ ɔnya ɛbrɛ ka ebru eru ka ofo esiayɔ ɛmɛ kɛ mbɔ alab?

¹⁶ Ka manka yɔfa mmɔ a Abraam sang, yi nnam amɛ kɛ niyiri ka nnya noko na ɛsa erem yi ɛnaghɛ ka ofo esiayɔ?”

¹⁷ Si Jisɔs arag mbe bi, asɛnɛ anɛ baujing ɛbɛ wɔɔ, ka anɛ baga wɔɔ ayighi ka ajɛnambe bi ajɔ ane.

Ɛbɛɛ mmog a mɔsta na yist

¹⁸ Ka Jisɔs abɔmmɔ, “Oton Ɔsɔwɔ erenasi jɛ? Ngara na jɛ?

¹⁹ Erenasi mmog a mɔsta yi nnɛ akɔ abɔm ka ɛgbɛ ɛjɛ. Ɛram ɛjɔ ete, ka ososok ekomo ka aja ɛyɛ.”

²⁰ Akpɛ bɔmmɔ, “Ngara oton Ɔsɔwɔ na jɛ?

²¹ Erenasi, manka akɔ yist asɔmɔ ka nsang agu ya agɔggɔ ɛsa tɛtɛ eto.”

Jisɔs arag ateb Nfiba mbu

²² Ka Jisɔs amo ka atakpa baka na akokomo bɛjɛbɛ, akpene sa ajɔ amo ya Jɛrusalɛm.

²³ Nnɛ abɔmmɛ, “Ntaa, anɛ kɛm ba nanting ba asɔ?” Atɔ mbɔ,

²⁴ “Balɔg ka etingitingi esing ka nfiba mbu ɛnam, nɔngɔ ntɔ war, ateb ebe, alɔglɔg sa anam ka amam anam.

²⁵ Ngara yi mfɔna nju atam a agbanga mbu, eyimi kifi ɛkar, ɛgɔrɔ, ‘Ntaa, ribi warr mbu.’ “Ka yɛ akpɛ, ‘Mmɛ war nyim ka mgbɛrɛ mfo bi eru.’

²⁶ “Ka war ɛragsi, ‘Warr ɛjɔ ɛnɛ ɛwɔ nana, okpene ka aba ɛyɛrɛ.’

²⁷ “Ka yɛ akpɛ, ‘mmɛ war nyim ka mgbɛrɛ mfo bi eru. Ba kɛm ɛyagha, war ba ene abibi afɛ!’

²⁸ “Ka banan na ɛkɛghɛ aman ɛjɔjɔ, ngara yi ɛyɛ Abraam, Asik na Jɛkɔb na abono Ɔsɔwɔ wɔɔ ka etek Ɔsɔwɔ, ka warafɔnɔ kanna ɛjɔm.

²⁹ Anɛ aru ka bɔsɔmfa na nɛsɛrɛmfa, ɔbɔ ɔka na ɔbɔ bunu, ama jɔ nji ayighi ka etek Ɔsɔwɔ.

³⁰ Kɛdɛdɛghɛ anɛ arere bantingi ba akannjam agbɔghɔmba, ka ba agbɔmba akannjam.”

Jisɔs akagha Jɛrusalɛm

³¹ Ka ngara yi Bafarisi bantingi amo akɔrɔ Jisɔs atɔɛ “Tam fa sɔng mfo bintingi. Ɛrɔd asɛb sa ayonna.”

³² Jisɔs akpɛ, “Sɔng tɔ nnɛ ɔwa yɔ, ‘Nkama abibi atughu, ntab anɛ ɛnɛji na ɛwana, ka afo asa nkan na noto ɛnaa.’

³³ Nsɛrɛnsɛrɛ sɛ ɛjɔ, ngɔm nomogho ɛnɛji na ɛwana na ɛtɔɔngɔ ofo, kɛdɛdɛghɛ abono Ɔsɔwɔ wɔɔ akpɔghɔ ka Jɛrusalɛm.

³⁴ “O war anɛ ba Jɛrusalɛm, war etobbo abono Ɔsɔwɔ ba ato akɛ war atan eyon, ebe ngara nlɔg si mbono war nasi nkana nkɔk akongo abɔ a nkɔk ka akpɔngkpɔng ɛyɛ, ka war eritama!

³⁵ Yɛ, Ɔsɔwɔ atɛn war na ɛjɛbɛ ɛjɛrɛ. Nɔngɔ mmɛ ntɔ war, mɛkpɛmmɛ yɛ tɛtɛ ɛragsi, ‘Ɛnara ɛjɔ ɛkɛ nnɛ ya aba ka mbeng a Ntaa.’ ”