Zvi. 35 - Bhaibheri Rakachena muChindau

Madhorobha Akaemeserwa VaRevhi

¹ Mambo Mwari wakaereketa kunaMosi mumarukaro aMoabhi paJorodhani pasinde neJerikho echiti,

² “Panga vaIsuraeri kuti vape kuvaRevhi rupande rwenhaka yavo, madhorobha okuti vagaremwo; munozopawo kwavari ndau yemafuro yakatendenedza madhorobha avo.

³ Madhorobha anozoita avo kuti vagaremwo; nemafuro avo anozoita en'ombe dzavo, nezvifuyo zvavo zveshe nemhuka dzavo.

⁴ Mafuro emadhorobha awo omunozopa kuvaRevhi anozoita mamitha mazana marongomuna nemakumi mashanu (450) kubva kurukumbati kubudira ngokubanze, kutendenedza dhorobha.

⁵ Munozopima ngokubanze kwedhorobha kurutii rwokumabvazuva mamitha mazana mapfumbamwe (900), kurutii rwokubani nemitha mazana mapfumbamwe (900), kurutii rwokumabirirazuva mamitha mazana mapfumbamwe (900) nokurutii rwedera mamitha mazana mapfumbamwe (900); nedhorobha rinozoa ngepakati; ndau idzi dzinozoita mafuro emadhorobha avo.

⁶ “Madhorobha omunozopa vaRevhi anozoerengera mukati mwawo madhorobha matanhatu okutizira kuti muponeremwo, omunozoemesera kumunhu uwo unonga azouraya munhu, kuti iye atiziremwo; nokuneaya munozotutsira amweni makumi marongomuna namairi.

⁷ Ndizvo madhorobha eshe omunozopa kuvaRevhi anozoita eshe pamwepo makumi marongomuna namasere; munozoapa pamwepo nemafuro avo.

⁸ Nemadhorobha omunozovapa anozoita enhaka yevana vaIsuraeri; kubva kwavari vaneakawanda, kunozobva akawanda nokunevane mashomani kunozobva mashomani; umwe ngoumwe unozopa madhorobha ake kuvaRevhi kudai ngouwandu hwenhaka yake yaanayo.”

Madhorobha oKutizira

⁹ Mambo Mwari wakaereketa kunaMosi echiti,

¹⁰ “Ereketa kunevana vaIsuraeri, wechiti kwavari, ‘Apo mwooambuka Jorodhani kupotera munyika yeKhenani,

¹¹ naapo munozodziemesera madhorobha okuita madhorobha okutiziramwo kwenyu; kuti uwo wauraya munhu asikadi kuuraya atiziremwo.

¹² Madhorobha anozoita kwomuri okutiziramwo kubva kunomuunzidziri, kuitira kuti uwo wakauraya munhu asazourawa, metsa aema pamberi pembungano mukutongwa.’

¹³ “Madhorobha aya omunozopa matanhatu awo anozoita madhorobha okuponeramwo.

¹⁴ Munozopa madhorobha matatu ngoruseri rwouno rweJorodhani, nemadhorobha matatu munozoapa munyika yeKhenani, anozoita madhorobha okutiziramwo.

¹⁵ Aya madhorobha matanhatu anozoita okuponeramwo, kuneveshe vana vaIsuraeri nomupara nechigarandimo chiri pakati pavo, kuti munhu weshe wauraya munhu asikadi ungatiziramwo.

¹⁶ “Asi kudai munhu akachaya umweni ngesimbi, oroofa, muurayi; ngegwinyiso muurayi unozourawa.

¹⁷ Nokudai amuchaya ngokuposhera buwe, ringaita kuti afe, naye akafa, muurayi; ngegwinyiso muurayi unozourawa.

¹⁸ Nokuti kudai amuchaya ngendonga yomuti, ingaita kuti afe, naye akafa, muurayi; ngegwinyiso muurayi unozourawa.

¹⁹ Muunzidziri wengazi ndiye emene unozouraya muurayi; naapo ashongana naye, unozomuuraya.

²⁰ Asi kudai echizomubaya ngokumuzonda, nokuti kuposhera kwaari ngokumuhwarira, naapo akafa,

²¹ nokuti echimuchaya ngenyara yake ngokuita ugaa kwaari, naapo akafa; uwo wamuchaya ngegwinyiso unozourawa; ngokuti muurayi; ngegwinyiso muunzidziri wengazi unozouraya muurayi apo paanozoshongana naye.

²² “Asi kudai umwe echizomubaya umweni chiriporipo pasina ugaa nokuti kuposhera kwaari nokuti ngechiri chiro asikazi kumuhwarira,

²³ nokuti kuposhera buwe, ringaita kuti afe ndiro, asikamuoni, roromufura kuti afe, asiri gaa rake, asaida kumukuvadza,

²⁴ naapo mbungano inozotonga pakati pouwo wakamuuraya, nomuunzidziri wengazi kudai ngeizvi zvitongero;

²⁵ nembungano inozomusunhura uwo wakauraya munhu kubva kunyara yomuunzidziri wengazi. Zvino mbungano inozomuhwirinza kudhorobha rake rokuponera raakatiziramwo. Muurayi unozogara arimwo metsa kufa kwomupristi mukuru, uwo wakadzodzwa ngemafuta akachena.

²⁶ Asi kudai muurayi echizouya nokuti ngouri mukuwo kumugano wedhorobha rokuponera, raakatiziramwo,

²⁷ nomuunzidziri wengazi echizomuona ari kubanze kwedhorobha rake rokuponeramwo, nomuunzidziri wengazi echizomuuraya, aazoane ndaa yengazi.

²⁸ Ngokuti muurayi unosisira kugara ari mudhorobha rokuponeramwo, metsa mupristi mukuru afe; asi ngesure kwokufa kwomupristi mukuru, muurayi unozohwirira kunyika yenhaka yake.

²⁹ “Ndizvo izvi zviro zvinozoita chiemeso chokutonga ndicho kwomuri mukati mwemibarirwana yenyu yeshe muugaro hwenyu hweshe.

³⁰ “Kudai umwe echizouraya umweni kunyazwi ngouri, muurayi unozourawawo ngokupupurirwa ngemiromo yezvapupu; asi uchapupu hwomunhu umwe ahuzoiti kuti munhu aurawe.

³¹ Zve, musazotora chitengero kubva kunomuurayi unendaa inosisira kufa; ngegwinyiso muurayi unozourawa.

³² Zve, musazotora chitengero chouwo wakatizira kudhorobha rokuponeramwo, kuti ahwirire koogara munyika yake, metsa kufa kwomupristi mukuru.

³³ Musazosvipisa nyika yomunogara; ngokuti ngazi inosvipisa nyika; akuna muripo ungaitwa wenyika, wengazi yakaparadzwa mweiri, asi kwega ngengazi youwo wakairasha.

³⁴ Ndizvo musasvipisa nyika yomunozogara, yendinogarawo kweiri; ngokuti Inini Mambo Mwari ndinogara pakati pevana vaIsuraeri.”