Zvi. 32 - Bhaibheri Rakachena muChindau

Madzinza okuMabvazuva kweJorodhani

¹ Zvino vana vaRubheni nevaGadhi vaiya nemitanga yakawanda yen'ombe. Naapo vaona nyika yaJaza nenyika yeGireadhi, kuti yaiya ndau yakanaka yen'ombe,

² vana vaGadhi nevana vaRubheni vakauya, vakaereketa kunaMosi naEreaza mupristi, nokuvatungamiriri vembungano vechiti,

³ “Atarothi, Dhibhoni, Jaza, Nimira, Heshibhoni, Ereare, Sebhamu, Nebho naBheoni,

⁴ nyika yaakarova Mambo Mwari pamberi pembungano yaIsuraeri, nyika yakanaka yen'ombe; nevaranda vako vane n'ombe.”

⁵ Vakaangira vakati, “Kudai taona nyasha mukuona kwenyu, inyika iyi ngaipuwe kuvaranda vako kuita nhaka yedu; musatiambusa Jorodhani.”

⁶ Asi Mosi wakati kuvana vaGadhi nokuvana vaRubheni, “Hama dzenyu dzinozoenda koorwa here, neimwimwi mwakagara pano?

⁷ Munotyisidzira ngenyi mwoyo yevaIsuraeri kuti vasaambuka kunyika yevakapuwa ndiMambo Mwari?

⁸ Ndizvo zviro zvevakaita madzibaba enyu apo pendakavatuma kubva Kadheshibharanea kuti vaone nyika.

⁹ Naapo vakakwira kuenda muBani reEshikhori, vakaona nyika, vakatyisidzira mwoyo yevaIsuraeri, kuti vasazokwira kupotera munyika yaakavapa Mambo Mwari.

¹⁰ Noushungu hwaMambo Mwari hwakabaka ngouwo mukuwo, naye wakapika echiti,

¹¹ ‘Ngegwinyiso akuna noumwe wevanhu avo vakakwira kubuda Egipite, vaiya vaane makore kubvira makumi mairi kuenda mberi ungazoona nyika yendakapika ndiyo kunaAbrahama, Isaka, nokunaJakobe, ngokuti avazi kunditeera ngokwakaperera,

¹² kwega Kharebhu mukororo waJefune, muKhenezi, naJoshua mukororo waNuni; ngokuti ivo vakateera Mambo Mwari ngokwakaperera.’

¹³ Noushungu hwaMambo Mwari hwakabaka kuvaIsuraeri, wakaita kuti vazungaire apo naapo mushango makore makumi marongomuna, metsa weshe mubarirwana uwo wakaita zvakashata mukuona kwaMambo Mwari vakafa.

¹⁴ Nazvino, imwimwi mibarirwana yevashaishi, mwamiruka pandau yemadzibaba enyu, kututsira ushungu hunotyisa hwaMambo Mwari kuvaIsuraeri!

¹⁵ Ngokuti kudai mwechizopauka kubva mukumuteera, iyezve unozovasiyazve mushango; nemwi munozouraya vanhu veshe ava.”

¹⁶ Zvino vakauya kwaari vechiti, “Tinozoakira pano matanga en'ombe dzedu nemadhorobha evana vedu.

¹⁷ Asi isusu ngokwedu tinozoenda takapakatira zvokurwa pamberi pevaIsuraeri, metsa tavagumisa kundau yevagari venyika iyi. Panguva iyi vana vedu vanozogara mumadhorobha anemarukumbati ngendaa yevagari venyika iyi.

¹⁸ Atizopetuki kumizi yedu metsa vaIsuraeri umwe ngaumwe agara nhaka yake.

¹⁹ Atizogari nhaka pamwepo navo ruseri rweJorodhani, nokuti kuenda mberi kwacho; ngokuti nhaka yedu yakapuwa kwetiri ngouno kweJorodhani ngokumabvazuva.”

