Zvi. 9 - Bhaibheri Rakachena muChindau

Phasika reChipiri

¹ Mambo Mwari wakaereketa kunaMosi ari mushango reSinai, ngomwedzi wokutanga wegore rechipiri sure kwokubuda kwavo kubva munyika yeEgipite echiti,

² “Vana vaIsuraeri ngavangwarire Phasika ngomukuwo waro wakaemeswa kweriri.

³ Ngezuva regumi namarongomuna rouyu mwedzi, madeekoni, munozoringwarira ngomukuwo waro wakaemeswa: kudai ngezviemeso zvaro zveshe, nokudai ngemiitiro yaro yeshe, munozoringwarira kudaro.”

⁴ Ndizvo Mosi wakaronzera vana vaIsuraeri kuti vangwarire Phasika.

⁵ Navo vakangwarira Phasika mumwedzi wokutanga ngezuva regumi namarongomuna madeekoni mushango reSinai; kudai ndizvo zveshe zvaakapanga Mambo Mwari kunaMosi, ndizvo vana vaIsuraeri vakaita kudaro.

⁶ Zvino vaiyapo vamuna vamweni vakasvipiswa ngokubata muiri womunhu wakafa, ndizvo avazi kukona kungwarira Phasika ngeiro zuva; navo vakauya kunaMosi naAroni ngeiro zuva.

⁷ Avo vamuna vakati kwaari, “Isusu takadzisvipisa ngokubata muiri womunhu wakafa; ndizvo ngenyi tarambidzwa kuti tisapira mudiro kunaMambo Mwari, kudai ngenguva yawo yakaemeswa pakati pevana vaIsuraeri?”

⁸ NaMosi wakati kwavari, “Emai, kuti ndizwe icho chaanopanga Mambo Mwari ndimwi.”

⁹ Mambo Mwari wakaereketa kunaMosi echiti,

¹⁰ “Ereketa kunevana vaIsuraeri, ‘Kudai munhu kunyazwi ngouri wenyu, nokuti wemibarirwana yenyu asvipiswa ngendaa yokubata muiri womunhu wakafa, nokuti ari murwendo kuretu, zvakanyadaro unozongwarira Phasika kunaMambo Mwari.

¹¹ Mumwedzi wechipiri ngezuva regumi namarongomuna, madeekoni vanozoringwarira; vanozoridya pamwepo nezvingwa zvisina mumera nemiriwo inovava.

¹² Vasazosiya zvimweni zvaro metsa nechimangwani, nokuti vasazogura godo narimwe raro; vanozongwarira Phasika kudai ngezviemeso zvaro zveshe.

¹³ Asi munhu wakasukika, nousiri murwendo, echirekera kungwarira Phasika, uwo munhu unozobviswa kubva pakati pevanhu vake, ngokuti aazi kupira mudiro kunaMambo Mwari ngenguva yawo yakaemeswa; uwo munhu unozotwara kushaisha kwake.

¹⁴ Nokudai mupara unogara pakati penyu, echida kungwarira Phasika kunaMambo Mwari, kudai ngezviemeso zveshe zvePhasika nokudai ngemiitiro yaro, ndizvo unozoita kudaro; munozoane chiemeso chimwe mweshe munhu mupara nouwo wakabarwa munyika yenyu.’ ”

Gore roMuriro

¹⁵ Ngezuva rerakaemeswa thabhenakeri, gore rakathibikira thabhenakeri, tende rechapupu; kubvira mumadeekoni metsa mangwanani raiya padera pethabhenakeri, rakadai ngomuriro kuoneka kwaro.

¹⁶ Ndizvo zvakagara zvechidaro nguva dzeshe: gore rairithibikira masikati, rakadai ngomuriro kuoneka kwaro usiku.

¹⁷ Naapo gore raimirudzwa kubva patende romushongano, naapo vana vaIsuraeri vaihamba kuenda; nepandau peraiema gore apo vana vaIsuraeri vaiemesa matende avo.

¹⁸ Ngokupanga kwaMambo Mwari vaIsuraeri vaihamba kuenda, nokupanga kwaMambo Mwari vaiemesa matende avo; nguva yeshe gore peraigara padera pethabhenakeri vaizorora mumatende avo.

¹⁹ Kunyazwi gore raiangira kugara apo pathabhenakeri mazuva akawanda vana vaIsuraeri vaingwarira kupanga kwaMambo Mwari, vasaihamba.

²⁰ Nguva dzimweni gore raigara mazuva mashomani padera pethabhenakeri; kudai ngokupanga kwaMambo Mwari vaigara mumatende avo; zvino kudai ngokupanga kwaMambo Mwari vaihamba.

²¹ Nguva dzimweni gore raigara kubvira madeekoni metsa mangwani mangwanani, naapo gore raimirudzwa mangwanani, vaihamba kuenda; nokuti kudai raiangira masikati nokuti usiku apo gore ramirudzwa, vaihamba.

²² Kunyazwi mazuva mairi, nokuti mwedzi, nokuti nguva yakareba, kuti gore rechiangira kugara padera pethabhenakeri, rechigarapo, vana vaIsuraeri vaigara mumatende avo, vasikahambi; asi apo raimirudzwa, vaihamba.

²³ Ngokupanga kwaMambo Mwari vaizorora mumatende avo, ngokupanga kwaMambo Mwari vaihamba; vaingwarira kupanga kwaMambo Mwari, kwaakapanga Mambo Mwari ndiMosi.