Zvi. 28 - Bhaibheri Rakachena muChindau

Zvipo zveMidiro yeZuva Rimwe ngaRimwe

¹ Mambo Mwari wakaereketa kunaMosi echiti,

² “Panga vaIsuraeri, uti kwavari, ‘Zvipo zvangu, kudya kwomudiro wangu unoitwa ngomuriro, wokuita gwema rakanaka kwendiri, munozongwarira kuzvipira kwendiri ngenguva yakaemeswa.’

³ Unozoti kwavari, ‘Uyu ndiwo mudiro unoitwa ngomuriro wounozopira kunaMambo Mwari: zvimagondohwe zviiri zvegore rimwe zvisina kuremara, kudai ngomudiro wezuva rimwe ngarimwe.

⁴ Unozopira kagondohwe kamwe mangwanani, nekamweni kagondohwe unozokapira madeekoni,

⁵ zvino rupande rwechegumi rwekhirogramu rimwe roufu unozoita mudiro wezviyo, hwakakumanidzwa norupande rwechirongomuna rweritha rimwe remafuta akanasa kuengwa.

⁶ Uyu mudiro wokupisha wezuva rimwe ngarimwe, wakaemeswa paMutunhu weSinai, kuita gwema rakanaka, mubairo unoitwa ngomuriro kunaMambo Mwari.

⁷ Nomudiro wawo wokumwa unozoita ritha rimwe rezvokumwa kugondohwe rimwe; mundau yakachena unozodurura zvokumwa zvinodhakisa kuita mudiro kunaMambo Mwari.

⁸ Gondohwe rimweni unozoripira madeekoni nomudiro wezviyo nomudiro wokumwa, wakadai ngewemangwanani; unozoupira kudai ngomudiro unoitwa ngomuriro, kuita gwema rakanaka kunaMambo Mwari.’

Zvipo zveSabatha

⁹ “Ngezuva reSabatha munozopira zvimagondohwe zviiri zvinegore rimwe zvisina kuremara, nemakhirogramu mairi oufu hwokuita mudiro wezviyo, hwakakumanidzwa nemafuta, nomudiro wawo wokumwa.

¹⁰ Uyu ndiwo mudiro wokupisha wemaSabatha eshe, ngepabanze pouwo wezuva rimwe ngarimwe wokupisha, nepouwo wokumwa.

Zvipo zveZuva roKutanga reMwedzi

¹¹ “Mukuamba kwokutawa kwomwedzi yenyu munozopira mudiro wokupisha kunaMambo Mwari: mikono miiri mitsva, gondohwe rimwe nezvimagondohwe zvinomwe zvinegore rimwe zvisina kuremara;

¹² nemakhirogramu matatu oufu hwokuita mudiro wezviyo hwakakumanidzwa nemafuta kumukono umwe; nemakhirogramu mairi oufu kuita mudiro wezviyo hwakakumanidzwa nemafuta kugondohwe rimwe;

¹³ nekhirogramu rimwe roufu hwakakumanidzwa nemafuta kuita mudiro wezviyo kunegondohwe rimwe ngarimwe, kuita mudiro wokupisha unegwema rakanaka, mudiro unoitwa ngomuriro kunaMambo Mwari.

¹⁴ Midiro yawo yokumwa inozoita ritha rimwe revhini kumukono umwe, ritha rimwe nehafu kugondohwe rimwe neritha rimwe kukagondohwe kamwe. Iyi midiro yokupisha yemwedzi yeshe mukati mwegore.

¹⁵ Gotokoto rimwe rinozopirwa kunaMambo Mwari kuita mudiro wokushaisha, ngepabanze pomudiro wezuva rimwe ngarimwe wokupisha nomudiro wawo wokumwa.

Zvipo zveDhiri reZvingwa Zvisina Mumera

¹⁶ “Ngezuva regumi namarongomuna romwedzi wokutanga kunozoapo Phasika kunaMambo Mwari.

¹⁷ Ngezuva regumi namashanu romwedzi uyu kunozoitwa dhiri rePhasika; mazuva manomwe munozodya chingwa chisina mumera.

¹⁸ Ngezuva rokutanga unozoapo mushongano wakachena; amuzoiti mushando nokuti ngouri ngeiro zuva.

¹⁹ Munozopira mubairo unoitwa ngomuriro kuita mudiro wokupisha kunaMambo Mwari: mikono miiri mitsva, gondohwe rimwe, nezvimagondohwe zvinomwe zvinegore rimwe zvisina kuremara.

²⁰ Mudiro wavo wezviyo unozoita woufu hwakakumanidzwa nemafuta; munozopira makhirogramu matatu kumukono umwe, makhirogramu mairi kugondohwe rimwe.

²¹ Khirogramu rimwe rinozopirwa kunechigondohwe chimwe ngachimwe chezvimagondohwe zvinomwe;

²² zve negotokoto rimwe rokuita mudiro wokushaisha, kuita muripo wenyu.

²³ Munozopira izvi ngepabanze pomudiro wokupisha wemangwanani, mudiro wezuva rimwe ngarimwe wokupisha.

²⁴ Ngenjira imweyo munozogara mwechipira mazuva eshe, metsa kupere mazuva manomwe, mudiro wokudya unoitwa ngomuriro, kuita gwema rakanaka kunaMambo Mwari; unozopira ngepabanze pomudiro wezuva rimwe ngarimwe wokupisha nowokumwa.

²⁵ Ngezuva rechinomwe munozoa nomushongano wakachena; amuzoiti mushando nokuti ngouri ngeiro zuva.

Zvipo zveDhiri roKukukura

²⁶ “Ngezuva remitanguro yemichero, apo pomunozopira mudiro wezviyo kunaMambo Mwari, pamadhiri enyu emavhiki munozoa nomushongano wakachena; amuzoiti mushando nokuti ngouri ngeiro zuva.

²⁷ Munozopira mudiro wokupisha kuita gwema rakanaka kunaMambo Mwari: mikono miiri mitsva, gondohwe rimwe nezvimagondohwe zvinomwe zvinegore rimwe.

²⁸ Mudiro wavo wezviyo unozoita woufu hwakakumanidzwa nemafuta, makhirogramu matatu oufu kumukono umwe, makhirogramu mairi kugondohwe rimwe;

²⁹ khirogramu rimwe kunechigondohwe chimwe ngachimwe chezvimagondohwe zvinomwe;

³⁰ negotokoto rimwe kuita muripo wenyu.

³¹ Munozozvipira ngepabanze pomudiro wezuva rimwe ngarimwe wokupisha, nomudiro wezviyo munozozvipira nomudiro wazvo wokumwa. Zvinozoita zvisina kuremara.