Zvi. 7 - Bhaibheri Rakachena muChindau

Zvipo zveVatungamiriri

¹ Ngezuva iro raakapedza Mosi kuemesa thabhenakeri nokuridzodza, nokurichenesa nezvidziyo zvaro zveshe zvokushandisa, zveshe arita nezvidziyo zvaro, naapo azvidzodza nokuzvichenesa,

² vatungamiriri vaIsuraeri, vakuru vemhatso dzemadzibaba avo, vatungamiriri vemadzinza, avo vaiya padera pevakaerengwa, vakaita midiro.

³ Vakaunza midiro yavo pamberi paMambo Mwari, mukati mwengoro nhanhatu dzaiya dzakafukidzirwa, nekabi gumi nambiri; ngoro imwe yaiya yevatungamiriri vairi, nekabi kunomutungamiriri umwe ngaumwe: navo vakazviunza pamberi pethabhenakeri.

⁴ Zvino Mambo Mwari wakaereketa kunaMosi echiti,

⁵ “Ashira izvi kubva kwavari, kuti zvizoshandiswa kuita mushando wetende romushongano; newe unozozvipa kuvaRevhi, umwe ngaumwe kudai ngomushando wake.”

⁶ Ndizvo Mosi wakatora ngoro nekabi, wakazvipa kuvaRevhi.

⁷ Ngoro mbiri nekabi murongomuna wakazvipa kuvakororo vaGershoni, kudai ngomushando wavo;

⁸ nengoro murongomuna nekabi sere wakazvipa kuvakororo vaMerari, kudai ngomushando wavo, vari pashi penyara yaIthama mukororo waAroni mupristi.

⁹ Asi vakororo vaKohathi aana chaakavapa, ngokuti mushando wendau yakachena waiya wakaemera kwavari kuti vatware ngemapfudzi avo.

¹⁰ Vatungamiriri vakapa zvipo zvokupirwa kwearita ngezuva rerakadzodzwa; vatungamiriri vakapa zvipo zvavo pamberi pearita.

¹¹ Mambo Mwari wakati kunaMosi, “Vanozopa zvipo zvavo mutungamiriri umwe zuva rimwe, ngemazuva okupirwa kwearita.”

¹² Umwe wakapa zvipo zvake ngezuva rokutanga ndiNashoni mukororo waAminadhabhi, wedzinza raJudha.

¹³ Nezvipo zvake zvaiya ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha kurema kwayo kwaiya magramu mazana masere (800), ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

¹⁴ Ndiro imwe yomukore yairema magramu zana negumi (110), yakazara ngomutombo unegwema rakanaka;

¹⁵ mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha;

¹⁶ gotokoto rimwe rembudzi kuita mudiro wokushaisha;

¹⁷ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaNashoni mukororo waAminadhabhi.

¹⁸ Ngezuva rechipiri Nethaneri mukororo waZua mutungamiriri waIsakha wakaunza mudiro:

¹⁹ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

²⁰ Ndiro imwe yomukore yairema magramu zana negumi (110), yakazara ngomutombo unegwema rakanaka;

²¹ mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha;

²² gotokoto rimwe rembudzi kuita mudiro wokushaisha;

²³ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaNethaneri mukororo waZua.

²⁴ Ngezuva rechitatu Eriabhi mukororo waHeroni mutungamiriri wevana vaZebhuruni wakaunza mudiro:

²⁵ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

²⁶ Ndiro imwe yomukore yairema magramu zana negumi (110), yakazara ngomutombo unegwema rakanaka;

²⁷ mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha;

²⁸ gotokoto rimwe rembudzi kuita mudiro wokushaisha;

²⁹ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaEriabhi mukororo waHeroni.

