Luk 1 - Nde

Ɛjɨmannab

¹ Abembem anɛ anɔghɔ nɛyɛnɛ atub nsɔn yi ɛwɛmɛ ka ɛbɨŋɔ ɛjɨrɛ,

² ɛsika agbɔghamba anɛ ayɛɛ ka ɛjɨmannab ka ba ɛrɨgha ntɔrɔ Ɛsɔwɔ asighi abɔ akɛ war.

³ Erusi, ka ji mmi fan yɛɛ jam ka ɛjimanab, mmi tam ntimi si ntoŋo nyɛnɛ ji ɛru si nkɛa, Ntaa Teofinus,

⁴ sɔŋ ɔma ɔgbɛrɛ ka ɛdidɨghɛ nsɔn yi amia kpɨne.

Ɛsika awɛnɛ Jɔn ji Nwura anab

⁵ Ka nden yi Ɛrɔd ajɔnɔ ntona Judiya ɛjɔnɔ nnɛ ɛwii yɔ ara jɔɔm Ɛsɔwɔ yɔ anɛ si Sakariya, ajɔnɔ ka ɛbɨŋɔ ba ɛjɔ Ɛsɔwɔ ka mgbaŋa Abija; nkawɛ Ɛnisabɛt atɨmaru ka ɛbannab Ɛrɔn ji ɛrɛ jɔɔ Ɛsɔwɔ.

⁶ Abɔɔ anɛ abaaba afɔfɔm ka amar Ɛsɔwɔ, ayimi ka ajighi kprɔb, afɨna nem jiku jiku ji Ntaa arɨgha.

⁷ Ka abɔɔ arɛ fɛn mɔ, atubsi Ɛnisabɛt ajɔnɔ ngum, ɛfine jɔn si abɔɔ anɛ abaába akon asiŋ nɛ kpɛ bɛn mɔ.

⁸ Ka nden yi ɛbɨŋɔ Sakariya ajɔnɔ ka nɛtom ni ɛjɔɔ Ɛsɔwɔ, ɛsika yɛ árajɔm ka ɛsiamar Ɛsɔwɔ,

⁹ átub nɛfaŋa ni ɛmɛ saŋɛ si yɛ yɔ animɛ ka njo ama fi ɛyughanɛsan.

¹⁰ Ka ndena ɛfigha ɛyughanɛsan asi, anɛ kpakpa ba ábaa ama kak Ɛsɔwɔ ajɔnɔ ka nina akɨgha njɔm.

¹¹ Ka nsɔna-ateb Ntaa abru ama yimɛ ka ɛsi ka mgbaŋa ɛbɔnom ka ɛkan ji ára awuru eyughanɛsan.

¹² Nden yi Sakariya ayiɛ, anig, mfom akubɛ.

¹³ Ka nsɔna-ateb Ɛsɔwɔ atɔɛ: “Mfom ariakub, Sakariya; Ɛsɔwɔ amiyɔg njɔm ɛya. Ŋkaa ɛwa ji Ɛnisabɛt awɛnɛ mɔanom akɛa, ɔkɛɛ mbiŋ si Jɔn.

¹⁴ Mɔ nyɔ akɛa ntakpa ɛyɛbɛ netem, ka abembem anɛ ayɛbɛ netem ka nɛwɛnɛ ni ɔwɛnɛ.

¹⁵ Atubsi yɛ ajɔnɔ ntakpa nnɛ ka amɨra Ntaa. Awɔghɔm amɔm yaku si ɛjom jiku ji ɛneɛ abumu atubsi asono ka Nɛfɛb Ɛsɔwɔ jam ka nna nnyɛɛ.

¹⁶ Áne abembem anɛ ba Isrɛn afɛ̀nɛ́ atɔŋɔ Ntaa Ɛsɔwɔ abɔɔ.

¹⁷ Ka Jɔn agbɔghɔmba aba ka nɛfɛb ka nɛyɔ kanakan na ka Ɛnaija, ama kpeghe ba nsɛ ntem akɛɛ abɔɔ, si anem anɛba árɛ jɔn atama ka Ntaa kasɔŋ ájam nɛtere ka ɛtiŋi ɛsika átoŋo anɛ abri Ntaa.”

¹⁸ Sakariya abɔmɔ nsɔna-ateb Ɛsɔwɔ si, “Nne naŋ mgbɛrɛ ɛdidɨghɛ ɛjom ji? Mmɛ mmi kon, ŋkaa ɛwɨŋa atɨma akon.”

