Luk 5 - Nde

Jisɛs asaŋ agbɔghamba asɔgba abɛ

¹ Ɛfobi ɛsika Jisɛs ama yimi ka nɛga ɛtɔɔ Genesaret anɛ agba asibɛ ayɔghɔ ntɔrɔ Ɛsɔwɔ.

² Yɛ ayɛ agbaa abaa ka nkɔ ɛtɔɔ, ya ba ɛnɔgha nnɔ akɨnɛ, amu ama so asim abɔɔ.

³ Jisɛs ayar anam ka ɛgbaa Samɔn, atɔɛ si afi aru ka nkɔɔ. Yɛ asɨnɛ ajɔn ji fa akpɨnɛ ɛbɨŋɔ ji ɛgba ka nɛga.

⁴ Ka nden yi akɨnɛ ka ntɔrɔ, atɔ Samɔn si, “Kpɛ jɛrɛ ɛgbaa sɔŋ ka ngɔŋa mfom kasɔŋ wɔ ɔtub asim ɔbɔb ɛnyam.”

⁵ Samon akpɛɛ si “Ntaa, ɛmi mɛdɛ tɛtɛ ka ɛnokon ɛrɛ bɔb jiku, ka ɔrɨgha na na, mfɛnɛ mkpɛ tub.”

⁶ Ɛsika atubu ɛsim ji, yɛ abɔb ɛbembem ɛnyaam tɛtɛ ɛsim ɛjam nɛsagha.

⁷ Ara biŋi atɛm ka agbaa yantiŋi si aba ama tɔb abɔɔ. Abaaba ama tɔb anaŋ ɛnyaam tɛtɛ agbaa ka akpitɛr.

⁸ Nden yi Samɔn Pita ayɛ nɛgana ɛjom ji, agbɔ ka ata Jisɛs, arag si, “Nton, jɛrɛ sighim! Si nde nɛa abibi afɛm.”

⁹ Ɛjɔnɔ ɛjom njɛn njɛn kɛtiŋi tiŋi ɛkɛɛ Samɔn ka atɛm ba ayɛ nɛgana ɛbembem ɛnyam bi yɛ abɔɔbɔ.

¹⁰ Ɛtɨmɛ jɔn ɛjo njɛn ɛkɛɛ atɛm ɛbɛ, Jems ka Jɔn, abɔa Sɛbɛdɛ ba ajɔnɔ fa. Jisɛs atɔ Samɔn si “Mfom aria kub! Jam ka nɛmaŋ, ɛnyɔ ji ɔbɔbɔ ɛnyam anab, ɔrabɔb anɛ.”

¹¹ Ɛsika ka afɛnɛ, atu agbaa akɨno ka ɛgbok, atam kpakpa nsɔn abɔ asig atɔŋɔ Jisɛs.

Jisɛs anem nnɛ abini afɔm

¹² Jisɛs asi ka ɛjibɛ ɛjii ji ɛbɛnɛ nnɛ abini. Ɛsika nnɛ nyɔ ayɛɛ, ajibɛ ɛsika nse, akɨmɛ bɛrɔŋ agɔrɛ si, “Agaga Ntaa ɛkɔra na ɔmama ɔnem bɛji ɛkorom.”

¹³ Jisɛs atɔnɔ ɛbɔ ɛkɔmɛ ka atɔɛ si, “Ɛkɔrɔm mmɛ kɔr! Bɛji ɛkora! Fifa fifa abini akɨnɛ.”

¹⁴ Jisɛs atɔɛ si sɔŋ, krɛ tɔ nnɛ yɔku ji ɛmi ruu. “Sɔŋ tɨŋɔ njɔɔ Ɛsɔwɔ bɛji ɛba, ɔfɨnɛ ɔkiɛ ɛjom ndeŋe ɛsika ajigha Mosis arɨgha si nnɛ abini yɔ bɛji ɛmiɛ na koro ane. Ɛtɔŋɔ fa anɛ kpakpa agbɛrɛ si ɔmi fɔm.”

¹⁵ Ka ɛka ɛtub nɛyɔ Jisɛs ɛjɛnɛ ɛsi mfom mfom bi yɛ amu, ɛnem ɛbɨŋɔ egbaa ka mfom mfom biku ɛsibɛ si ama yɔghɛ ɛsika áne abɔɔ atam ka ayám.

¹⁶ Ka Jisɛs ara timɛ asig abɔɔ ama asɛb mfom bi yɛ ajɔnɔ kantiŋ akak njɔm.

Jises anem mbɛnɛ ajɛn

¹⁷ Ɛfobi, ɛsika Jisɛs ara kpɨne anɛ, ba Farasi ka anɛ ba akpɨnɛ ajighia Jus, ba aru ka asisɔghɔ Ganini, Judiya ka Jɛrusanɛm ajɔnɔ akperɛ ɛsika atɨmɛ ayɔghɛ. Ka nɛyɔ Nton ni ɛjɔnɔ ka Jisɛs ɛne anɛ atam ka ayám ketiŋi tiŋi.

