Zvi. 4 - Bhaibheri Rakachena muChindau

Mishando yeVaRevhi veDzinza raKohathi

¹ Mambo Mwari wakaereketa kunaMosi naAroni echiti,

² “Erenga uwandu hwevakororo vaKohathi kubva pakati pevakororo vevaRevhi, kudai ngokuteererana kwemhuri dzavo, kudai ngemhatso dzemadzibaba avo,

³ kubvira ngevaane makore okubarwa makumi matatu kuenda mberi metsa kuguma kunevaane makore makumi mashanu okubarwa, kuti vaite mushando mutende romushongano.

⁴ Uyu ndiwo mushando wevakororo vaKohathi mutende romushongano, wezviro zvakapindisisa kuchena.

⁵ “Naapo kamba yooda kumiruka kuenda, Aroni unozouya nevakororo vake, navo vanozodzasa jira rokufukidza ndiro, vechifukidza ndiro bhokisi rechitenderano.

⁶ Zvino vanozofukidza padera paro ngematoo akasukutwa, nepadera pawo vanozofukidza ngejira rakasvipirika yaamho, vanozopfeka mipingo yaro mukati.

⁷ Nepadera petafura rezvingwa zvokuapo kwaMambo Mwari vanozochinga jira rakasvipirika, nokuisa padera paro ndiro, ndiro dzomutombo unegwema rakanaka, zvidziyo, nejomeya rokupira mudiro wokumwa; nezvingwa zvokuangirira zvinozoapo.

⁸ Navo vanozofukidza padera paro ngejira rakatsvuka, nokufukidza padera paro ngechokufukidza chematoo akasukutwa, vanozoisa mipingo pandau yayo.

⁹ Vanozotora jira rakasvipirika vanozofukidza chigadzikiro chechibani, nezvibani zvacho, nembato dzaro, nezvidziyo zvokudzima ndizvo, nezvidziyo zveshe zvemafuta zvazvo, zvevanoshanda ndizvo kwezviri.

¹⁰ Navo vanozoriisa nezvidziyo zveshe zvaro ngomukati mwematoo akasukutwa, vanozoriisa pamupingo.

¹¹ Nepadera pearita romukore vanozochinga jira rakasvipirika, vanozorifukidza ngematoo akasukutwa, vanozoisa mipingo yaro;

¹² navo vanozotora zvidziyo zveshe zvomushando zvinoshandiswa mundau yakacheneswa, nokuzviisa mujira rakasvipirika, nokuzvifukidza ngematoo akasukutwa, vanozozviisa pamupingo.

¹³ Vanozodusa marota kubva paarita, nokufukidza padera paro ngejira rakatsvukuruka.

¹⁴ Vanozoisa padera paro zvidziyo zveshe zvearita, izvo zvevanoshandisa kweriri, zvokupishira mutombo inegwema rakanaka, nemaforoko enyama, nemafoshoro, nendiro, nezvidziyo zveshe zvearita, vanozofukidza padera paro ngematoo akasukutwa, nokuisa mipingo mundau yaro.

¹⁵ Naapo Aroni nevakororo vake vapedza kufukidza ndau yakacheneswa, nezvidziyo zveshe zvemundau yakacheneswa apo kamba yooda kubvapo; ngesure kweizvo vakororo vaKohathi vanozouya kootwara izvi; asi vasazogwama chiro chakacheneswa kunyazwi ngechiri, kuti vasazofa. Izvi ndizvo zviro zvomutende romushongano zvinosisira kutwarwa ngevakororo vaKohathi.

¹⁶ “Nomushando waEreaza mukororo waAroni mupristi ngewokungwarira mafuta ezviveneko, nemitombo inegwema rakanaka, nomudiro wokudya wezuva ngezuva, nemafuta okudzodza, nokungwarira thabhenakeri reshe, nazvo zveshe zviri mukati mwaro, mundau yakacheneswa nomukati mwezvidziyo zvaro.”

¹⁷ Mambo Mwari wakaereketa kunaMosi naAroni echiti,

¹⁸ “Dzinza remhuri yevakororo vaKohathi risazoparadzwa kubva pakati pevaRevhi.

¹⁹ Asi munozoita kwavari kuti vapone, vasafa, apapo vokwedzera pasinde kunezviro zvakachenesesa. Aroni navakororo vake vanozopotera mukati, nokuemesa munhu umwe ngaumwe kumushando wake nokumutwaro wake.

²⁰ Asi vaKohathi vasazopotera mukati kooringira zviro zvakachenesesa kunyazwi kwenguva doko, kuti vasazofa.”

Mishando yeVaRevhi veDzinza raGershoni

²¹ NaMambo Mwari wakaereketa kunaMosi echiti,

²² “Erenga uwandu hwevakororo vaGershoni, ngemhatso dzeshe dzemadzibaba avo nemhuri dzavo.

²³ Kubvira ngevaane makore makumi matatu kuenda mberi kuguma ngevaane makore makumi mashanu, unozovaerenga; veshe vanozopoteramwo kuti vaite mushando wetende romushongano.

²⁴ Uyu ndiwo mushando wemhuri dzevaGershoni, kuti vashande nokutwara.