²⁰ Ndizvo Mosi wakati kwavari, “Kudai mwechizoita ichi chiro, kudai mwechizoenda mwakapakatira zvokurwa pamberi paMambo Mwari kuenda kuhondo,

²¹ mwechizoenda mweshe ruseri rweJorodhani pamberi paMambo Mwari mwakapakatira zvokurwa, metsa iye azoparadza magaa ake kubva pamberi pake,

²² nenyika yanyiswa pamberi paMambo Mwari, zvino ngesure kwazvo munozopetuka, muite vasina ndaa pamberi paMambo Mwari nepamberi pevaIsuraeri; neiyi nyika inozoita nhaka yenyu pamberi paMambo Mwari.

²³ Asi kudai musikazoiti kudaro, mwashaisha pamberi paMambo Mwari; nasai kuzia kuti kushaisha kwenyu kunozomubata.

²⁴ Akanyi madhorobha evadoko venyu nematanga emakwai enyu; asi muite zvemwakagondisa ngemiromo yenyu.”

²⁵ Zvino vana vaGadhi nevaRubheni vakaereketa kunaMosi vechiti, “Varanda vako vanozoita kudai ngezvaakapanga mambo wedu.

²⁶ Vadoko vedu, vakadzi vedu, mitanga yedu nen'ombe dzedu dzeshe, zvinozogaramwo mumadhorobha eGireadhi.

²⁷ Asi varanda vako vanozopinda kuambuka, munhu weshe akapakatira zvokurwa ndizvo, pamberi paMambo Mwari koorwa, kudai ngezvaakaronza mambo wedu.”

²⁸ Ndizvo Mosi wakapanga Ereaza mupristi ngendaa yavo, naJoshua mukororo waNuni, nevakuru vemhatso dzemadzibaba vemadzinza aIsuraeri.

²⁹ NaMosi wakati kwavari, “Kudai vana vaGadhi nevana vaRubheni vechizoambuka nemwi Jorodhani, uwo nouwo akapakatira zvokurwa, pamberi paMambo Mwari, nenyika yechizonyiswa pamberi penyu; naapo munozovapa nyika yeGireadhi kuita nhaka yavo.

³⁰ Asi kudai vasikazoambuki nemwi, vakapakatira zvokurwa, vanozoane nhaka pamwepo nemwi munyika yeKhenani.”

³¹ Vana vaGadhi nevana vaRubheni vakapingura vechiti, “Kudai ngezvaakaronza Mambo Mwari kuvaranda vake, ndizvo zvetinozoita.

³² Tinozoambuka takapakatira zvokurwa pamberi paMambo Mwari, kuenda munyika yaKhenani, asi nhaka yenyika youno kweJorodhani inozogara iri yedu.”

³³ Mosi wakapa kwavari, vana vaGadhi nevaRubheni norupande rwedzinza raManase mukororo waJosefa, umambo hwaSihoni, mambo wevaAmori, noumambo hwaOgi, mambo wavaBhashani, nyika pamwepo nemadhorobha ayo, nenharaunda dzaitendenedza madhorobha.

³⁴ Vana vaGadhi vakaakisa Dhibhoni, Atarothi, Aroeri,

³⁵ Athirothishofani, Jaza, Jogibheha,

³⁶ Bhethinimira naBhethiharani, madhorobha akashosherwa, nematanga emakwai.

³⁷ Vana vaRubheni vakaakisa Heshibhoni, Ereare, Kiriathaimu,

³⁸ Nebho, Bhaarimeoni (mazina amweni akatsandudzirwa,) naSibhima; vakadudza mazina amweni kumadhorobha evakaaka.

³⁹ Mibarirwana yaMakhiri mukororo waManase vakaenda Gireadhi, vakaritora, vakadzinga vaAmori vaigara kweriri.

⁴⁰ Ndizvo Mosi wakapa Gireadhi kunaMakhiri mukororo waManase; naye wakagara kweriri.

⁴¹ Jairi mukororo waManase wakaenda, akatora maguta, akaadudzazve kuti, “Havhothijairi.”

⁴² NaNobha wakaenda, akatora Khenathi nemaguta aro, akaridudzazve ngezina rake kuti, “Nobha.”