¹⁸ Anɛ bantiŋi asɔn nnɛ ka ɛkpa yɔ ami rɛghɛ ɛsika ama boɛ ka ɛsi amarɛ Jisɛs,

¹⁹ Nden yi arɛ ma anam ka njo atubsi anɛ atuu asiŋisiŋ, ara yirɛ ka nɛbɨno njo, ayab ɛja mfom asɨnɛ abom ka ɛsi amarɛ Jisɛs.

²⁰ Ɛsika Jisɛs ayɛɛ ɛkɨnoamar abɔɔ, atɔ nnɛ ɛyam si, “Mannom, mmi tam nsɨgha ka abibia nsɔn ɛya.”

²¹ Ka ba Farasi ka ba kpɨne ajighi Jus abɔmɔ nabɔɔ si, “Nnɛ nnyɔ abri ɛnɛ si áre jɛɛ yi ataba ɛnɛ nna wusi áre Ɛsɔwɔ? Yɛnnɛ ama atam asɨgha anɛ ka abibia nsɔn, yɔ arɛ jɔn Ɛsɔwɔ?”

²² Jisɛs yɔ gbɛrɛ nkater abɔɔ, abɔmɔ abɔɔ “Ɛgbɔnaŋ ka nkater yi fa anɨmɛ war ka netem?

²³ Jɛɛ ji ɛgaa jɔn ndɛɛnndɛɛ: nɛ tɔ nnɛ ɛyam nnyɔ si mmi tam nsɨgha ka abibia nsɔn ɛya, kasɛ nɛrɨgha si tam kɛ ɛyám, jɛn?”

²⁴ Na yɛɛ ɛyɛɛyɛ si Mmɔanɛ akpe nɛyo ni atɨmɛ asig anɛ ka abibia nsɔn mfa ka ɛyiŋ. Akpeghe atɔ nnɛ ɛyam “Nsi tam, ton ɛkpa ɛja sɔŋ kru”

²⁵ Fifa fifa, nnɛ ɛyam atam, afɛb ka ɛyɛbɛ netem, afuu ɛkpa ɛjɛ ka amar anɛ, akara Ɛsɔwɔ mbaa mba akru.

²⁶ Ɛkpɔɔ anɛ kpakpa bɛji, mfom akub abɔɔ, ajam nɛkara Ɛsɔwɔ ka arígha “Ɛmi yɛɛ nɛgam ɛnɛɛ!”

Jisɛs abiŋ Nefi

²⁷ Ɛsika Jisɛs aru ka nina, ayɛɛ nntaba ntab ɛjɨbɛ yɔ ane si Nɛfi ka ajik ka anɛ baga ka mfoa nɛtom. Atɔɛ “Tɔŋɔm”

²⁸ Nefi atam jiku jiku asig, atɔŋɛ.

²⁹ Ka Nɛfi anem ntakpa nɛkak ka njo yɛ akɛ Jises. Abembem ane ba ara taba ntab ɛjibɛ amu nɛkak ni.

³⁰ Ba Farasi ka ba kpɨne ajighia Jus ba apyim ka abɔɔ akpɛkpɛn atɔ anɛ ba ɛkan Jisɛs si “Ɛgbɔnaŋ ka ɛra nɨghɛ ka ɛwɔghɔ ka abibi anɛ na ka ba ɛtaba ntab ka ɛjɨbɛ?”

³¹ Jises akpɛ abɔɔ si, “Nnɛ ɛyam ya ara sɛbɛ nnɛ ɛkam.

³² Ndɛɛ ba si mma mbiŋ anɛ ba afɔfɔm nkɛ Ɛsɔwɔ, mba ma mbiŋ ba ane abibia nsɔn kasɔŋ ayaŋa nekpen ka ɛtiŋi.”

³³ Atɔ Jises, “Si ɛkana Jɔn áre ka ɛbara njan ka ɛkɨgha njɔm nden nden yiku nna ka ɛkana Farasi, ka ɛja áre ka nɛnɛghɛ ka nɛwɔghɔ.”

³⁴ Jises akpɛ abɔɔ si, “Ɛmama ɛnɨŋɔ nkɔgha maŋka ajɔn ka njan ka nden yi yɛ mfɔnɔ akpɨgha áre ka abɔɔ?

³⁵ Ka nden ajɔ́jɔn yi abɔɔbɔ nkɔgha maŋka; nden yi na yi abara njan.”

³⁶ Jisɛs atub abɔɔ ŋgana nnyi: “Nnɛ yɔku arem yɔ akɨbɛ ɛja mbɔɔ bimfɛ akobo ɛkpakɨno mbɔɔ atubsi ane na na ɛja mbɔɔ bimfɛ ɛfumum ka ɛkpakɨno.

³⁷ Nnɛ yɔku arɨma kɨghɔ amɔm ya mfɛ akak ka akpakɨno ɛbar atubsi nɛyɔ amɔm nya ɛtɨgha ɛbar ji.

³⁸ Amɔm ya mfɛ anɔbɔ ka ɛbar ji mfɛ.

³⁹ Atubsi nnɛ arem yɔ awɔghɔ akpakɨno amɔm akpɛ tama ɛwɔghamɔm ka nya. ‘Asi appkpakɨno ya aga.’ ”