Zvi. 30 - Bhaibheri Rakachena muChindau

Mitemo ngendaa yeMhiko

¹ Zvino Mosi wakaereketa kuvakuru vemadzinza evaIsuraeri echiti, “Ichi ndicho chaakapanga Mambo Mwari.

² Naapo munhu echizopika mhiko kunaMambo Mwari, nokuti echipika mhiko kusunga mweya wake ngechisungo; asazogura izwi rake, unozoita kudai ndizvo zveshe zvakabuda pamuromo wake.

³ “Naapo munhu womudzimai echizopika mhiko kunaMambo Mwari, nokuti echidzisunga ngemhiko, ari mumhatso yababa ake muutsva hwake,

⁴ nababa ake echizwa mhiko yake, nokuti chisungo chake, chaakasunga ndicho mweya wake, nababa ake echizonyarara kwaari; naapo mhiko dzake dzeshe dzinozogwinya, nechisungo chimwe ngachimwe chaakadzisunga ndicho mweya wake chinozogwinya.

⁵ Asi kudai baba ake vechimurambidza ngezuva raakazwa ndiro, akuna naimwe yemhiko yake yaakadzisunga ndiyo mweya wake, inozogwinya; naMambo Mwari unozomurekerera, ngokuti baba ake vakamurambidza.

⁶ “Nokudai echizoroorwa ngomwamuna, apo akapika mhiko, nokuti kuereketa chiro ngomwamuna wake, kuti asunge mweya wake ndicho,

⁷ nokudai mwamuna wake echizwa kupika ukwo, echinyarara ngezuva raanozwa kupika ukwo; naapo kupika kwake kunozogwinya, nezvisungo zvake zvaakadzisunga ndizvo mweya wake zvinozogwinya.

⁸ Asi kudai mwamuna wake akamurambidza ngezuva raakazwa kupika ukwo; naapo unozoita kuti zviite zvisina shwiro mhiko yaakapika, neicho chaakaereketa ngomuromo wake kusunga mweya wake ndicho; Mambo Mwari unozomurekerera.

⁹ (Asi mhiko dzeshe dzeshirikadzi nedzouwo wakarambana nomwamuna wake, dzevakadzisunga ndidzo mweya yavo, vanozosungwa ndidzo.)

¹⁰ Nokudai akapika ari mumhatso yomwamuna wake, nokuti akasunga mweya wake ngemhiko,

¹¹ nomwamuna wake akazvizwa, echinyarara kwaari, asikazi kumurambidza; naapo mhiko dzake dzeshe dzinozogwinya, nezvisungo zvake zveshe zvaakadzisunga ndizvo mweya wake zvinozogwinya.

¹² Asi kudai mwamuna wake echizvirambidza naapo ngezuva raakazvizwa; naapo kunyazwi chiinyi chinobuda kubva pamuromo wake ngendaa yemhiko dzake, nokuti ngendaa yechisungo chaakadzisunga ndicho mweya wake, achizogwinyi. Mwamuna wake wakazviita kuti zviite zvisina shwiro; naMambo Mwari unozomurekerera.

¹³ Dzeshe mhiko, nemhiko dzeshe dzokutambudza ndidzo mweya, mwamuna wake ungadzigwinyisa, nokuti mwamuna wake ungadziita kuti dziite dzisina shwiro.

¹⁴ Asi kudaizve mwamuna wake echizonyarara kwaari kubva kuzuva ngezuva, naapo unozogwinyisa mhiko dzake dzeshe, nokuti zvisungo zvake zveshe, dziri padera pake; unodzitendera ngokuti wakanyarara ngezuva raakadzizwa.

¹⁵ Asi kudai echizodziita kuti dziite zvisina shwiro nokuti ngeiri njira; naapo unozotwara kushata kwake padera pake.”

¹⁶ Izvi ndizvo zviemeso zvaakapanga Mambo Mwari kunaMosi, pakati pemwamuna nomukadzi wake, nepakati pababa nomwanasikana wake, apo achiri mutsva mumhatso yababa ake.