²⁵ Navo vanozotwara machira okuturika ethabhenakeri netende romushongano, nezvifukidzo zvaro zvematoo akasukutwa zviri padera paro, nejira rokuturika pamusiwo wetende romushongano,

²⁶ nemachira okuturika oruwanze, nemachira okuturika omusiwo wechimana choruwanze akatendenedza thabhenakeri nearita, nemapote aro, nezviro zveshe zvevanoshanda ndizvo, nazvo zveshe zvezvakanasirirwa; ngokudaro vanozoshandira.

²⁷ Mishando yeshe yevakororo vaGershoni inozoitwa kudai ngokupanga kwaAroni nevakororo vake, muizvo zveshe zvevanozotwara nazvo zveshe zvevanozoshanda; nemwi munozoemesa kwavari zveshe izvo zvevanozotwara.

²⁸ Uyu ndiwo mushando wemhuri yevakororo vaGershoni mutende romushongano; nokupangwa kwavo kunozobva pashi penyara yaIthama mukororo waAroni mupristi.

Mishando yeVaRevhi veDzinza raMerari

²⁹ “Ngendaa yevakororo vaMerari, unozovaerenga kudai ngemhuri dzavo nemhatso dzemadzibaba avo.

³⁰ Unozovaerenga kubvira ngevaane makore makumi matatu kuenda mberi metsa kuguma ngevaane makore makumi mashanu, veshe umwe ngaumwe unokona kuita mushando wetende romushongano.

³¹ Izvi ndizvo zvevanopangwa kutwara, kudai ngomushando wavo weshe mutende romushongano; mapuranga ethabhenakeri, mwamba yaro, sika dzaro nezvitsimiso zvaro,

³² nesika dzoruwanze dzinoritendenedza, nezvitsimiso zvadzo, nehoko dzaro, nemapote adzo, pamwepo nemidziyo yeshe nazvo zveshe zvemishando yavo. Munozoemesa ngemazina midziyo iyo yevanosisira kutwara.

³³ Uyu ndiwo mushando wemhuri dzevakororo vaMerari, kudai ngemishando yavo yeshe yevanoshanda mutende romushongano, vari pashi penyara yaIthama mukororo waAroni mupristi.”

Kuerengwa kweVaRevhi

³⁴ Ndizvo Mosi naAroni nevatungamiriri vembungano vakaerenga uwandu hwevakororo vaKohathi, kudai ngemhuri dzavo nokudai ngemhatso dzemadzibaba avo,

³⁵ kubvira ngevaane makore makumi matatu kuenda mberi metsa kuguma ngevaane makore makumi mashanu, umwe ngaumwe unokona kuita mushando wetende romushongano.

³⁶ Nokuerengwa kwavo ngokuteererana kwemhuri dzavo vaiya makumi mairi emazana namazana manomwe nemakumi mashanu (2,750).

³⁷ Ava ndivo vakaerengwa vemhuri dzevaKohathi, veshe avo vaishanda mushando wetende romushongano, avo vakaerengwa ndiMosi naAroni kudai ngokupanga kwaMambo Mwari ngenyara yaMosi.

³⁸ Vakaerengwa vevakororo vaGershoni, kudai ngokuteererana kwemhuri dzavo nemhatso dzamadzibaba avo,

³⁹ kubvira ngevaane makore makumi matatu kuenda mberi metsa kuguma ngevaane makore makumi mashanu, veshe avo vanokona kuita mushando wetende romushongano.

⁴⁰ Vakaerengwa vavo kudai ngokuteererana kwemhuri dzavo nemhatso dzemadzibaba avo vaiya makumi mairi emazana namazana matanhatu nemakumi matatu (2,630).

⁴¹ Ava ndivo vakaerengwa vemhuri dzevakororo vaGershoni, veshe avo vaishanda mushando wetende romushongano, avo vakaerengwa ndiMosi naAroni kudai ngokupanga kwaMambo Mwari.

⁴² Vakaerengwa vemhuri yevakororo vaMerari, kudai ngokuteererana kwemhuri dzavo nemhatso dzemadzibaba avo,

⁴³ kubvira ngevaane makore makumi matatu kuenda mberi metsa kuguma ngevaane makore makumi mashanu, veshe avo vanokona kuita mushando wetende romushongano.

⁴⁴ Vakaerengwa vavo kudai ngokuteererana kwemhuri dzavo, vaiya makumi matatu emazana nemazana mairi (3,200).

⁴⁵ Ava ndivo vakaerengwa vevakororo vaMerari, avo vakaerengwa ndiMosi naAroni kudai ngomupango waMambo Mwari, waakapanga kunaMosi.

⁴⁶ Veshe avo vakaerengwa vevaRevhi avo vakaerengwa ndiMosi naAroni nevatungamiriri vevaIsuraeri kudai ngokuteererana kwemhuri dzavo nemhatso dzemadzibaba avo,

⁴⁷ kubvira ngevaane makore makumi matatu kuenda mberi metsa ngevaane makore makumi mashanu, veshe avo vaikona kuita mushando wokushandira, nomushando wokutwara mitwaro yetende romushongano.

⁴⁸ Avo vakaerengwa vavo vaiya makumi masere emazana nemazana mashanu nemakumi masere (8,580).

⁴⁹ Kudai ngokupanga kwaMambo Mwari kubudikidza ndiMosi, vakaemeswa kumishando yavo mizhinji yokushandira nokutwara; ngokudaro vakaerengwa ndiye, kudai ngezvaakapanga Mambo Mwari kunaMosi.