¹⁹ Ka nsɔna-ateb Ɛsɔwɔ akpɛɛ, “Mmɛ nde Gebrɛn yɔ ara yimi ka ɛsiamar Ɛsɔwɔ. Átom si mema ntɔa mfɨnɛ nkɛa nyɛbɛ ɛteb.

²⁰ Yɔŋo atɔŋ, jam ka nɛmaŋ ɔkpɨmɛma ɔrak ntɔrɔ tɛtɛ ɛjom ji ɛru, atubsi ɔrɛ tama ji ntɔa, ka ji ntɔa ɛruru ka nden yi Ɛsɔwɔ agara.”

²¹ Ŋga, anɛ ba ajɔnɔ ára bri Sakariya ára re ka nkater ji ɛsɛrɛ ka ami jɔn mba arab ka njoa njɔm.

²² Nden yi aru, arɛ kpɛma arag ntɔrɔ ka abɔɔ. Fa yɔ agbɛrɛ si amiyɛ nɛbri amar ka njoa njɔm, atubsi ára rag ka abɔɔ ka abɔabɔɔ yi ami gbɔ ɛmum.

²³ Nden yi akɨnɛ ka nɛtom ɛnɛ ka njoa Ɛsɔwɔ, afɛnɛ akru ka ɛtighi ɛjɛ.

²⁴ Ka ma nden, ŋkawɛ ji Ɛnisabɛt ayibi, ka amɛɛ arɔn arɛru ka nina.

²⁵ Yɛ arag si, “Ntaa ami nem akɛm, ka afo nnya amimɛ maa afɨna ayighim nsɔn ka amar anɛ.”

Arag atub ɛsika awɛnɛ Jisɛs

²⁶ Ka ɛnumu amɛɛ asɨghasa ka ɛna Ɛnisabɛt, Ɛsɔwɔ atom nsɔn-ateb Gebrɛn amu ka Nasarɛt, ɛjibɛ ka Ganini,

²⁷ si amu ka mfoa ngɔŋanɛ yɔ akɨgha gbɛrɛ mannom ɛjɔnga si ami tama nɛbana Josɛf yɔ aru ɛbannab Defid. Ngɔŋanɛ nyɔ anɛ si Meri.

²⁸ Nsɔn ateb nyɔ amu ama kɔŋɛ, akaghɛ nnyɔ si “Yɛbɛ netem, wɔ yɔ nɛmaa ɛre ka na! Ntaa áre ka na.”

²⁹ Meri abɛnɛ ntakpa efegheayɔ ka ɛjom ji nsɔn ateb arɨgha ka ji nɛgana ɛkaghanyɔ ji ɛrú.

³⁰ Ka nsɔna-ateb Ɛsɔwɔ atɔɛ, “Mfom ariakub, Meri; Ɛsɔwɔ amia maa.

³¹ Ɔyibi ɛna bi ɔwɛnɛ mmɔanom yɔ ɔkiɛ mbiŋ si Jisɛs.

³² Ajɔnɔ ntakpa nnɛ yɔ abɨŋi si Mmɔa Agaga Nton. Ntaa Ɛsɔwɔ ákɛɛ ɛtono nsɛ, ji Defid,

³³ ka afɨne ɛbannab Jɛkɔb ka nkannkan; ɛton ɛbɛ nkanisi ɛbɛnɛm.”

³⁴ Meri abɔmɔ nsɔna-ateb Ɛsɔwɔ, “Ɛjɔnɔ naŋ atubsi ɛjɔnga si amɛɛ tub ɛjam akɛ nnɛ, nkɨgha kaa ka mannom?”

³⁵ Ka nsɔna-ateb Ɛsɔwɔ akpɛɛ si, “Ɛfɔfɔm Nɛfɛb Ɛsɔwɔ ɛbɨgha ɛtɔba, ka nɛyɔ Agaga Nton ɛbona. Ka mmɔ yɔ awɛnɛ anɛ abiŋɛ si Afɔfɔm Mmɔa Ɛsɔwɔ.

³⁶ Ɛnisabɛt ji nnɛ ɛbannab ɛja atɨma wɛn mmɔa nnom ka akon, yɛ yɔ akɨnokpo si áre ngum ami kɨbɛ anɔŋ ka amɛɛ asaghasa.

³⁷ Ka ntɔrɔ Ɛsɔwɔ yiku arem ya árɛjɔnɔ awɛmɛ.”

