Luk 1 - Nde-Nsele-Nta LP NT Portions

Nɔgɔngɔ

¹ Si ebe anɛ amagara ayɛnɛ ateb mbe bi ɛma ba ɛmɛwɛmɛ ka ɛbɔngɔ ɛjɛrɛɛ,

² nsɛrɛ si anɛ ba agbɔmba ajɔayɛ ka ɛjamannab na ba ɛragha nono Ɔsɔwɔ asighi abɔ akɛ warr.

³ Erusi, mɛfɔnɔ mmanaa nete mfɛ nyɛ kpere ejo ka ɛjamannab, kpɛnɛfa ɛkɔrɔmkɔr si nyɛnɛ ka ɛtɔɔngɔ ɛtɔɔngɔ nkia, ntakpa nnɛ Teofilus,

⁴ sɔng ɔma ɔgbɛrɛ kɛdɛdɛghɛ mbe ba ame kpene.

Arag ateb sa awɛn Jɔn Nwura alab

⁵ Ka ngara Ɛrɔd nton a Judia ɛfɔ Njɔ Ɔsɔwɔ ya anɛsi Sakaria, ajɔ ka ɛbɔngɔ baɛjɔ Ɔsɔwɔ ka mgbanga Abija; nka wɛ Elisabɛt atamaru ka ɛbangannab Aarɔn. Ji baɛjɔ Ɔsɔwɔ wɔɔ aru.

⁶ Mbɔ anɛ ababa afɔfɔ ka nibri Ɔsɔwɔ, anɔngɔ ajighi a Ntaa wɔɔ obe arifɔ.

⁷ Ka abɔ arifɔ, atebsi Elisabɛt ajɔ ngo, kpɛnɛfa mbɔ anɛ ababa amokon asing.

⁸ Ka ngara yi mgbanga Sakaria ajɔ ane noto ka nju Ɔsɔwɔ ka yɛ ajɔ njɔ Ɔsɔwɔ ka nibri Ɔsɔwɔ,

⁹ atob nafanga, ɛsangɛ si nɛwɛmɛ baɛjɔ Ɔsɔwɔ ɛtɔngɔ, sa amo ka nju a Ntaa ama fi ɛnwanwa.

¹⁰ Ka ngara ifigha ɛnwanwa asi anɛ wɔɔ ba aba ama kag Ɔsɔwɔ ajɔ kifi akag ajɔjɔ.

¹¹ Naosunosu ɛnjɛl a Ntaa aru ayimi Sakaria ka nibri, ka mgbanga ɔbɔnu ekpom ɛnwanwa.

¹² Ngara yi Sakaria ayiɛ, alik, ɔbɔn eneɛ.

¹³ Ka ɛnjɛl atɔɛ: “Ɔbɔn ekiane, Sakaria; Ɔsɔwɔ amoyog njɔ ɛya. Nkawa Elisabɛt awɛn mmɔannu akia, ɔkiɛ mbeng a Jɔn.

¹⁴ Mmɔ yɔ akia ntakpa ɛyɛbɛ nete, ka ebe anɛ ayɛbɛ nete, atebsi amɛ wɛn,

¹⁵ ajɔ ntakpa nnɛ ka nibri Ntaa. Aki wɔ amam sa akora amam yayi, ason na Mbara Nɛfɛb jam ka nna nnyɛ.

¹⁶ Ane ebe anɛ a Isɛrɛl afɛnɛ njam ama kag Ntaa Ɔsɔwɔ mbɔ.

¹⁷ Jɔn atɔghɔ ba ka Ntaa aba, ka nɛwɛmɛ na nsam nasi Ɛlija, akpeghe nte bansɛ abɔ afɔ nɔkɔrɔ na abɔ a mbɔ na ba erighitama sa atama na ɛwag a anɛ ba atama na Ɔsɔwɔ ane anɛ atongo biji abri Ntaa.”

¹⁸ Sakaria abɔmmɔ ɛnjɛl, “Nne nang ntama ɛbɛ ejo na? Mmɛ mmokon nka waa atam akon.”

¹⁹ Ka ɛnjɛl akpɛ, “Mmɛ Gebrɛl. Nyim ka nibri Ɔsɔwɔ atom si ma ntɔa nyɛbɛ ɔka.

²⁰ Ka munu ɔgbɔghɔ ɛmɔm ɔkpam ma ɔrag nono tɛtɛ ofo bi ɛwɛmɛ, atebsi oritama ano ɛyaa, ji ɛbagha ka ngara yi Ɔsɔwɔ agara.”

²¹ Sa anɛ ajɔ abri Sakaria akana jɛ ɛsɛrɛ ka amɔ jɔ mba arab ka nju Ɔsɔwɔ.

²² Ngara yi aru arima arag nono na mbɔ. Fa ya agbɛrɛ sa amɛyɛ nibriamar ka nju ɔsɔwɔ, ajɔ arag na mbɔ ka abɔabɔ atebsi amɔgbɔ ɛmɔm.

