Zvi. 34 - Bhaibheri Rakachena muChindau

Migano yeNyika

¹ Mambo Mwari wakaereketa kunaMosi echiti,

² “Panga vana vaIsuraeri, wechiti kwavari, ‘Apo mwazoguma kunyika yeKhenani (iyi ndiyo nyika inozoita nhaka yenyu, nyika yeKhenani kugumira kumigano yayo),

³ rupande rwenyu rwokubani runozoita rwokubvira ngomushango reZini kuteera mugano weEdhomu. Mugano wenyu wokubani unozotangira kumagumisiro oRuandhle rwoMunyu ngokumabvazuva;

⁴ mugano wenyu unozomonerera kubva kubani, wechikwira kuguma Akrabhimu, wechidarika kuenda Zini; nokubuda kwavo kunozoita kwokubva kubani kuguma Kadheshibharanea, nokudarika kuenda Hazaradha nokudarika kuenda Azimoni;

⁵ mugano unozokunukuka kukwira dera kubva Azimoni kuenda kuRwizi rweEgipite, nokutheya kwawo runozotheya muruandhle.’

⁶ “Mugano wokumabirirazuva unozogumira ngoRuandhle Rukuru; urwu ndirwo runozoita mugano wenyu wokumabirirazuva.

⁷ “Nouyu unozoita mugano wenyu wedera: kubvira kuRuandhle Rukuru munozogura kururamisa noMutunhu Hori.

⁸ Kubva kuMutunhu Hori munozogura mugano wenyu kururamisa ngokupotera Rebho-Hamathi, nokudarika kwomugano unozoguma Zedhadhi;

⁹ nomugano unozodarika kuguma Zifroni, nokuguma kwawo kunozoita Hazarenani; uyu ndiwo mugano wenyu wedera.

¹⁰ “Nemwi munozogura mugano wenyu wokumabvazuva kubvira Hazarenani kuguma Shefamu;

¹¹ nomugano unozodzaka kubva Shefamu kuguma Ribra, ngokumabvazuva kweAini, nomugano unozodzaka, wechiguma kumahumbikumbi oRuandhle rweKhinerethi ngokumabvazuva;

¹² nomugano unozodzaka kuguma Jorodhani, nawo unozodarika kuenda kuRuandhle rwoMunyu. Iyi inozoita nyika yenyu inemigano yayo yakaitendenedza.”

¹³ Mosi wakapanga vana vaIsuraeri echiti, “Iyi ndiyo nyika yomunozogara nhaka ngokukoanisa kwemabhigidha, yaakapanga Mambo Mwari kuti ipuwe kumadzinza mapfumbamwe nokurupande rwedzinza;

¹⁴ ngokuti dzinza revana vaRubheni kudai ngokuteererana kwemhatso yemadzibaba avo, vakaashira nhaka yavo; nedzinza revana vaGadhi kudai ngokuteererana kwemhatso yemadzibaba avo, vakaashira nhaka yavo; norupande rwedzinza raManase vakaashira nhaka yavo.

¹⁵ Madzinza mairi norupande rwedzinza vakaashira nhaka yavo ngouno kwaJorodhani pasinde peJerikho ngokumabvazuva, kwakaringirana nokumabvazuva.”

Vatungamiriri Vanokoanisa Nyika

¹⁶ Mambo Mwari wakaereketa kunaMosi echiti,

¹⁷ “Aya ndiwo mazina evamuna vanozokoanisa nyika kwomuri: ndiEreaza mupristi naJoshua mukororo waNuni.

¹⁸ Nemwi munozotora mutungamiriri umwe kubva kunedzinza rimwe ngarimwe, kuti vakoanise nyika kuita nhaka.

¹⁹ Aya ndiwo mazina evamuna: kudzinza raJudha, ndiKharebhu mukororo waJefune.

²⁰ Nokudzinza revana vaSimeoni, ndiShemueri mukororo waAmihudhi.

²¹ Nokudzinza raBhenjamini, ndiEridhadhi mukororo waKhisironi.

²² Nomutungamiriri wedzinza revana vaDhani, ndiBhuki mukororo waJogri.

²³ Nomutungamiriri wevana vaJosefa, dzinza raManase, ndiHanieri mukororo waEfodhi.

²⁴ Nomutungamiriri wedzinza revana vaEfuremu, ndiKemueri mukororo waShifitani.

²⁵ Nomutungamiriri wedzinza revana vaZebhuruni, ndiErizafani mukororo waPharnakhi.

²⁶ Nomutungamiriri wedzinza revana vaIsakha, ndiPharitieri mukororo waAzani.

²⁷ Nomutungamiriri wedzinza revana vaAsha, ndiAhihudhi mukororo waSheromi.

²⁸ Nomutungamiriri wedzinza revana vaNafitari, ndiPhedhaheri mukororo waAmihudhi.”

²⁹ Ava ndivo vaakapanga Mambo Mwari kuti vakoanise nhaka kuvana vaIsuraeri kunyika yeKhenani.