Zvi. 3 - Bhaibheri Rakachena muChindau

Vakororo vaAroni

¹ Iyi ndiyo mibarirwana yaAroni naMosi ngezuva raakaereketa Mambo Mwari kunaMosi ari paMutunhu weSinai.

² Aya ndiwo mazina evakororo vaAroni; Nadhabhi dangwe rake, naAbhihu, Ereaza, naIthama.

³ Aya ndiwo mazina evakororo vaAroni, vapristi vakadzodzwa, vaakagadza kuti vashande mushando woupristi.

⁴ Nadhabhi naAbhihu vakafa pamberi paMambo Mwari, apo pavakapira muriro usikatenderwi pamberi paMambo Mwari vari mushango reSinai, navo vaiya vasina vana. Ereaza naIthama vakashanda mushando woupristi mukuona kwaAroni baba avo.

Mishando yeVaRevhi

⁵ NaMambo Mwari wakaereketa kunaMosi echiti,

⁶ “Kwedzedza dzinza revaRevhi pasinde, uvaemese pamberi paAroni mupristi, kuti vamudetsere.

⁷ Navo vanozongwarira kupanga kwake, nokupanga kwembungano yeshe pamberi petende romushongano, kuti vaite mishando yethabhenakeri.

⁸ Navo vanozongwarira zvidziyo zveshe zvetende romushongano, nokupanga kwevana vaIsuraeri, kuti vaite mishando yethabhenakeri.

⁹ Newe unozopa vaRevhi kunaAroni nevakororo vake; vari vakapirwa yaamho kwaari kubva pakati pevana vaIsuraeri.

¹⁰ Unozoemesa Aroni nevakororo vake, ndivo vanozongwarira mushando woupristi; nomupara unozokwedzera apo unozourawa.”

¹¹ NaMambo Mwari wakaereketa kunaMosi echiti,

¹² “Inini ndemene, wona, ndakatora vaRevhi kubva pakati pevaIsuraeri pandau yematangwe eshe awo anobeura ndani pakati pevana vaIsuraeri, ndizvo vaRevhi vanozoita vangu.

¹³ Ngokuti matangwe eshe ngaangu; ngezuva rendakauraya ndiro matangwe enyika yeEgipite, ndakadzichenesera matangwe eshe evaIsuraeri, evanhu neemhuka; anozoita angu. Ndini Mambo Mwari.”

Kuerengwa kweVaRevhi

¹⁴ NaMambo Mwari wakaereketa kunaMosi ari mushango reSinai echiti,

¹⁵ “Erenga vana vevaRevhi kudai ngokuteererana kwemhatso dzemadzibaba avo nemhuri dzavo. Munhu weshe womwamuna kubvira kune waane mwedzi wokubarwa kuenda mberi unozovaerenga.”

¹⁶ Ndizvo Mosi wakavaerenga kudai ngeizwi raMambo Mwari, kudai ngezvaakapangwa.

¹⁷ Naava ndivo vakororo vaRevhi ngemazina avo: Gershoni, Kohathi naMerari.

¹⁸ Naaya ndiwo mazina evakororo vaGershoni kudai ngemhuri dzavo: Ribhini naShimei.

¹⁹ Navakororo vaKohathi kudai ngemhuri dzavo: Amiramu, Izihari, Hebroni naUzieri.

²⁰ Navakororo vaMerari kudai ngemhuri dzavo: Mahiri naMushi. Ava ndivo vemhuri dzevaRevhi kudai ngokuteererana kwemhatso dzemadzibaba avo.

²¹ KunaGershoni ndikwo kwakabva mubarirwana wevaRibhini, nomubarirwana wevaShimei; ava ndivo mibarirwana yaGershoni.

²² Avo vakaerengwa vavo, kudai ngokuerengwa kwevamuna veshe kubvira ngevaane mwedzi wokubarwa kuenda mberi vaiya makumi manomwe emazana namazana mashanu (7,500).

²³ Mhuri dzaGershoni dzinozoemesa matende adzo ngesure kwetabhanekeri ngokumabirirazuva.

²⁴ Eriasafi mukororo waRaeri ndiye nduna yemhuri yemadzibaba evaGershoni.

²⁵ Vakororo vaGershoni ndivo vangwariri veizvi zviro mutende romushongano, zviri thabhenakeri nezvinorifukidza zvaro, nejira rakaturikwa rinokonya musiwo wetende romushongano,

²⁶ machira okuturika oruwanze, nejira romusiwo woruwanze, rinotendenedza marutii eshe ethabhenakeri nearita netambo dzaro nokuita mishando yeshe yakaemeswa.

²⁷ KunaKohathi kwakabva mubarirwana wavaAmiramu, nomubarirwana wavaIzihari, nomubarirwana wevaHebroni, nomubarirwana wevaUzieri; ava ndivo mhuri dzevaKohathi.

²⁸ Mukuerengwa kwevamuna veshe kubvira ngevaane mwedzi wokubarwa kuenda mberi vaiya makumi emazana masere namazana matanhatu (8,600) yeavo vaingwarira ndau yakacheneswa.