²³ Ngara yi akan na noto nifa ka nju Ɔsɔwɔ, akru etek.

²⁴ Ka ma ngara, nka wɛ Elisabɛt ayibi ka amɛ arɔn ariru kifi.

²⁵ Asi, “Ntaa amene akɛm. Ka afo yafa amimkɛ ɔfa ayighim nsɔn ka amar anɛ.”

Arag ateb sa awɛn Jisɔs

²⁶ Ngara yi ɔla Elisabɛt esi amɛ asaghasa, Ɔsɔwɔ ato ɛnjɛl Gebrɛl amo ka Nasarɛt, ɛjɛbɛ ka Galili,

²⁷ sa amo ka mfo a ngɔnganɛ ya akagha gbɛrɛ munnu ka Josɛf ya aru ka ɛbangannab Debid amɛ gbɔ ka naban. Ngɔnganɛ yɔ anɛsi Meri.

²⁸ Ɛnjɛl amo akɔrɛ arag, “Mmakag nnyɔ, wɔ yi ntakpa ɔfa are nana! Ntaa are nana.”

²⁹ Meri afɔ ntakpa efegheayɔ ka ano ya ɛnjɛl aragha ka akana bagha nagana ɛkaghannyɔ jina.

³⁰ Ka ɛnjɛl atɔɛ, Meri, “Ɔbɔn ekiane, ɔfa Ɔsɔwɔ ere nana.

³¹ Uyibiɔla ka ɔwɛn mmɔannu, ɔkiɛ mbeng a Jisɔs.

³² Ajɔ ntakpa nnɛ ka abengɛ si Mmɔ a Nton Ɔsɔwɔ ya Agagaga. Ntaa Ɔsɔwɔ akiɛ oton nsɛ ji Debid,

³³ ka afe ɛbangannab Jɛkɔb kaˈnkankan; oton ɛbɛ nkannisi ɛfɔm.”

³⁴ Meri abɔmmɔ ɛnjɛl, “Ɛjɔ nang atebsi nkagha gbɛrɛ munnu?”

³⁵ Ka ɛnjɛl akpɛ, “Mbara Nɛfɛb abagha atɔba, ka nsam ya agagaga abona. Ka mfɔ a mmɔ yɔ ɔwɛnɛ ebengɛ si Mmɔ a Ɔsɔwɔ.

³⁶ Araggasi Elisabɛt mfono wa awɛn mmɔ ka okon ɛbɛ, ka yɛ ya aragsi are ngo akpe ɔla amɛ asaghasa munu.

³⁷ Ka nono nani erem ni Ɔsɔwɔ aragha ni arighima ane.”

³⁸ Meri akpɛ. “Mmɛ nde mmɔanju a Ntaa, nɔngɔ ɛjɔ ɛkɛm si ɔragha.” Ka ɛnjɛl atam asighɛ.

Meri Areb Elisabɛt

³⁹ Ka ngara yi Meri atongo biji amo ɛbanɛban ka ɛjɛbɛ akonkon ka ekpeghe Judia,

⁴⁰ ama anam ka nju a Sakaria akag Elisabɛt nnyɔ.

⁴¹ Ngara yi Elisabɛt ayog nnyɔ Meri, mmɔ atam ka nna, ka Elisabɛt ason na Mbara Nɛfɛb.

⁴² Abenge gbogbo: “Ɔsɔwɔ ama nara ka ɛbɔngɔ abaka, afɛnɛ anara mmɔ yɔ ɔwɛnɛ!

⁴³ Erunang ka ɔfa ɛtɔɔngɔm, yi nnyɛ Ntaa aba ama arebem?

⁴⁴ Nsɛrɛsi nyog nnyɔ Meri mmɔ atamam ka nna ateb ɛyɛbɛ nete.

⁴⁵ Ɛnara ɛjɔ akiɛ yi atama si ji Ntaa atɔɛ ɛwɛmɛwɛmɛ.”

Ɔsɛ Meri

⁴⁶ Ka Meri arag: “Nete ɛnaa eger Ntaa

⁴⁷ nete ɛyɛbɛm na Ɔsɔwɔ nnanagha ɛwaa,

⁴⁸ yi agbɔmmɛnter mmɔanju ɛwɛ yi ndisi jaji. Jam munu sɔng isi anɛ ba eying wɔɔ na ji ɛbagha kisi abengem si ɛnara,

⁴⁹ mfɔ a nsam amene ntakpa ejo akɛm nɔfɔ ya are mbeng ɛyɛ.

⁵⁰ Ɛkpɔgisi ɛjɛ ɛjɔ ɛkɛ anɛ ba akpe ɔbɔn ɛbɛ, ka eying wɔɔ na ji ɛbaghaba.

⁵¹ Amene atakpa mbe ka nsam ɛyɛ; akama anɛ ba atab biji ka nkana mbɔ.