³⁸ Ka Meri arag si “Mmɛ nde mmɔa njoa Ntaa, nɔngɔ ɛjɔn ɛkɛm esika ɔragha.” Ka nsɔna-ateb Ɛsɔwɔ atam asighɛ.

Meri areb Ɛnisabɛt

³⁹ Ka ma nden Meri átoŋo bɛji atam frifri amu ka ɛjibɛ bɛgon ka ɛja Judiya,

⁴⁰ ama anam ka njoa Sakariya akak Ɛnisabɛt nnyɔ.

⁴¹ Ɛsika Ɛnisabɛt ayɔghɔ nnyɔ Meri, mmɔ atam Ɛnisabet ka nna, ka Nɛfɛb Ɛsɔwɔ ɛsonɛ.

⁴² Ɛnisabet abeŋe gbogbo: “Ɛsɔwɔ amia nara ka ɛbɔngɔ abakaa, afɨnɛ tɔŋɔ mmɔ wa yɔ ɔwɛnɛ nɛnɔbɔ!

⁴³ Erunang ka ɛfa nji ɛtɔŋɔm, yi nnyɛ Nton ɛwɨŋa abɨgha ama arɨbem?

⁴⁴ Ɛsika nyɔghɔ ɛkɨgha nnyɔ ba, mmɔ atɨmɛm ka nna ka ɛyɛbɛ netem.

⁴⁵ Nɛmaa ɛjɔn ɛkia yi ɔtama si ji Ntaa atɔa ɛwɛmɛ wɛmɛ.”

Ɛsɛɛ Meri

⁴⁶ Ka Meri arag si: “Netem ɛnɨŋa eger Ntaa,

⁴⁷ netem ɛrɛyɛbɛm ka Ɛsɔwɔ yɔ áre nninagha ɛwɨŋa,

⁴⁸ yɔ agbɔm mmɛ mɔanjo ɛwɛ yɔ arɛsi jiku nter. Jam ka nɛmaŋ sɔng ɛsi nɛnɛɛ ka ɛying kprɔb ka ba abɨgha ka ɛsi abiŋim si nde ka nɛnɔbɔ,

⁴⁹ atubsi Agaga Nton ami nem atakpa nsɔn ákɛm, nɛfɔ ya áre mbiŋ ɛyɛ.

⁵⁰ Ɛkpɔghɔsi ɛjɛ ɛjɔnɔ ɛkɛɛ anɛ ba ára bɨghɛ, ka ɛyiŋ kpakpa ka ji ɛbɨghaba.

⁵¹ Ami nem atakpa nsɔn ka nɛyɔ ɛnɛ; akama anɛ ba ataba bɛji ka netem abɔɔ.

⁵² Ami taba aton nɛyɔ áfina ayighi abɔɔ ka ɛton ára tab anɛ ba asɛnɛ bɛji akɨno ka bɛsɔ.

⁵³ Amikɛ anɛ ba njan atɨŋa nsɔn ka atom anɛ ba akpekpe amu abɔabɔ.

⁵⁴ Ami nagha mɔanjo ɛwɛ Isrɛn, agbɔɔ ntera ɛkpɔghɔsi

⁵⁵ ji akɛ Ebragham ka abɔɔ́ ɛbɛ ka nɛwɛmɛ nɛwɛmɛ, ɛsika atere atɔɔ ba nsɔjɨrɛ.”

⁵⁶ Meri ajɔnɔ ka Ɛnisabɛt nna wusi amɛɛ asaa ka akru ka ɛjibɛ ɛjɛ.

Ɛsika awɛnɛ Jɔn ji Nwura anab

⁵⁷ Nden ama si yi Ɛnisabɛt awɛnɛ mmɔ ɛwɛ, yɛ awɛn mɔa nnom.

⁵⁸ Anɛ ba nkɨnɛtik ɛbɛ ka abɔannyɛ ayɔg ka Nton amiɛ bri ɛkpɔghɔsi ketiŋi tiŋi, abɔɔ átɔɔŋɛ ayɛbɛ netem.

⁵⁹ Ka ɛnumu afo anaghanɛ aba si ama kɨbɛ mɔ ndor, atɨma agorɛ mbiŋa nsɛ ji Sakariya,

⁶⁰ ka nnyɛɛ atɔ abɔɔ si, “Na saŋ! Ba biŋɛ si Jɔn.”

⁶¹ Ka anɛ afaŋɛ si, “Nnɛ yɔku arem ka ɛbɔŋɔ abɔannaja yɔ akpe mbiŋ yi fa.”

