Zvi. 36 - Bhaibheri Rakachena muChindau

Nhaka yeMadzimai Akaroorwa

¹ Vakuru vemhatso dzemadzibaba vemadzinza emibarirwana yaGireadhi, mukororo waMakhiri, mukororo waManase, vedzinza revakororo vaJosefa, vakakwedzera pasinde, vakaereketa pamberi paMosi, nepamberi pevatungamiriri, vakuru vemhatso dzemadzibaba evana vaIsuraeri.

² Vakati, “Mambo Mwari wakapanga mambo wangu kuti ape nyika kuita nhaka ngemabhigidha kunevana vaIsuraeri; namambo wangu wakapangwa ndiMambo Mwari kuti ape nhaka yaZerofehadhi hama yedu kunevanasikana vake.

³ Asi kudai vakaroorwa ngevakororo vemadzinza amweni avaIsuraeri, naapo nhaka yavo inozoduswa kubva kunhaka yemadzibaba edu, itutsirwe kunhaka yedzinza iro revanozoroorwa; ndizvo inozoduswa kubva kurupande rwenhaka yedu.

⁴ Naapo rinozoguma Gore reJubiri revana vaIsuraeri, nhaka yavo inozotutsirwa kunedzinza iro revanoroorwa kweriri; ngokudaro nhaka yavo inozoduswa kubva kunhaka yedzinza remadzibaba edu.”

⁵ Zvino Mosi wakapanga vana vaIsuraeri kudai ngeizwi raMambo Mwari echiti, “Mibarirwana yevana vaJosefa yanasa kuereketa zvakanaka.

⁶ Izvi ndizvo zvaakapanga Mambo Mwari ngendaa yevanasikana vaZerofehadhi echiti, ‘Ngavaroorwe ngeavo vevanopinimidza kuti vakanaka; kwega ngavaroorwe mukati mwedzinza remadzibaba avo,

⁷ kuitira kuti nhaka yevana vaIsuraeri aizotorwi kubva kudzinza rimwe kuenda kunerimweni; ngokuti umwe ngaumwe wevana vaIsuraeri unozobatirira kunhaka yedzinza ramadzibaba ake.

⁸ Mwanasikana weshe umwe ngaumwe, unozogara nhaka kunyazwi ngeriri dzinza revana vaIsuraeri, unozoroorwa kunoumwe wemhuri yedzinza rababa ake, kuitira kuti vana vaIsuraeri vaangire kugara nhaka yemadzibaba avo.

⁹ Apana nhaka inozobva kudzinza rimwe kuenda kudzinza rimweni; ngokuti umwe ngaumwe wemadzinza evana vaIsuraeri unozogara kunenhaka yake.’ ”

¹⁰ Vanasikana vaZerofehadhi vakaita kudai ngezvaakapanga Mambo Mwari kunaMosi.

¹¹ Ngokuti Mahea, Thiriza, Hogira, Mirikha naNoa, vanasikana vaZerofehadhi, vakaroorwa ngevakororo vomukoma wababa avo.

¹² Navo vakaroorwa ngedzinza revakororo vaManase mukororo waJosefa, nenhaka yavo yakagara mudzinza remhatso yababa avo.

¹³ Iyi ndiyo mipango nezvitongero, zvaakapanga Mambo Mwari ngenyara yaMosi kuvana vaIsuraeri vari mumabani eMoabhi paJorodhani pasinde peJerikho.