⁵² Ataba aton nsam ka oton mbɔ atab anɛ ba asɛnɛ biji ayar.

⁵³ Akɛ anɛ ba njan atinga mbe ka akama anɛ ba akpekpe amo abɔabɔ.

⁵⁴ Amanagha abɔanju ɛbɛ Isɛrɛl, ka ɛkpɔgisi ɛjɛ agbɔmbɔnter

⁵⁵ Abraam na ɛbangannab ɛjɛ kaˈnkankan, sa atɔ bansɔjɛrɛ.”

⁵⁶ Meri ajɔ na Elisabɛt nasi amɛ asa ka akru ɛjɛbɛ ɛjɛ.

Sa Awɛn Jɔn Nwura alab

⁵⁷ Si ngara asi yi Elisabɛt awɛn mmɔ wɛ, awɛn mmɔannu.

⁵⁸ Sa agbaetek ɛbɛ na abɔannyɛ ayog si Ntaa amɛ bri ɛkpɔgisi, ayighi nanɛ.

⁵⁹ Ngara si mmɔ asi afo anaghanɛ aba ama akɛbɛ ndor, ka akpogoro mbenga nsɛ ji Sakaria ɔban,

⁶⁰ ka nnyɛ atɔ mbɔ, “Nasang! Ma bengɛ si Jɔn.”

⁶¹ Atɔɛ, “Nnɛ wawi arem ka ɛbɔngɔ abɔannaja ya akpe mbeng yifa.”

⁶² Arag na nsɛ mmɔ ka abɔabɔ, sɔng agbɛrɛ mbeng yi akɔrɛ sa akɛ mmɔ.

⁶³ Abɔmmɔ ɛkpaghante ɛyɛnɛ a mbe, ayɛnɛ, “Mbeng ɛyɛ anɛsi Jɔn,” anɛ wɔɔ biji ɛkpɔmbɔ.

⁶⁴ Naosunosu, nnyɔ ɛbɛ eribi ka ninibi ɛnɛ ɛnagha, ajam nono naragha, atighi Ɔsɔwɔ.

⁶⁵ Agbaetek wɔɔ ɔbɔn ene mbɔ ɛkɔnɔ bɛjɛbɛ akonkon bi ere ka akpeghe Judia anɛ ajɔ arag ateb mbe bi wɔɔ.

⁶⁶ Kpere nnɛ ya ayog mbe bi akana ateb, abɔmmɔ, “Ka mmɔ yɔ abagha ama jɔ jɛ?” Atebsi nsam Ntaa are nanɛ.

Ɔsɛ Sakaria

⁶⁷ Nsɛ ji Sakaria ason na Mbara Nɛfɛb arag ji Ɔsɔwɔ aribi atɔɛ:

⁶⁸ “Nakagha ɛjɔ ɛkɛ Ntaa, Ɔsɔwɔ Isɛrɛl, atebsi amaba ama anagha warr anɛ ɛbɛ.

⁶⁹ Ɔsɔwɔ amoto ntakora nnɛ akɛ warr aru ka nju a mmɔanju ɛwɛ Debid sa anagha warr

⁷⁰ (sa asing ka biji afɔ abono ɛyɛ ba ɛmɛnɛ arag),

⁷¹ anagha warr ka ɔbɔ anɛ ba ujing na anɛ ba ɛsagga mbɔ wɔɔ

⁷² sa atɔngɔ akuansisi ɛyɛrɛ ɛkpɔgisi afɛnɛ agbɔnter mfɔ a ntama ɛyɛ,

⁷³ sa atere na nsɔjɛrɛ Abraam:

⁷⁴ sa anagha warr ka ɔbɔ anɛ ba ujing ɛbrɛ, sɔng ɛma ɛkaghɛ eribɛ ɔbɔn

⁷⁵ ka nɔfɔ na ɛnɔngɔ ajighi ɛyɛ ka afo a nekpen ɛnɛrɛ kpakpa.

⁷⁶ Ka wɔ, mmɔ waa, abenga si mbono Ɔsɔwɔ bi Ɛgagaga; ka wɔ ɔgbɔghɔmba omo omotongo nte anɛ ka Ntaa aba,

⁷⁷ ane anɛ agbɛrɛ nanagha Ɔsɔwɔ sa atamasighi mbɔ ka abibi afɛ,

⁷⁸ atebsi Ɔsɔwɔ ɛbrɛ akpe ntakpa ɛkpɔgisi, nnanagha ɛwɛrɛɛ njon aru ka bɔsɔ aya atob warr

⁷⁹ ɛmaya atob anɛ ba are ka ejingi na ba abɛghɛ ɔbɔnɔ nuku, sa ɛbaba ɔta nɛjɛn ɛbrɛɛ ɛjɔ ka nanaa.”

⁸⁰ Jɔn abenge ka biji na ɛwag; ajɔ ka eyomo tɛtɛ aru jaja ama ajam naragha ano Ɔsɔwɔ atɔ anɛ a Isɛrɛl.