Zvi. 24 - Bhaibheri Rakachena muChindau

¹ Zvino Bharamu wakaona kuti Mambo Mwari waida kufumisa vaIsuraeri, ndizvo aazi kuenda kudai ngemikuwo imweni kuti atsvake masaramuso, asi wakaemesa hope yake kuringira mushango.

² Bharamu wakamirudza madziso ake, wakaona vaIsuraeri vechigara mumatende avo kudai ngokuteererana kwemadzinza avo. Mweya waMambo Mwari wakauya padera pake.

³ Wakaereketa chiprofeti chake echiti, “Chiprofeti chaBharamu mukororo waBheo, chiprofeti chomunhu unemadziso ake akapembenudzwa,

⁴ chiprofeti chouwo unozwa mazwi aMwari, uwo unoona chioniso choUnesimba-reshe, uwo unowa pashi, asi madziso ake akabeuka:

⁵ A, kunakanyi kwematende ako, iwewe Jakobe, matende ako, iwewe Isuraeri!

⁶ Kudai ngomuchindwi wakapamhama kuenda kuretu, nokudai ngeminda iri pasinde porwizi, kudai ngemiti yemaalo-erigini yaakasima Mambo Mwari, nokudai ngemiti yemisidhari iri pasinde pemvura.

⁷ Mvura inozoerera kubva muzvidziyo zvake, nembeu dzake dzinozoa nemvura yakawanda, namambo wake unozoa padera paAgagi, noumambo hwake hunozokuriswa.

⁸ Mwari unomubudisa kubva Egipite, unesimba rakadai ngenyanga dzenyati; unozodya madzinza ari magaa ake, unozopwanya magodo avo. Unozovapotya ngemisee yake.

⁹ Unozohwarira kudai ngemhondoro, nokudai ngemhondoro yehadzi huru; ndiani unozomumusa? Unofumiswa uwo weshe unokufumisa, unotukwa uwo weshe unokutuka.”

¹⁰ Noushungu hwaBharaki hwakabaka kunaBharamu, naye wakachaya nyara dzake pamwepo. Bharaki wakati kunaBharamu, “Ndakakudaidza kuti unditukire magaa angu, asi iwewe wakavafumisa katatu aka.

¹¹ Ndizvo zvino, tiza! Enda kundau yako! Ndakati, ‘Ndinozokubhadhara kakurutu.’ Asi Mambo Mwari wakakurambidza kuti usaanomubhadharo.”

¹² NaBharamu wakati kunaBharaki, “Andizi kuronza here kunhumwa dzako, dzewakatuma kwendiri, ndechiti,

¹³ ‘Kudai Bharaki echinyazondipa mhatso yake yakazara ngesirivha nomukore, andingakoni kudarika mupango waMambo Mwari, kuti ndiite zvakanaka nokuti zvakashata ngomupinimidzo wangu; asi icho chaanozoronza Mambo Mwari, ndicho chendinozoereketa?’

¹⁴ Ndizvo zvino, ndinohwirira kuvanhu vangu; ngandikuronzere icho chinozoitwa ngaava vanhu kunevanhu vako ngemazuva okugumisira.”

Kuprofeta kwoKugumisira kwaBharamu

¹⁵ Ndizvo wakaprofeta chiprofeti chake echiti, “Chiprofeti chaBharamu mukororo waBheo, chiprofeti chomunhu unemadziso ake akabeuka,

¹⁶ chiprofeti chouwo unozwa mazwi aMwari, nounozia kuzia kwoUripadera-pazveshe, uwo unoona chioniso choUnesimba-reshe, uwo unowa pashi, asi madziso ake akabeuka:

¹⁷ Ndinomuona, asi haiwa zvino; ndinomuringira, asi haiwa pasinde; kunozobuda Nyeredzi kubva kunaJakobe, neNdonga youmambo inozobuda kubva kunaIsuraeri, inozopwanya nyika dzokumigano yeMoabhi, iuraye vana veshe vaShethi.

¹⁸ Edhomu inozoitwa nhaka, neSeira nayo inozoitwa nhaka yemagaa ayo; naapo Isuraeri unozoangira kuita ngwazi.

¹⁹ Kubva kunaJakobe kunozobuda uwo unozotonga, unozoparadza avo vanosara mudhorobha reIri.”

²⁰ Zvino wakaringira padera pevaAmareki, naye wakaprofeta chiprofeti chake echiti, “Amareki rakaita dzinza rokutanga pakati pemadzinza; asi kugumisira kwaro kupera mhera nariini.”

²¹ Zvino wakaringira vaKheni, wakaprofeta chiprofeti chake echiti, “Ugaro hwako hwakagwinya wakaisa chisaki chako murutwe rwebuwe.

²² Kunyazwi zvakanyadaro vaKheni vanozoparadzwa. Ashuri unozomutora kuita hloko metsa riini?”

²³ Wakaprofeta chiprofeti chake echiti, “Ihehe, ndiani ungazopona apo Mwari aita izvi?

²⁴ Asi ngarava dzinozouya kubva kumugano weKitimi, nadzo dzinozotambudza Ashuri, nokutambudza Ebha, naye unozoparadzwa mhera nariini.”

²⁵ Zvino Bharamu wakamiruka, akahwirira kundau yake, naBharaki wakaendawo njira yake.