³⁰ Ngezuva rechirongomuna Erizuri mukororo waShedheuri mutungamiriri wevana vaRubheni wakaunza mudiro:

³¹ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

³² Ndiro imwe yomukore yairema magramu zana negumi (110), yakazara ngomutombo unegwema rakanaka;

³³ mukono umwe mutsva, ngondohwe rimwe, kagondohwe kamwe kanegore rimwe, kuita mudiro wokupisha;

³⁴ gotokoto rimwe rembudzi kuita mudiro wokushaisha;

³⁵ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaErizuri mukororo waShedheuri.

³⁶ Ngezuva rechishanu Sherumieri mukororo waZurishadhai mutungamiriri wevana vaSimeoni wakaunza mudiro:

³⁷ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena; zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

³⁸ Ndiro imwe yomukore yairema magramu zana negumi (110), yakazara ngomutombo une gwema rakanaka;

³⁹ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁴⁰ gotokoto rimwe rembudzi kuita mudiro wokushaisha;

⁴¹ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaSherumieri mukororo waZurishadhai.

⁴² Ngezuva rechitanhatu Eriasafi mukororo waDheueri, mutungamiriri wevana vaGadhi wakaunza mudiro:

⁴³ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena; zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁴⁴ Ndiro imwe yomukore yairema magramu zana negumi (110), yakazara ngomutombo une gwema rakanaka;

⁴⁵ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁴⁶ gotokoto rimwe rembudzi kuita mudiro wokushaisha;

⁴⁷ nokuita mudiro wokunyarara, kabi mbiri, magondohwe mashanu, magotokoto mashanu nezvikwai zvishanu zvinegore rimwe. Izvi zvaiya zvipo zvaEriasafi mukororo waDheueri.

⁴⁸ Ngezuva rechinomwe Erishama mukororo waAmihudhi mutungamiriri wevana vaEfuremu wakaunza mudiro:

⁴⁹ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena; zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁵⁰ Ndiro imwe yomukore yairema magramu zana negumi (110), yakazara ngomutombo unegwema rakanaka;

⁵¹ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁵² gotokoto rimwe rembudzi kuita mudiro wokushaisha;

⁵³ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu, zvinegore rimwe. Izvi zvaiya zvipo zvaErishama mukororo waAmihudhi.

⁵⁴ Ngezuva rechisere Gamarieri mukororo waPhedhazuri, mutungamiriri wevana vaManase wakaunza mudiro:

⁵⁵ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁵⁶ Ndiro imwe yomukore yairema magramu zana negumi (110), yakazara ngomutombo unegwema rakanaka;

⁵⁷ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁵⁸ gotokoto rimwe rembudzi kuita mudiro wokushaisha;

⁵⁹ nokuita mudiro wokunyarara, kabi mbiri, magondohwe mashanu, magotokoto mashanu nezvikwai zvishanu zvinegore rimwe. Izvi zvaiya zvipo zvaGamarieri mukororo waPhedhazuri.

⁶⁰ Ngezuva rechipfumbamwe Abhidhani mukororo waGidheoni mutungamiriri wevana vaBhenjamini wakaunza mudiro:

⁶¹ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁶² Ndiro imwe yomukore yairema magramu zana negumi (110), yakazara ngomutombo unegwema rakanaka;

⁶³ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁶⁴ gotokoto rimwe rembudzi kuita mudiro wokushaisha;

⁶⁵ nokuita mudiro wokunyarara, kabi mbiri, magondohwe mashanu, magotokoto mashanu nezvikwai zvishanu zvinegore rimwe. Izvi zvaiya zvipo zvaAbhidhani mukororo waGidheoni.

⁶⁶ Ngezuva regumi Ahieza mukororo waAmishadhai mutungamiriri wevana vaDhani wakaunza mudiro:

⁶⁷ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁶⁸ Ndiro imwe yomukore yairema magramu zana negumi (110), yakazara ngomutombo unegwema rakanaka;

⁶⁹ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁷⁰ gotokoto rimwe rembudzi kuita mudiro wokushaisha;

⁷¹ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaAhieza mukororo waAmishadhai.

