Luk 10 - Nde-Nsele-Nta LP NT Portions

Jisɔs ato asɔgba atanasa na wobo na aba

¹ Munu Ntaa asang asɔgba atanasa na wobo na aba bantingi, ato mbɔ anɛ aba aba sa agbɔɛ mba ka baka na afo ya arag sa amogho.

² Atɔ mbɔ “Noto ɛfangfang ka ba enene aritu. Tɔ Ntaa mfɔna noto, sa ato ba ane a noto akag ka ɛgbɛ ɛjɛ.

³ Sɔng! Mkpa war to nasi ɔjɔ ka ɛbɔngɔ abibi ɔnya,”

⁴ Ki ton akpugha yayi sɛ ɛba nɛjɛn sɛ akpaghata; ki kag nnɛ wawi nnyɔ ka mba.

⁵ “Ngara yi ɔnam na ka nju, gbɔmba rag si, nanaa ɛjɔ ka nju yifa:

⁶ Arena si nnɛ yi nanaa ɛkorɛ are fa, nanaa ɛnɛrɛ ɛjɔ na mbɔ, erina jɔna ɛfɛnɛ ka mfo ɛbrɛ.

⁷ Jɔ fa ka nju yi, nɛ wɔ kpere ejo ji akɛ war, si nne a noto akpe ntoro ɛyɛ. Ba ki jɛn ɛnam nju yifa eru ɛnam yintingi eru.

⁸ Ngara yi Ɛnam na ka ɛka akpere war, nɛ ji akɛ war.

⁹ Kag njɔ kɛ anɛ ba aya anɔb ɔtɔ mbɔ si, ‘Oton Ɔsɔwɔ ɛmaba ɛkpere war.’

¹⁰ Ka ɛnam na ka ɛjɛbɛ atɛn war, sɔng ga ka aba nna mfa,

¹¹ ‘Araggasi ebubu ɛka ɛjɛrɛ jɛ ɛwɔmɔ warr ka ajaa ɛmɛ ɛsɛnɛ ɛtɔngɔ si ɛma war tuu ɔtɔng. Ma gbɛrɛ si: Oton Ɔsɔwɔ amaba ekpere.’

¹² Ntɔ war ɛdɛdɛghɛ, ebeb nanɛrɛ ka ofo bifa ɛga anɛ ba Sɔdɔm.

¹³ “Esiyiri akɛ anɛ ba korasin! Esiyiri akɛ anɛ ba Bɛsaida! Arenasi akpɔgisi a mbe ya ane ka Korasin na Bɛsaida ane ka Taya na Sidɔn, mbɔ ka ayanga nekpen mba arab, ajɔ nji ayɔbɔ asaghambɔ́ awuru nimbɔ ntɔng ɛtɔngɔ si amɔgbɔ ka abibi mbɔ.

¹⁴ Ka ɛnɔnɔb ɛkɛ Taya na Sidɔn ka ofo ɛnaa ɛga wɔ Korasin na Bɛsaida.

¹⁵ Ka wɔ Kafɛnum ɔkana si ɔfɔfɔ nakagha ka etek Ɔsɔwɔ? Eˈe, emogho ka mfo bi ngon efigi war.

¹⁶ “Ka atɔ asɔgba ɛyɛ, kpere nnɛ ya ayogho atɔng akɛ war ayogho akɛmɛ; kpere nnɛ ya atɛn war atɛnɛm mmɛ, ka nnɛ ya atɛnɛm na, atɛn Ɔsɔwɔ ya atom.”

¹⁷ Ngara yi asɔgba atanasa na wobo na aba afɛnɛ na ɛyɛbɛ nete atɔ Jisɔs, “Ntaa, araggasi abibi atughu akɛmɛ agba akɛ warr ka mbeng ɛya.”

¹⁸ Jisɔs akpɛ mbɔ, “Nyɛ nnam aru ka nobo amagbɔ ka nsisi nasi mgbambri.

¹⁹ Mma war kɛ nɔyɔ ni ɛnyɛghɛ ɔnyɔ na banang ka ata, ɛfɛnɛ ɛga anɛ ba ujing nsam wɔɔ; jaji war enem.

²⁰ Ɛjɔgana, ki yighi si abibi atughu akɛmɛ agba akɛ war, yighi si mbeng ɛyɛrɛ amanam ka etek Ɔsɔwɔ.”

²¹ Mbara Nɛfɛb akɛ Jisɔs ɛyɛbɛ nete ka ngara yi, arag, “Mmakag Nsɛ, Ntaa Nton a bɔsɔ na nsisi, atebsi, ɔbar mbe bifa oriribi ɔtɔ anɛ ba awagwag na ba anyi ejo, ka oribi ntɔ abɛnsɛ. Ee, Nsɛ, jina ji ɛkɔra si one.

