Zvi. 5 - Bhaibheri Rakachena muChindau

Vanhu Vakasvipiswa

¹ Mambo Mwari wakaereketa kunaMosi echiti,

² “Panga vana vaIsuraeri kuti vabudise kubanze kwekamba munhu weshe unemapere, unomubvidza nomunhu weshe wakasvipiswa ngokubata vakafa.

³ Munozobudisa veshe vamuna nevakadzi kubanze, muvaise kubanze kwekamba, kuti vasasvipisa kamba yavo, apo pendinogara pakati pavo.”

⁴ Nevana vaIsuraeri vakaita kudaro, vakavabudisa kubanze kwekamba; kudai ngezvaakaereketa Mambo Mwari kunaMosi, ndizvo zvevakaita vana vaIsuraeri.

Kuripwa kweZvakashaishwa

⁵ Mambo Mwari wakaereketa kunaMosi echiti,

⁶ “Ereketa kunevana vaIsuraeri kuti, ‘Kudai munhu womwamuna nokuti womukadzi echishaishira umweni, kunyazwi ngechiri chinoitwa ngevanhu, kushaisha kunaMambo Mwari, nouwo munhu unozoita unendaa,

⁷ naye unozotenderuka chishaishi chake chaakaita. Munhuwo unozoripa ndaa yaakashaisha yeshe, echitutsira rupande rwechishanu kweiri nokurupa kunouwo waakashaishira.

⁸ Kudai munhu wakashaishirwa asina hama iyo inozoashira muripo wokushaisha, uwo muripo wokushaisha ukwo ngauripirwe kunaMambo Mwari, uende kumupristi; ngokubanze kwegondohwe rinoita muripo wokushaisha kwaari.

⁹ Nemidiro yokupira yeshe yezvakacheneswa zvevana vaIsuraeri, zvipo zveshe zvevanounza kunomupristi zvinozoita zvake.

¹⁰ Zvipo zvakacheneswa zvomunhu weshe zvinozoita zvake; kunyazwi ngechiri chaanozopa munhu kunomupristi chinozoita chake.’ ”

Ndaa yeMwamuna Une Mukadzi Usikagondeki

¹¹ Mambo Mwari wakaereketa kunaMosi echiti,

¹² “Ereketa kunevana vaIsuraeri, wechiti kwavari, ‘Kudai mukadzi womunhu nokuti ngouri echizopauka, echiita usikagondeki kwaari,

¹³ kudai munhu umweni akaatana naye, asi zvakafishika kumwamuna wake, zvikagara zvakafishika, kunyazwi wakadzisvipisa pachake, pasina chapupu chinomuitira ndaa, ngokuti apana wakamubata echizviita ukosha,

¹⁴ kudai mweya wendurumwa wechizouya kwaari, naye echiitira ndurumwa mukadzi wake uwo wakadzisvipisa pachake, nokuti kudai mweya wendurumwa wechizouya kwaari, echiitira ndurumwa mukadzi wake, kunyazwi asikazi kudzisvipisa pachake;

¹⁵ naapo munhuwo unozouya nomukadzi wake pamberi pomupristi. Unozomuunzira mudiro unosisira kwaari, rupande rwechegumi cheefa roufu hwebhare. Asazodurura mafuta kwouri, nokuti kuisa makha padera pawo; ngokuti uri mudiro wezviyo wendurumwa, mudiro wezviyo wokukarakadza, echiunza kucherechedziswa kwokushata.’

¹⁶ “Zvino mupristi unozounza mukadzi pasinde nokumuemesa pamberi paMambo Mwari;

¹⁷ mupristi unozotora mvura yakacheneswa muchidziyo chedongo; unozotora bukuta riri pashi pethabhenakeri nokuriisa mumvura.

¹⁸ Mupristi unozoemesa mukadzi uwo pamberi paMambo Mwari, nokusunhura bvudzi romukadzi, nokuisa munyara dzake mudiro wezviyo wokucherechedzisa, uri mudiro wezviyo wendurumwa nomupristi unozoa nemvura inovava munyara dzake, iyo inounza chituko.

¹⁹ Nomupristi unozomupikisa mhiko, echizoti kumukadziwo, ‘Kudai pasina mwamuna wakaatana newe, nokudai usikazi kupauka kuita zvinosvipisa nemwamuna umweni usiri mwamuna wako, ita wakasunhurika kubva kuiyi mvura inovava inounza chituko.

²⁰ Asi kudai wakapauka kuenda kunemwamuna umweni usiri mwamuna wako, nokudai iwewe wakadzisvipisa pachako, nomwamuna umweni wakaatana newe usiri mwamuna wako,’ ”

²¹ mupristi unozopikisa mukadziwo mhiko yechituko, nomupristi unozoti kumukadzi, “Mambo Mwari ngaaite kuti zina rako riite chituko pakati pevanhu vako, apo Mambo Mwari unozoita kuti mbumbu yako ipute, nendani yako izvimbe.

²² Zvino mvura iyi inounza chituko inozopotera mumaura ako, kuita kuti ndani yako ibvidze, nembumbu yako kuti ipute;” nomukadzi unozoti, “Ameni, ameni.”

²³ “Naapo mupristi unozonyora izvi zvituko, unozozvitsukutidza ngemvura inovava.

²⁴ Unozoita kuti mukadziwo amwe mvura inovava inounza chituko, nemvura inounza chituko inozopotera mukati mwake, nokumuunzira kuvava kunorwadza.

²⁵ Naapo mupristi unozotora mudiro wezviyo wendurumwa kubva munyara dzomukadziwo, nokuzunguzira mudiro wezviyo pamberi paMambo Mwari, nokuupira padera pearita.

²⁶ Nomupristi unozonokora tsimba yezviyo zvomudiro uwo, kuita rupande rwechicherechedziso chawo, unozoupisha padera pearita, ngesure kweizvo unozoita kuti mukadziwo amwe mvura.

²⁷ Naapo amuita kuti amwe mvura iyo, kunozoitika kuti kudai akadzisvipisa pachake, akaita usikazi kugondeka kunemwamuna wake, mvura iyo inounza chituko inozopotera mukati mwake, nokuita kuvava kunorwadza, nendani yake inozobvidza, nembumbu yake inozoputa, nomukadzi unozoita chituko pakati pevanhu vake.

²⁸ Asi kudai mukadziwo asikazi kudzisvipisa pachake, naye akasukika, unozoita wakasunhurika naye unozobereka vana.

²⁹ “Ichi chiri chironzo chendurumwa, apo mukadzi echipauka kuenda kunemwamuna umweni usiri mwamuna wake, naye echidzisvipisa pachake

³⁰ nokuti apo mweya wendurumwa wechiuya kunemwamuna, naye echiita ndurumwa kumukadzi wake, echizoemesa mukadzi pamberi paMambo Mwari, nomupristi unozomuitira kudai ngechironzo cheshe.

³¹ Naapo mwamuna uwo unozoita usina ndaa yokushata ukwo, asi mukadzi unozodzitwarira kushata kwake.”