Zvi. 31 - Bhaibheri Rakachena muChindau

Hondo Yakachena Inorwirwa neVaMidhiani

¹ Mambo Mwari wakaereketa kunaMosi echiti,

² “Unzidzira vaMidhiani ngendaa yevaIsuraeri; ngesure kweizvo unozounganidzwa kunevanhu vako.”

³ Ndizvo Mosi wakaereketa kunevanhu echiti, “Vamweni venyu ngavapakatire zvokurwa zvehondo, kuitira kuti vabude koorwa nevaMidhiani, vaite kuunzidzira kwaMambo Mwari kuvaMidhiani.

⁴ Kudzinza rimwe ngarimwe kubude gumi remazana, mukati mwemadzinza eshe eIsuraeri, munozovatuma kuhondo.”

⁵ Ndizvo kwakabuda kubva pakati pemakumi emazana aIsuraeri, vamuna gumi remazana kudzinza rimwe ngarimwe, makumi emazana gumi namairi (12,000) vakapakatira zvokurwa.

⁶ Mosi wakavatumira kuhondo, gumi remazana kubva kudzinza rimwe ngarimwe, ivo naFinehasi mukororo waEreaza mupristi, kuenda kuhondo, vanezviro zvokushandisa zvakachena, nemagwama okuridza munyara dzake.

⁷ Navo vakarwa nevaMidhiani, kudai ngezvaakapanga Mambo Mwari kunaMosi; vakauraya veshe vamuna vavo.

⁸ Vakauraya madzimambo evaMidhiani: ndiEvhi, Rekemu, Zuri, Huri naRebha, madzimambo mashanu evaMidhiani, ngepabanze pevamweni vakaurawa ndivo; zve, vakauraya Bharamu mukororo waBheo ngeshoti.

⁹ VaIsuraeri vakatora veshe vakadzi vevaMidhiani nevadoko vavo, kuita hloko, vakatora n'ombe dzavo dzeshe, nezvifuyo zvavo zveshe, nezvidziyo zvavo zveshe.

¹⁰ Vakapisha madhorobha avo eshe evaigara, nengome dzavo dzeshe ngomuriro;

¹¹ asi vakatora pfuma yeshe, nazveshe zvakachakatwa vanhu nezvifuyo.

¹² Zvino vakaunza vabatwa nezvakachakatwa nepfuma kunaMosi naEreaza mupristi, nokunembungano yeshe yevaIsuraeri, kukamba iri kubani raMoabhi, paJorodhani pasinde neJerikho.

Kupetuka kweVarwi veHondo

¹³ Mosi naEreaza mupristi, navo veshe vatungamiriri vembungano vakabuda kuenda koovaashira ngokubanze kwekamba.

¹⁴ Mosi wakatsenekera vakuru vehondo, pamwepo nenduna dzemakumi emazana nenduna dzemazana, vakabva kuhondo.

¹⁵ Mosi wakati kwavari, “Mwakasiya vakadzi veshe vechizwa here?

¹⁶ Ava vakadzi ngokupanga kwaBharamu vakaita kuti vana vaIsuraeri vashaishe kunaMambo Mwari ngendaa yaPeori, ndizvo nhenda yakauya pakati pembungano yaMambo Mwari.

¹⁷ Ndizvo zvino, urayai veshe varumbwana pakati pevana, nomukadzi weshe wakazia mwamuna ngokuatana naye.

¹⁸ Asi veshe vanasikana vasikazi kuzia mwamuna ngokuatana naye, muvangwarire vechipona kuita venyu.

¹⁹ Nemwi munozogara kubanze kwekamba mazuva manomwe; kunyazwi ndiani wenyu wakauraya munhu nokuti wakagwama muiri wakafa, dzichenesei pachenyu nehloko dzenyu, ngezuva rechitatu nezuva rechinomwe.

²⁰ Muchenese zvokufuka zvenyu, neizvo zveshe zvakaitwa ngematoo, nazvo zveshe zvakarukwa ngemviri yembudzi, nazvo zveshe zvakaitwa ngemiti.”

²¹ NaEreaza mupristi wakati kuvamuna vakaenda koorwa, “Ichi ndicho chiemeso chechironzo chaakapanga Mambo Mwari kunaMosi:

²² kwega mukore, sirivha, thusi, simbi, tini nomutovhi,

²³ chiro cheshe chisingatsvi ngomumuriro, munozoita kuti chipotedzwe ngomumuriro, chinozoita chakasukika. Zvakanyadaro chinozocheneswawo ngemvura yokuchenesa: nazvo zveshe zvinotsva ngomuriro ngazvizopinde ngomumvura.

²⁴ Munozosuka machira enyu ngezuva rechinomwe, munozoita vakasukika; ngesure kweizvo munozopotera mukamba.”

Kukoaniswa kweZvakachakatwa

²⁵ Mambo Mwari wakaereketa kunaMosi echiti,

²⁶ “Iwewe naEreaza mupristi nevakuru vemhatso dzemadzibaba embungano, erengai uwandu hwezvakachakatwa zveshe, vanhu nemhuka.