²² “Nsɔjaa amisighi abɔ ka kperekpere ejo akɛm. Nnɛ wawi ya anyi Mmɔ arem ya aga Nsɛ, ka nnɛ ya anyi Nsɛ arem ya aga Mmɔ na anɛ ba Mmɔ ama sang si agbɛrɛɛ.”

²³ Akpeghe atɔ asɔgba ɛyɛ ka nkɔ, “Ɛnara ɛjɔ ɛkɛ, amar ya ayɛ ji war ɛyɛ.

²⁴ Ka ntɔ war ebe abono Ɔsɔwɔ na aton asɛb si ayɛ ji war ɛyɛ ka ariyɛ, asɛb si ayog ji war eyogho ka ariyog.”

Ɛbɛɛ Ateb Etingi Nnɛ a Sameria

²⁵ Ofo bibi mgbɛra ejighi Ɔsɔwɔ atam ayimi abɔmmɔ Jisɔs si agarɛ, “Nkpekpene,” nnɛ ane nang ka afɔ nekpen niˈnkankan?

²⁶ Jisɔs akpɛɛ, “Nwɛr ejighi ayɛnɛ nang? Eriba nang?”

²⁷ Mgbɛra ejighi akpɛ, “Nɔngɔ Ntaa Ɔsɔwɔ ɛba akɔra na nete ɛna kpakpa, na etughu ɛja kpakpa, na nɔyɔ ɛna kpakpa, na nkana ɛya kpakpa, kpɛnɛ fa, agbaetek ɛba akɔra nasi biji ɛba ɛkɔra.”

²⁸ Jisɔs akpɛ, erena, “Ne na sɔng ɔfɔ nekpen.”

²⁹ Fa yi mgbɛra ejighi asɛb mba si atɔngɔ si anyinyi ji yɛ ya ne, abɔmmɔ Jisɔs, “Yɛnnɛ yɔ yi are nnɛ a agbaetek ɛwaa?”

³⁰ Jisɔs akpɛ ka arag, “Munnu aru ka Jɛrusalɛm amogho ya Jɛriko, ama anam anyaju ka abɔ, ajughɛ abɔ́ ka biji, amɔbɛ arɛ, atam asighɛ amo mba mbɔ.

³¹ Ɛwɛmɛ si njɔ Ɔsɔwɔ asing mba yi ayiɛ ya anɔng ka nkɔ mba, ayanga ɛkpara jiga amogho.

³² Lɛbi nnɛ a noto ka nju Ɔsɔwɔ titi, atam si fa ayiɛ si anɔng ka nkɔ mba ayanga ɛkpara jiga amo.

³³ Ka nnɛ a sameria yi ariɛ kɔ si nnɛ atam asing mba yi ama ayiɛ si anɔng, afɔ ɛkpɔgisi akiɛ.

³⁴ Ajɛrɛ akperɛ, akɔ akuu na amam awurɛ ka bɛnɛn bi, akɔ mbɔ́ abɔbɛ. Ka atab munnu yɔ akono ka nnyanɔsɔn ɛyɛ, amo nanɛ ka mfo bi ba ɛjɛnamba ya asɛnɛ asiayɔ ababɛ.

³⁵ Ka ɛtɔɔngɔ ofo akɛ nne a noto ka nju yi dinarus ɛba. Arag, ‘Atɔɛ si ababɛ, arena si akpugha ya ɔrɔbɔ ka isi ɛjɛ atu aga si nkia, mmanna fɛnɛ nkia kɛ.’

³⁶ “Jisɔs abɔmmɔ mgbɛra ejighi, ka ɛbɔngɔ anɛ ba asa, yɛnnɛ are agbaetek akɛ nnɛ yi anyaju amɔbɛ?”

³⁷ Mgbɛra ejighi akpɛɛ, “Nnɛ ya afɔ ɛkpɔgisi akiɛ.” Jisɔs atɔɛ, “Sɔng tam ne na.”

Jisɔs areb Mata na Meri

³⁸ Nsɛrɛ si jisɔs na asɔgba ɛyɛ ajɔ amo ya Jɛrusalɛm, ama asi ka ɛka ji manka ya abengɛ si Mata ama kperɛ amo nanɛ ka etek ɛjɛ.

³⁹ Akpe mmɔannyɛ yɔka abengɛ si Meri, ya ajɔ ayongo atɔng ka ji Ntaa ajɔ akpene.

⁴⁰ Nete Mata ɛjɔ ka ejonɛnɛghɛ ji ajɔ anaa. Aba amakɔrɔ Jisɔs abɔmmɛ, “Ntaa ɛnɔnɔb yi mmɔannajaa yɔka atam asigim yi nne noto nanting? Tɔɛ ama tɔbɔm!”

⁴¹ Ntaa akpɛɛ “Mata, Mata, wɔyɔ ɔkana ebe mbe ka nete,

⁴² Ejo jiji ji ɛga nɔb, ere nono Ɔsɔwɔ. Meri ama sang ji ɛga nɔb, nnɛ wawi arem ya atabɛ.”