Zvi. 8 - Bhaibheri Rakachena muChindau

Kuiswa kweZvibani

¹ Mambo Mwari wakaereketa kunaMosi echiti,

² “Ereketa kunaAroni, wechiti kwaari, ‘Apo wooemesa zvibani zvinomwe, zvinozojekisa pamberi pechigadzikiro chechibani.’ ”

³ NaAroni wakaita kudaro; wakaemesa zvibani kuti zvivheneke pamberi pezvigadzikiro zvezvibani, kudai ngezvaakapanga Mambo Mwari kunaMosi.

⁴ Uku ndikwo kunasirwa kwakaitwa chigadzikiro chechibani ngomukore wakapfurwa, kubvira pashi kuenda pamaruwa acho zvakaitwa ngokupfura; kudai ngechionero chaakaonisa Mwari kunaMosi, ndizvo wakanasira kudaro chigadzikiro chechibani.

Kucheneswa noKupirwa kweVaRevhi

⁵ Mambo Mwari wakaereketa kunaMosi echiti,

⁶ “Tora vaRevhi kubva pakati pevana vaIsuraeri, uvachenese.

⁷ Newe unozoita kudai kwavari, kuvachenesa: unozovafafazira mvura yokuchenesa, navo vanozopara muiri wavo weshe ngechisvo, vasuke zvokusimira zvavo, ndikwo kudzichenesa pachavo.

⁸ Zvino ngavatore mukono mutsva nezvipo zvavo zvezviyo, ufu hwakamotseka, hwakakumanidzwa nemafuta, utorezve mukono mutsva umweni kuita mudiro wokushaisha.

⁹ Unozounza vaRevhi pamberi petende romushongano, uunganidze pamwepo mbungano yeshe yevaIsuraeri.

¹⁰ Naapo waunza vaRevhi pamberi paMambo Mwari, vaIsuraeri veshe vanozoisa nyara dzavo padera pevaRevhi.

¹¹ NaAroni unozopira vaRevhi pamberi paMambo Mwari kuti vaite mudiro wakazunguzirwa wevana vaIsuraeri, kuti vaite mushando waMambo Mwari.

¹² Zvino vaRevhi vanozoisa nyara dzavo padera pemasoro emikono; unozopira umwe kuita mudiro wokushaisha noumweni kuita mudiro wokupisha kunaMambo Mwari, kuita muripo wevaRevhi.

¹³ Unozoemesa vaRevhi pamberi paAroni nevakororo vake, nokuvapira kuita mudiro wakazunguzirwa kunaMambo Mwari.

¹⁴ Ngokuita kudaro unozoparadzanisa vaRevhi kubva pakati pevaIsuraeri, nevaRevhi vanozoita vangu.

¹⁵ Ngesure kweizvi vaRevhi vanozopotera mukati kuti vaite mushando mutende romushongano; newe unozovachenesa uvapire kuita mudiro wakazunguzirwa.

¹⁶ Ngokuti vakapirwa kwendiri yaamho kubva pakati pevana vaIsuraeri; ndakadzitorera ava pachangu pandau yaavo vanotanga kubeura ndani, matangwe eshe evana vaIsuraeri.

¹⁷ Ngokuti matangwe eshe ari pakati pevaIsuraeri ngaangu, eshe evanhu neemhuka. Ngezuva iro rendakauraya matangwe eshe munyika yeEgipite ndakavachenesa kuti vaite vangu.

¹⁸ Asi ndakatora vaRevhi pandau yematangwe eshe ari pakati pevana vaIsuraeri.

¹⁹ Ndakapira vaRevhi kuti vaite chipo kunaAroni nevakororo vake kubva pakati pevana vaIsuraeri, kuti vaite mushando wevana vaIsuraeri mutende romushongano, nokupira muripo ngepamusoro pevana vaIsuraeri, kuti kusazoapo nhenda pakati pevana vaIsuraeri, apo vana vaIsuraeri vechikwedzera pasinde kundau yakachena.”

²⁰ Mosi, Aroni nembungano yeshe yevaIsuraeri vakaita ngevaRevhi kudai ndizvo zveshe zvaakapanga Mambo Mwari kunaMosi ngendaa yevaRevhi.

²¹ VaRevhi vakadzichenesa pachavo kubva pachishaishi, navo vakasuka zvokusimira zvavo; naapo Aroni wakavapira kuita mudiro wakazunguzirwa kunaMambo Mwari; naAroni wakapira muripo ngepamusoro pavo kuti vacheneswe.

²² Ngesure kwazvo vaRevhi vakapotera mukati kuti vaite mushando wavo mutende romushongano pamberi paAroni nevakororo vake; kudai ngezvaakapanga Mambo Mwari kunaMosi ngendaa yevaRevhi vakaita kudaro kwavari.

²³ Mambo Mwari wakaereketa kunaMosi echiti,

²⁴ “Izvi ndizvo zvakaemeserwa kuvaRevhi; kubvira ngevaane makore makumi mairi namashanu kuenda mberi, vanozopotera mukati kuti vaite mushando wetende romushongano.

²⁵ Kubvira ngevaane makore makumi mashanu vanozorekera kuita mushando, avachazoshandi.

²⁶ Asi vangazodetsera hama dzavo mutende romushongano kuti vaite mishando yavo, asi vasikachaiti mushando. Izvi ndizvo zvounozoita kuvaRevhi kuvaemesa pamishando yavo.”