⁷² Ngezuva regumi narimwe Phagieri mukororo waOkrani mutungamiriri wevana vaAsha wakaunza mudiro:

⁷³ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁷⁴ Ndiro imwe yomukore yairema magramu zana negumi (110), yakazara ngomutombo unegwema rakanaka;

⁷⁵ mukono umwe mutsva, gondohwe rimwe, nekagondohwe kamwe kanegore rimwe, kuita mudiro wokupisha;

⁷⁶ gotokoto rimwe rembudzi kuita mudiro wokushaisha;

⁷⁷ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaPhagieri mukororo waOkrani.

⁷⁸ Ngezuva regumi namairi Ahira mukororo waEnani mutungamiriri wevana vaNafitari wakaunza mudiro.

⁷⁹ Zvipo zvake ndiro imwe yesirivha yakapamhama, kurema kwayo kwaiya makhirogramu rimwe nehafu, nendiro imwe yesirivha, kurema kwayo kwaiya magramu mazana masere (800), kudai ngechipimo chaishandiswa mundau yakachena. Zveshe izvi zviiri zvaiya zvakazara ngoufu hwakamotseka, hwakakumanidzwa nemafuta kuita mudiro wezviyo.

⁸⁰ Ndiro imwe yomukore yairema magramu zana negumi (110), yakazara ngomutombo unegwema rakanaka;

⁸¹ mukono umwe mutsva, gondohwe rimwe, nekagondohwe kamwe kanegore rimwe kuita mudiro wokupisha;

⁸² gotokoto rimwe rembudzi kuita mudiro wokushaisha;

⁸³ nokuita mudiro wokunyarara, kabi mbiri, magondohwe mashanu, magotokoto mashanu, nezvikwai zvishanu zvinegore rimwe. Izvi zvaiya zvipo zvaAhira mukororo waEnani.

⁸⁴ Uku ndikwo kupirwa kwezvipo zvearita, ngezuva rerakadzodzwa, ngevatungamiriri vaIsuraeri: ndiro dzesirivha gumi nambiri, ndiro dzesirivha dzakapamhama gumi nambiri, ndiro dzomukore dzakapamhama gumi nambiri,

⁸⁵ ndiro yesirivha yakapamhama imwe ngaimwe kurema kwayo kwaiya makhirogramu rimwe nehafu, nokurema kwendiro imwe ngaimwe kwaiya magramu mazana masere (800). Sirivha yeshe yezvidziyo kurema kwayo kwaiya makhirogramu makumi mairi nemanomwe nezvidoko zvitanhatu, kudai ngechipimo chaishandiswa mundau yakachena.

⁸⁶ Ndiro dzomukore gumi nambiri dzaiya dzakazara ngomutombo unegwema rakanaka, kurema kwadzo imwe ngaimwe kwaiya makhirogramu rimwe nezvidoko makumi matatu nezviiri, kudai ngechipimo chaishandiswa mundau yakachena.

⁸⁷ Zvifuyo zveshe, kabi dzomudiro wokupisha gumi nambiri, magondohwe gumi namairi nezvimagondohwe zvinegore rimwe gumi nazviiri, nezvipo zvavo zvomudiro wezviyo, nemakotokoto embudzi omudiro wokushaisha gumi namairi,

⁸⁸ nezvifuyo zveshe zvomudiro wokunyarara mikono makumi mairi nemirongomuna, magondohwe makumi matanhatu, magotokoto makumi matanhatu, nezvimagondohwe zvinegore rimwe makumi matanhatu. Uku ndikwo kupirwa kwezvipo zvearita, ngesure kwokudzodzwa kwaro.

⁸⁹ Naapo Mosi apotera mukati mwetende romushongano kooereketa naMambo Mwari, wakazwa izwi rouwo waiereketa naye kubva pachigaro chenyasha chaiya padera pebhokisi rechitenderano, ari pakati pemakherubhi mairi, naye wakaereketa kwaari.