Zvi. 6 - Bhaibheri Rakachena muChindau

Mipango yeVaNaziriti

¹ Mambo Mwari wakaereketa kunaMosi echiti,

² “Ereketa kunevana vaIsuraeri, wechiti kwavari, ‘Kudai munhu wemwamuna nokuti womukadzi echiita mhiko huru yomuNaziriti, kuti adziparadzanisire kunaMambo Mwari pachake,

³ unozodziparadzanisa pachake kubva mukumwa waini nokuti zvinesimba zvinoradzisa, asazomwa vhiniga rakanasirwa kubva kuwaini, nokuti zvinesimba zvinoradzisa, zve, asazomwa anosvinwa muto nokuti kudya michero yemavhini matsva nokuti akaoma.

⁴ Mazuva ake eshe okudziparadzanisa kudai ngomuNaziriti aazodyi chiro chakaitwa ngemavhini, kunyazwi tsangu nokuti mateko.’

⁵ “Mazuva eshe emhiko yake youNaziriti yokuparadzanisa kwake aazoparwi bvudzi resoro rake ngechisvo; metsa mazuva asvika okudziparadzanisira kwake kunaMambo Mwari, unozoita wakacheneswa, unozorekera bvudzi resoro rake kuti rikure rirebe.

⁶ “Mazuva eshe okudziparadzanisira kwake kunaMambo Mwari aazokwedzeri panomuiri wakafa.

⁷ Aazodzisvipisi ngokufa kwababa ake, nokuti mai ake, nokuti mukoma wake, nokuti mukunda wake; ngokuti kudziparadzanisira kwake kunaMwari kuri padera pesoro rake.

⁸ Ngemazuva eshe okudziparadzanisa kwake kwouNaziriti unozoita wakacheneswa kunaMambo Mwari.

⁹ “Kudai munhu echizofa ngokukasira pasinde pake, naye echisvipisa soro rake ngezuva rokucheneswa kwake, ngezuva rechinomwe unozoripara.

¹⁰ Ngezuva rechisere unozounza njia mbiri nokuti magora mairi kunomupristi pamusiwo wetende romushongano,

¹¹ nomupristi unozopira rimwe kuti riite mudiro wokushaisha, nerimweni kuita mudiro wokupisha, nokumuitira muripo wake, ngendaa yokushaisha kwaakaitirwa ngouwo wakafa. Unozochenesa soro rake ngeiro zuva

¹² naye unozodzipira pachake kunaMambo Mwari ngemazuva okudziparadzanisa kwake, naye unozounza kagondohwe kegore rimwe kuita mudiro wokushaisha. Asi mazuva ake okutanga aachazoerengwi, ngokuti kudziparadzanisa kwake kwakasvipiswa.

¹³ “Ichi chironzo chouNaziriti, apo mazuva okudziparadzanisa kwake apera. Unozounzwa kumusiwo wetende romushongano,

¹⁴ naye unozopira mudiro wake kunaMambo Mwari, gondohwe rimwe regore rimwe risina kuremara, kuita mudiro wokupisha, nekahwai kethokazi kegore rimwe kasina kuremara kuita mudiro wokushaisha, negondohwe rimwe risina mukovha kuita mudiro wokunyarara,

¹⁵ nechitundu chezvingwa zvisina mumera, nemakhekhe oufu hwakamotseka hwakakumanidzwa nemafuta, nezvingwa zvidoko zvisina mumera zvakadzodzwa mafuta nemidiro yake yezviyo, nemidiro yake yokumwa.

¹⁶ Mupristi unozozviunza pamberi paMambo Mwari, apire mudiro wake wokushaisha, nomudiro wake wokupisha.

¹⁷ Unozopira gondohwe rokuita mudiro wokunyarara kunaMambo Mwari, pamwepo nechitundu chezvingwa zvisina mumera; mupristi unozopirawo mudiro wake wezviyo nomudiro wokumwa.

¹⁸ Zvino muNaziriti unozopara bvudzi resoro rake rokudziparadzanisa kwake pamusiwo wetende romushongano, unozotora bvudzi resoro rake rokudziparadzanisa kwake, ariise mumuriro uri pashi pomudiro wakapirwa wokunyarara.

¹⁹ Nomupristi unozotora bandauko regondohwe apo rabikwa, nechimwe chezvikhekhe zvisina mumera kubva muchitundu, nechingwa chidoko chimwe chisina mumera, naye unozozviisa munyara dzomuNaziriti, ngesure kwokuparwa bvudzi resoro rokuparadzaniswa kwake.

²⁰ Nomupristi unozozvizunguzira kuita mudiro wokuzunguzirwa pamberi paMambo Mwari; zviri mudiro wakachena womupristi, pamwepo nechifuba chakazunguzwa nechitho chinopirwa. Ngesure kweizvo muNaziriti unozomwa waini.

²¹ “Ichi ndicho chironzo chomuNaziriti uwo unopika mhiko. Mudiro wake kunaMambo Mwari unosisira kuitwa kudai ngechironzo chevaNaziriti ngepabanze peizvo zvaangakona. Kudai ngemhiko kunyazwi ngeiri yaakapika, ndizvo unozoita echiteera chironzo chokudziparadzanisa kwake kudai ngomuNaziriti.”

Kufumisa kwoMupristi

²² Mambo Mwari wakaereketa kunaMosi echiti,

²³ “Ereketa kunaAroni nevakororo vake wechiti, ‘Ngeiyi njira munozofumisa vana vaIsuraeri,’ mwechiti kwavari.

²⁴ “Mambo Mwari ngaamufumise nokumungwarira.

²⁵ “Mambo Mwari ngaaite kuti hope yake ijeke padera penyu, aite nyasha kwomuri.

²⁶ “Mambo Mwari ngaamirudze hope yake padera penyu, amupe kunyarara.”

²⁷ “Ndizvo vanozoisa zina rangu padera pevana vaIsuraeri; neni ndinozovafumisa.”