⁶² Ka ára gara ka abɔ atɨŋɔ nsɛ mɔɔ si akɛɛ mbiŋ yi akɔrɛ si akɛɛ mɔ.

⁶³ Yɛ agara ka abɔ atɔ abɔɔ si akiɛ ɛkpaghante ji áyɛnɛ nsɔn kasɔŋ yɛ ayɛnɛ mbiŋa mɔɔ. Akpɛ yɛyɛ ami yɛnɛ si “Mbiŋ ɛyɛ anɛ si Jɔn.” Bɛji ɛkpɔ anɛ kpakpa.

⁶⁴ Fifa fifa, nnyɔ ɛbɛ ɛjibi, nɛnibi ɛnɛ ɛnagha, ajam ntɔrɔ nɛrɨgha ka akar Ɛsɔwɔ.

⁶⁵ Mfom akub anɛ ba Nkɨnɛtik kprɔb ka anɛba áre ka bɛgono Judiya asa ka nɛrɨgha atub nsɔn yi ɛwɛmɛ.

⁶⁶ Nnɛ yɔku yɔ ayɔghɔ ajɛna nsɔn nyi atere ka abɔmɔ “Nɛgana nnɛɛ yɔ mmɔ nnyɔ abɨgha ama jɔn?” Atubsi nɛyɔ Ntaa ɛre ka nɛ.

Ɛsɛɛ Sakariya

⁶⁷ Nsɛ ji Sakariya asono ka Nɛfɛb Ɛsɔwɔ ajam nɛrɨgha ji Ɛsɔwɔ ajibi atɔɛ:

⁶⁸ “Nɛkigha ɛjɔn ɛkɛ Ntaa, Ɛsɔwɔ Isrɛn, atubsi amiba ama anagha anɛ ɛbɛ.

⁶⁹ Ámitom mkpakora Ninagha ka njoa Defid ji mɔanjo ɛwɛ yɔ anagha war

⁷⁰ ɛsika atɔɔ afɔfɔm asɔgba Ɛsɔwɔ ka nden nnyi si atɔ war

⁷¹ Árɨgha si yɛ anagha war ka ɛbɔɔ anɛ ba ɛjing ka anɛ ba ɛsagha abɔɔ.

⁷² Atɔɔŋɔ ɛsika agbɔghamba ba nsɔjɨrɛ ba atɨŋɔ war ɛkpɔghɔsi ji afɔfɔm asɔgba Ɛsɔwɔ arɨgha si atɨŋɔ war. Yɛ atɨma agbɔntera nsɔn yi atama si ane.

⁷³ Kasɔŋ agbɔghɔ nter anem ka nɛtama ɛnɛ ka nsɔjɨrɛ ji Ebragham:

⁷⁴ si anagha war ɛrɛ jɔn ka nɛyɔ anɛ ba ɛjiŋ ɛbrɛ, kasɔŋ ɛma ɛnem nɛtom ɛnɛ ɛrɛ bɛ ɛkub

⁷⁵ ká nɛfɔ, nɛnɔŋɔ ajighi Ɛsɔwɔ ka nekpen ɛnɨrɛ.

⁷⁶ Ka wɔ, mmɔ ɛwuŋa, abiŋa si Ɛsɔgba Ɛsɔwɔ ji Agaga Nton, atubsi wɔ ɔgbɔghɔmba ɔmu ɔmotoŋo ntem anɛ ka Ntaa aba,

⁷⁷ Ɔnem anɛ agbɛrɛ nɛnagha Ɛsɔwɔ ni ɛtɨmɛ asig anɛ ka abibi afɛm,

⁷⁸ atubsi Ɛsɔwɔ ɛbrɛ akpe ntakpa ɛkpɔghɔsi, yi ane nɛnagha ɛnɨrɛ ɛru ka bɛsɔ ya ɛtɨŋɔ anɛ

⁷⁹ ba áre ka nɛwɛmɛ ɛjiŋi ka ba are ka nɛyɔ nɛku, kasɔŋ abaaba war ka ɛta nɛjɛn ɛnɨrɛ ɛsika ɛjɔnɔ ka nɛnaa.”

⁸⁰ Jɔn arɨmɛ ka ɛkoro bɛji tɛtɛ abeŋe ka nefɛb Ɛsɔwɔ; ajɔn ka ɛmɛɛ mbaa arab ka aru ama jam nɛrɨgha ntɔrɔ Ɛsɔwɔ atɔ anɛ ba Isrɛn.