Zvi. 29 - Bhaibheri Rakachena muChindau

Zvipo zveDhiri reGore Idzva

¹ “Ngomwedzi wechinomwe, ngezuva rokutanga munozoa nomushongano wakachena; amuzoiti mushando kunyazwi ngouri. Izuva rokuridza gwama kwomuri,

² nemwi munozopira mudiro wokupisha kuita gwema rakanaka kunaMambo Mwari: mukono umwe mutsva, gondohwe rimwe, nezvimagondohwe zvinomwe zvinegore rimwe, zvisina kuremara.

³ Mudiro unopirwa pamwepo nazvo wezviyo unozoita ufu hwakakumanidzwa nemafuta, makhirogramu matatu kumukono umwe, makhirogramu mairi kugondohwe rimwe;

⁴ khirogramu rimwe kunechigondohwe chimwe ngachimwe chezvimagondohwe zvinomwe;

⁵ negotokoto rimwe rokuita mudiro wokushaisha, kuita muripo wenyu;

⁶ ngepabanze pomudiro wokupisha womwedzi, nomudiro unopirwa nawo kuita wezviyo, nomudiro wokupisha wezuva ngezuva, nomudiro unopirwa nawo wezviyo, nemidiro yayo yokumwa, kudai ngokuemeswa kwayo, kuita gwema rakanaka, mubairo unoitwa ngomuriro kunaMambo Mwari.

Zvipo zveZuva roKuripirwa

⁷ “Nemwi munozoa nomushongano wakachena ngezuva regumi romwedzi uyu wechinomwe; dzirambei pachenyu; amuzoiti mushando.

⁸ Munozopira mudiro wokupisha kunaMambo Mwari kuita gwema rakanaka: mukono umwe mutsva, gondohwe rimwe nezvimagondohwe zvinomwe zvinegore rimwe, zvisina kuremara.

⁹ Mudiro wezviyo unozopirwa nazvo unozoita woufu hwakamotseka hwakakumanidzwa nemafuta, makhirogramu matatu kumukono umwe, makhirogramu mairi kugondohwe rimwe;

¹⁰ khirogramu rimwe kunechigondohwe chimwe ngachimwe chezvimagondohwe zvinomwe;

¹¹ negotokoto rimwe rokuita mudiro wokushaisha, ngepabanze pomudiro wokushaisha unoita muripo, nomudiro wezuva rimwe ngarimwe wokupisha, nomudiro wezviyo nowokumwa.

Zvipo zveDhiri reMatumba

¹² “Ngezuva regumi namashanu romwedzi wechinomwe munozoa nomushongano wakachena; amuzoiti mushando ngeiro zuva. Munozoitira dhiri kunaMambo Mwari mazuva manomwe.

¹³ Munozopira mudiro wokupisha, mubairo unoitwa ngomuriro, kuita gwema rakanaka kunaMambo Mwari: mikono mitsva gumi namitatu, magondohwe mairi, nezvimagondohwe gumi nazvirongomuna zvinegore rimwe. Zvinozoita zvisina kuremara.

¹⁴ Mudiro wazvo wezviyo unozoita woufu hwakamotseka hwakakumanidzwa nemafuta, makhirogramu matatu kumukono umwe ngoumwe wemikono gumi namitatu, makhirogramu mairi kugondohwe rimwe ngarimwe remairi;

¹⁵ khirogramu rimwe kunechigondohwe chimwe ngachimwe chezvimagondohwe gumi nezvirongomuna;

¹⁶ negotokoto rimwe kuita mudiro wokushaisha, ngepabanze pomudiro wezuva rimwe ngarimwe wokupisha, nomudiro unopirwa wezviyo nowokumwa.

¹⁷ “Ngezuva rechipiri munozopira mikono mitsva gumi namiiri, magondohwe mairi, nezvimagondohwe gumi nazvirongomuna, zvinegore rimwe, zvisina kuremara;

¹⁸ nemidiro inopirwa yezviyo noyokumwa yemikono, yemagondohwe neyezvimagondohwe, kudai ngokuemeswa kwazvo ngouwandu hwazvo;

¹⁹ negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

²⁰ “Ngezuva rechitatu: mikono gumi noumwe, magondohwe mairi, nezvimagondohwe gumi nazvirongomuna zvinegore rimwe, zvisina kuremara,

²¹ nemidiro inopirwa yezviyo, neyokumwa yemikono, yemagondohwe neyezvimagondohwe, kudai ngokuemeswa kwazvo ngouwandu hwazvo;

²² negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

²³ “Ngezuva rechirongomuna: mikono gumi, magondohwe mairi, nezvimagondohwe gumi nazvirongomuna zvinegore rimwe, zvisina kuremara;

²⁴ nemidiro inopirwa yezviyo neyokumwa yemikono, yemagondohwe, neyezvimagondohwe kudai ngokuemeswa kwazvo ngouwandu hwazvo;

²⁵ negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

²⁶ “Ngezuva rechishanu: mikono mipfumbamwe, magondohwe mairi, nezvimagondohwe gumi nazvirongomuna zvinegore rimwe zvisina kuremara;

²⁷ nemidiro inopirwa yezviyo neyokumwa yemikono, yemagondohwe, neyezvimagondohwe, kudai ngokuemeswa kwazvo ngouwandu hwazvo;

²⁸ negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

²⁹ “Ngezuva rechitanhatu mikono misere, magondohwe mairi, nezvimagondohwe gumi nazvirongomuna, zvinegore rimwe, zvisina kuremara;

³⁰ nemidiro inopirwa yezviyo neyokumwa yemikono, yemagondohwe neyezvimagondohwe, kudai ngokuemeswa kwazvo ngouwandu hwazvo;

³¹ negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

³² “Ngezuva rechinomwe mikono minomwe, magondohwe mairi, nezvimagondohwe gumi nazvirongomuna, zvinegore rimwe, zvisina kuremara;

³³ nemidiro inopirwa yezviyo, neyokumwa yemikono, yemagondohwe, neyezvimagondohwe kudai ngokuemeswa kwazvo ngouwandu hwazvo;

³⁴ negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

³⁵ “Ngezuva rechisere munozoa nomushongano wakachena; amuzoiti mushando kunyazwi ngouri ngeiro zuva.

³⁶ Munozopira mudiro wokupisha, mudiro unoitwa ngomuriro, kuita gwema rakanaka kunaMambo Mwari mukono umwe, gondohwe rimwe, nezvimagondohwe zvinomwe, zvinegore rimwe, zvisina kuremara;

³⁷ nemidiro inopirwa yezviyo neyokumwa yemikono, yemagondohwe, nezvimagondohwe, kudai ngokuemeswa kwazvo ngouwandu hwadzo;

³⁸ negotokoto rimwe rokuita mudiro wokushaisha, ngepabanze pomudiro wezuva rimwe ngarimwe wokupisha, nomudiro wezviyo nowokumwa.

³⁹ “Izvi munozozvipira kunaMambo Mwari mumishongano yenyu yakaemeswa yezviyo, ngepabanze pezvomunopira ngokupika, zvipo zvenyu zvomunopa ngokuda, kuita midiro yenyu yokupisha, midiro yenyu yezviyo, midiro yenyu yokumwa noyokunyarara.”

⁴⁰ Ndizvo Mosi wakaronzera vaIsuraeri zviro zveshe kudai ngezvaakapanga Mambo Mwari kunaMosi.