Zvi. 22 - Bhaibheri Rakachena muChindau

Mambo weMoabhi Unodaidza Bharamu

¹ VaIsuraeri vakaenda, vakaemesa matende avo murukaro rweMoabhi kuambuka rwizi rweJorodhani pakaringirana neJerikho.

² Zvino Bharaki mukororo waZiphori wakaona zveshe zvevakaita vaIsuraeri kunevaAmori.

³ VaMoabhi vakatya vanhu ava kakurutu, ngokuti vaiya vazhinji; nevaMoabhi vakakakaseka ngendaa yevaIsuraeri.

⁴ NevaMoabhi vakati kuvakuru vevaMidhiani, “Zvino iyi mbungano inozonambura zveshe zvinotitendenedza, kudai ngekabi inonambura mwenje weshe weshango.” Zvino Bharaki mukororo waZiphori waiya mambo ngouwo mukuwo.

⁵ Ndizvo wakatuma nhumwa kunaBharamu mukororo waBheo muPhetori, riri pasinde porwizi Yufratesi munyika yehama dzake, echiti, “Vanhu vakabuda kubva Egipite; vakapararira padera penyika, navo vanogara vakaringirana neni.

⁶ Uya zvinopano, unditukire ava vanhu, ngokuti vanesimba kupinda inini; pamweni ndingakona kuvanyisa, ndivadzinge kubva munyika iyi; ngokuti ndinozia kuti kunyazwi ndiani wounofumisa unozofumiswa, nouwo wounotuka unozotukwa.”

⁷ Ndizvo vakuru vaMoabhi nevaMidhiani vakaenda vanezvipo zvavo zviri munyara dzavo; vakaguma kuna Bharamu, vakaereketa kwaari mazwi aBharaki.

⁸ Naye wakati kwavari, “Atai pano usiku huno, ndinozomuunzira izwi kudai ngezvaanoereketa kwendiri Mambo Mwari.” Ndizvo vatungamiriri vevaMoabhi vakagara naBharamu.

⁹ Mwari wakauya kunaBharamu, akati, “Ndiani ava vanhu vounavo?”

¹⁰ Bharamu wakati kunaMwari, “Bharaki mukororo waZiphori, mambo weMoabhi, wakatumira izwi iri echiti,

¹¹ ‘Vanhu vakabuda kubva Egipite, vapararira nenyika; zvino uya unditukire ava vanhu; pamweni ndingakona kuvanyisa, ndivadzinge kubva munyika.’ ”

¹² Mwari wakati kunaBharamu, “Iwewe auzoendi navo; auzotuki ava vanhu, ngokuti vakafumiswa.”

¹³ Ndizvo Bharamu wakamuka mangwanani, akati kunevatungamiriri vaBharaki, “Hwirirai kunyika yenyu, ngokuti Mambo Mwari unondirambidza kuenda nemwi.”

¹⁴ Ndizvo vatungamiriri nevakuru veMoabhi vakamiruka, vakaenda kunaBharaki, vakati kwaari, “Bharamu wakaramba kuuya nesu.”

¹⁵ Bharaki wakatumazve vakuru vamweni, vakapinda kuwanda, nokupinda kuremeredzeka kuneavo vokutanga.

¹⁶ Vakaguma kunaBharamu, vakati kwaari, “Unoronza izvi Bharaki mukororo waZiphori, ‘Ndinokupota, usatendera chiro nachimwe kuti chikurambidze kuuya kwendiri;

¹⁷ ngokuti ngegwinyiso ndinozokumirudza kuti uane kuremeredzwa kukuru, kunyazwi ngechiri chounozoronza kwendiri neni ndinozoita; uya, unditukire ava vanhu.’ ”

¹⁸ Asi Bharamu wakapingura varanda vaBharaki echiti, “Kunyazwi Bharaki akanyandipa mhatso yake yakazara ngesirivha nomukore, andizodariki mupango waMambo Mwari, Mwari wangu, kuti ndiite zvakatsonga zvaro, nokuti zvinopinda kuwanda.

¹⁹ Ndizvo zvino, ndinomupota, ataizve pano usiku huno, kudai ngezvakaita vamweni, kuti ndizie chaanozoronza kwendiri Mambo Mwari.”

²⁰ Mwari wakauya kunaBharamu usikuhwo, wakati kwaari, “Kudai vamuna vauya kookudaidza, miruka, uende navo; asi ita zvendinozokuronzera kwega.”

