Zvi. 27 - Bhaibheri Rakachena muChindau

Vanasikana veZerofehadhi

¹ Zvino kwakauya vanasikana vaZerofehadhi. Zerofehadhi mukororo waHeferi, mukororo waGireadhi, mukororo waMakhiri, mukororo waManase, mukororo waJosefa wedzinza raManase. Naaya ndiwo mazina evanasikana vake: Mahea, Noa, Hogira, Mirikha naThiriza.

² Vakaema pamberi paMosi, Ereaza mupristi, vatungamiriri nembungano yeshe, pamusiwo wetende romushongano vechiti,

³ “Baba edu vakafira mushango, vaiya vasiri muchikwata cheavo vakaunganidzana pamwepo kumukira Mambo Mwari muchikwata chaKhora; asi vakafira muchishaishi chavo, vasina vakororo.

⁴ Zina rababa edu ringazorova ngenyi kubva pakati pedzinza ravo, ngokuti vaiya vasina mukororo? Tipenyiwo nhaka pakati pevanun'una vababa edu.”

⁵ Mosi wakaunza ndaa yavo pamberi paMambo Mwari.

⁶ NaMambo Mwari wakaereketa kunaMosi echiti,

⁷ “Vanasikana vaZerofehadhi vanasa kuereketa; ngegwinyiso unozovapa nhaka pakati pevanun'una vababa avo, uite kuti nhaka yababa avo iuye kwavari.

⁸ Newe unozoereketazve kunavana vaIsuraeri wechiti, ‘Kudai munhu wechifa, asina mukororo, naapo munozoita kuti nhaka yake igarwe ngomwanasikana wake.

⁹ Kudai asina mwanasikana, naapo munozopa nhaka yake kunevanun'una vake.

¹⁰ Kudai asina vanun'una, naapo munozopa nhaka yake kunevanun'una vababa ake.

¹¹ Kudai baba ake asina vanun'una, naapo nhaka yake inozogarwa ngehama yake yepasinde yedzinza rake, ndiye unozogara nhaka yayo. Ichi chinozoita chiemeso nomupango kuvaIsuraeri, kudai ngezvaakapanga Mambo Mwari kunaMosi.’ ”

Joshua Unotsanangurwa Kutora Ndau yaMosi

¹² Mambo Mwari wakati kunaMosi, “Kwira kumutunhu uyu weAbharimu, uone nyika yendakapa kuvana vaIsuraeri.

¹³ Naapo waiona, newezve unozounganidzwa kuvanhu vako, kudai ngezvaakaunganidzwa Aroni mukoma wako.

¹⁴ Ngokuti imwimwi mwakamukira mupango wangu muri mushango reZini, apo mbungano peyakaita hasha neni. Amuzi kuonisa kucheneswa kwangu pamberi pokuona kwavo pamvura.” (Iyi ndiyo mvura yeMeribha muKadheshi, mushango reZini.)

¹⁵ Mosi wakaereketa kunaMambo Mwari echiti,

¹⁶ “Mambo Mwari, Mwari womweya yevanhu veshe, ngaaemese munhu padera pembungano iyi,

¹⁷ uwo unozobuda kuenda pamberi pavo nokupotera pamberi pavo; unozovatungamirira kubuda nokuvapotedza mukati, kuti mbungano yaMambo Mwari isazodai ngemakwai asina muushi.”

¹⁸ Ndizvo Mambo Mwari wakati kunaMosi, “Tora Joshua mukororo waNuni, munhu uwo unomweya, uise nyara yako padera pake.

¹⁹ Umuemese pamberi paEreaza mupristi nepamberi pembungano yeshe; umugadze kuita mutungamiriri.

²⁰ Unozomupa rupande rwesimba rako, kuti mbungano yeshe yevana vaIsuraeri imupurutane.

²¹ Asi unozoema pamberi paEreaza mupristi, uwo unozomubvunzira kuda kwangu ngokushandisa Urimu pamberi paMambo Mwari; ngeizwi rake vanozobuda, ngeizwi rake vanozopotera, pamwepo iye nevana vaIsuraeri, mbungano yeshe.”

²² Ndizvo Mosi wakaita kudai ngezvaakamupanga Mambo Mwari. Wakatora Joshua, akamuemesa pamberi paEreaza mupristi nepamberi pembungano yeshe;

²³ naye wakaisa nyara dzake padera pake, wakamugadza, kudai ngezvaakapanga Mambo Mwari kubudikidza ngenyara yaMosi.