²⁷ Uparadzanise zvakachakatwa kuita marupande mairi; pakati paavo vakarwa, avo vakaenda koorwa, nepakati pembungano yeshe.

²⁸ Kubva kuchikoaniswa cheavo vakaenda kuhondo, emesa parutii kuita chikoaniswa chaMambo Mwari chiro chimwe kubva pamazana mashanu, kunyazwi pavanhu, n'ombe, mbongoro makwai nembudzi.

²⁹ Muchitora kubva kurupande rwavo, muchipe kunaEreaza mupristi, kuita mudiro kunaMambo Mwari.

³⁰ Asi kubva kurupande rwevaIsuraeri, munozotora chikoaniswa chimwe pakati pemakumi mashanu chevanhu, chen'ombe, chembongoro, chemakwai nechembudzi, zvifuyo zveshe, nokuzvipa kunevaRevhi, vanongwarira mushando muthabhenakeri raMambo Mwari.”

³¹ Mosi naEreaza vakaita kudai ngezvaakapanga Mambo Mwari kunaMosi.

³² Zvakachakatwa zvakasara zvakatorwa ngevanhu vehondo, zvaiya makwai mazana matanhatu nemakumi manomwe namashanu emakumi emazana (675,000),

³³ n'ombe makumi manomwe namairi emakumi emazana (72,000),

³⁴ mbongoro makumi matanhatu negumi rimwe emakumi emazana (61,000),

³⁵ nevanhu veshe pamwepo vaiya makumi matatu namairi emakumi emazana (32,000), vakadzi vaiya vasikazi kuzia mwamuna ngokuatana naye.

³⁶ Norupande rwechikoaniswa cheavo vakaenda kuhondo, uwandu hwacho hwaiya makwai nembudzi mazana matatu nemakumi matatu namanomwe emakumi emazana, namazana mashanu (337,500),

³⁷ nechikoaniswa chaMambo Mwari chemakwai nembudzi chaiya mazana matanhatu nemakumi manomwe namashanu (675).

³⁸ N'ombe dzaiya makumi matatu namatanhatu emakumi emazana (36,000); nechikoaniswa chaMambo Mwari chaiya makumi manomwe namairi.

³⁹ Mbongoro dzaiya makumi matatu emakumi emazana nemazana mashanu (30,500); nechikoaniswa chaMambo Mwari chaiya makumi matanhatu naimwe.

⁴⁰ Vanhu vaiya gumi namatanhatu emakumi emazana (16,000); nechikoaniswa chaMambo Mwari chaiya chevanhu makumi matatu navairi.

⁴¹ Mosi wakapa chikoaniswa, chaiya mudiro kunaMambo Mwari, kunaEreaza mupristi, kudai ngezvaakapanga Mambo Mwari kunaMosi.

⁴² Nokubva kurupande rwevaIsuraeri rwaakaparadzanisa Mosi kubva kunevanhu vehondo,

⁴³ zvino rupande rwembungano rwaiya makwai nembudzi mazana matatu nemakumi matatu namanomwe emakumi emazana nemazana mashanu (337,500),

⁴⁴ n'ombe makumi matatu namatanhatu emakumi emazana (36,000),

⁴⁵ mbongoro makumi matatu emakumi emazana nemazana mashanu (30,500),

⁴⁶ nevanhu gumi namatanhatu emakumi emazana (16,000)

⁴⁷ Kubva kurupande rwevaIsuraeri, Mosi wakatora chikoaniswa chimwe kubva mukati mwemakumi mashanu, zveshe vanhu nezvifuyo, wakazvipa kuvaRevhi, vaingwarira mushando wethabhenakeri raMambo Mwari, kudai ngezvaakapanga Mambo Mwari kunaMosi.

⁴⁸ Zvino vakuru vaiya padera pemakumi emazana ehondo, nenduna dzaiya padera pemakumi emazana, nedzaiya padera pemazana, dzakauya kunaMosi.

⁴⁹ Navo vakati kunaMosi, “Varanda vako vakaerenga vamuna veshe vokurwa vari pashi pedu, akuzi kutamika munhu noumwe wedu.

⁵⁰ Ndizvo taunza mudiro kunaMambo Mwari, weizvo zvaakaona munhu umwe ngaumwe zvinemeso zvomukore, maketani, mabhande, ndandazi, mabhengere, ndandazi dzomunzee nousanga hwomunzee, kuita muripo womweya wedu pamberi paMambo Mwari.”

⁵¹ Mosi naEreaza mupristi wakaashira mukore uyu kubva kwavari, zveshe zvinemeso zvakapfurwa.

⁵² Nouwandu hwomukore weshe wakapirwa kunaMambo Mwari ngenduna dzemakumi emazana, nangenduna dzemazana, uremu hwazvo hwaida kuita makhirogramu mazana mairi (200).

⁵³ (Varwi vehondo vaiya vakadzitorera pachavo zvakachakatwa.)

⁵⁴ Ndizvo Mosi naEreaza mupristi vakaashira mukore kubva kunduna dzemakumi emazana nedzemazana, vakauisa mutende romushongano, kuita chicherechedziso kuvana vaIsuraeri pamberi paMambo Mwari.