²⁹ Mhuri yevaKohathi inozoemesa matende ayo ngokurutii rwokubani rwethabhenakeri.

³⁰ Erizafani mukororo waUzieri ndiye unozoita mutungamiriri wemhuri yemhatso yemadzibaba yevaKohathi.

³¹ Mushando wavo vanozongwarira bhokisi rechitenderano, tafura, zvigadzikiro zvezvibani, maarita, zvidziyo zvendau yakacheneswa zvevanoshanda ndizvo vapristi, nemachira okuturika nazvo zveshe zvinoshandiswamwo.

³² NaEreaza mukororo waAroni mupristi unozoita mukuru padera penduna dzevaRevhi, naye unozongwarira avo vanozoita mushando mundau yakacheneswa.

³³ KunaMerari ndikwo kwakabva mubarirwana wavaMahiri nomubarirwana wavaMushi; ava ndivo mhuri dzaMerari.

³⁴ Naavo vakaerengwa vavo kudai ngokuerengwa kwevamuna veshe, kubvira ngevaane mwedzi kuenda mberi vaiya makumi matanhatu emazana namazana mairi (6,200).

³⁵ Zurieri mukororo waAbhihairi ndiye unozoita mutungamiriri wemhatso dzemadzibaba emhuri yaMerari; ivo vanozoemesa matende avo ngorutii rwedera rwethabhenakeri.

³⁶ Vakororo vaMerari vakapuwa mushando wokungwarira mapuranga ethabhenakeri, mwamba yaro, sika dzaro, zvitsimiso zvaro, zvidziyo zvaro nazvo zveshe zvinoshandiswamwo,

³⁷ nesikazve dzoruwanze dzinoritendenedza, zvitsimiso zvadzo nehoko dzaro nemapote aro.

³⁸ Asi avo vanozoemesa matende avo ngepamberi pethabhenakeri kwakaringira kumabvazuva, kunyazwi pamberi petende romushongano kumabvazuva, ndivo Mosi naAroni nevakororo vake, vechiita mushando womundau yakacheneswa, vechingwarira kupanga kwevana vaIsuraeri, nomupara unozokwedzera pasinde unozourawa.

³⁹ Veshe vakaerengwa vevaRevhi, avo vakaerengwa ndiMosi naAroni kudai ngomupango waMambo Mwari, kumhuri dzavo dzeshe, veshe vamuna kubvira ngevaane mwedzi wokubarwa kuenda mberi vaiya makumi mairi namairi emakumi emazana (22,000).

Kuripirwa kweMatangwe ngeVaRevhi

⁴⁰ Mambo Mwari wakati kunaMosi, “Erenga matangwe eshe evamuna vaIsuraeri; kubvira ngevaane mwedzi wokubarwa kuenda mberi, uerenge uwandu hwemazina avo.

⁴¹ Unozonditorera vaRevhi (Inini ndini Mambo Mwari) pandau yematangwe eshe evana vaIsuraeri; nen'ombe dzevaRevhi pandau yematangwe en'ombe dzevana vaIsuraeri.”

⁴² Ndizvo Mosi wakaerenga matangwe eshe pakati pevana vaIsuraeri, kudai ngokupanga kwaMambo Mwari kwaari.

⁴³ Vakaerengwa veshe matangwe evamuna, kubvira ngevaane mwedzi wokubarwa kuenda mberi, ngouwandu hwemazina avo, vaiya makumi mairi namairi emakumi emazana namazana mairi nemakumi manomwe nevatatu (22,273).

⁴⁴ Zvino Mambo Mwari wakaereketa kunaMosi echiti,

⁴⁵ “Tora vaRevhi pandau yematangwe eshe pakati pevana vaIsuraeri, nen'ombe dzevaRevhi pandau yen'ombe dzavo; nevaRevhi vanozoita vangu. Inini ndiri Mambo Mwari.

⁴⁶ Nokwavari vanozoripirwa mazana mairi nemakumi manomwe navatatu vematangwe (273) evana vaIsuraeri, vakapinda vaRevhi kuwanda.

⁴⁷ Unozotora zvigurwa zvesirivha zvishanu, panoumwe ngoumwe ngokuerengwa kwemasoro, kudai ngechipimo chesirivha chomundau yakacheneswa, (chigurwa chesirivha chinokwana magera makumi mairi.)

⁴⁸ Unozopa mare iyo kunaAroni nevakororo vake, inoedzana nouwandu hweavo vanoripirwa.”

⁴⁹ Ndizvo Mosi wakatora mare yokuita muripo weavo vakapinda kuwanda, avo vakaripirwa ngevaRevhi.

⁵⁰ Wakatora mare yematangwe evana vaIsuraeri zvigurwa zvesirivha gumi rimwe remazana nemazana matatu nemakumi matanhatu namashanu (1,365), kudai ngechipimo chendau yakacheneswa.

⁵¹ NaMosi wakapa mare yeavo vakaripirwa kunaAroni nevakororo vake, kudai ngezvakaronza izwi raMambo Mwari, kudai ngokupanga kwaMambo Mwari kunaMosi.