²¹ Ndizvo Bharamu wakamiruka mangwanani, wakaisa chigaro pambongoro yake, wakaenda nevakuru veMoabhi.

Bharamu neMbongoro yake

²² Ushungu hwaMambo Mwari hwakabaka ngokuti waienda, nengirosi yaMambo Mwari yakaema munjira kumutsiira kudai ngegaa rake. Zvino waigadha pambongoro yake, nevaranda vake vairi vaiya naye.

²³ Mbongoro yakaona ngirosi yaMambo Mwari yechiema munjira, neshoti yayo yakashwamurwa iri munyara yayo; ndizvo mbongoro yakapauka kubva munjira, yakaenda mushango; naBharamu wakachaya mbongoro, kuipetudza munjira.

²⁴ Zvino ngirosi yaMambo Mwari yakaema munjira yakamanikana pakati peminda yemivhini, apo paiya norukumbati ino neino.

²⁵ Naapo mbongoro yakaona ngirosi yaMambo Mwari, yakadzirovanidza norukumbati, yakarovanidza murenje waBharamu norukumbati, naye wakaichayazve.

²⁶ Zvino ngirosi yaMambo Mwari yakaenda mberi, yakaema pandau yakaita yakamanikana, apo paiya pasina ndau yokukunukukira kumudyo nokuti kumuoshwe.

²⁷ Naapo mbongoro yaona ngirosi yaMambo Mwari, yakaata pashi Bharamu ari padera payo, noushungu hwaBharamu hwakabaka, wakachaya mbongoro ngendonga.

²⁸ Zvino Mambo Mwari wakabeura muromo wembongoro, ikati kunaBharamu, “Chiinyi chendaita kwouri, kuti iwewe undichaye katatu aka?”

²⁹ NaBharamu wakati kunembongoro, “Ngokuti iwewe wandiita benzi! Ndingada kuti dai ndaiya neshoti munyara yangu! Ndaizokuuraya zvinopano!”

³⁰ Asi mbongoro yakati kunaBharamu, “Andiri mbongoro yako here, yewagadha padera payo kupona kwako kweshe metsa nyamashi? Ndakambokuitira kudai here?” Naye wakapingura akati, “Haiwa.”

³¹ Zvino Mambo Mwari wakabeura madziso aBharamu, wakaona ngirosi yaMambo Mwari yakaema munjira, neshoti yayo yakashwamurwa munyara yayo; naye wakakotamisa soro rake pashi, akawa ngehope yake.

³² Nengirosi yaMambo Mwari yakati kwaari, “Waichairenyi mbongoro yako mikuwo mitatu iyi? Penya, ndabuda kuti ndikurambidze, ngokuti njira yako ngeyokupauka pamberi pangu.

³³ Nembongoro yakandiona, yakapauka kubva kwendiri katatu aka. Kudai isikazi kupauka kubva kwendiri, ngegwinyiso ndaizodai ndakuuraya iwewe zvino, mbongoro ndaizoiponesa.”

³⁴ Zvino Bharamu wakati kunengirosi yaMambo Mwari, “Ndashaisha; ngokuti ndisaizia kuti iwewe waiema munjira kundirambidza. Ndizvo zvino, kudai zvisikakudakadzi ndinozohwirira kanyi.”

³⁵ Nengirosi yaMambo Mwari yakati kunaBharamu, “Enda naavo vamuna; asi ereketa izvo zvega zvendinozoronza kwouri.” Ndizvo Bharamu wakaenda nevakuru vaBharaki.

Bharaki Unoashira Bharamu

³⁶ Naapo Bharaki azwa kuti Bharamu waiya auya, wakabuda kuenda kooshongana naye kudhorobha raMoabhi, riri kumagumisiro yaamho omugano waArinoni.

³⁷ Bharaki wakati kunaBharamu, “Andizi kutuma kwouri here ndechinasa kupota kukudaidza? Ndizvo auzi kuuya ngenyi kwendiri? Andikoni here kukuremeredza?”

³⁸ Bharamu wakati kunaBharaki, “Ringira, ndauya kwouri zvino, asi ndinesimba here rokuereketa chiro? Mazwi aanoisa Mambo Mwari mumuromo wangu ndiwo endinozoereketa.”

³⁹ Zvino Bharamu wakaenda naBharaki, vakaguma Kiriathihuzothi.

⁴⁰ Bharaki wakapira mudiro wekabi newegwai, wakatumira kunaBharamu nokuvakuru vaiya naye.

Chiprofeti choKutanga chaBharamu

⁴¹ Nechimangwani Bharaki wakatora Bharamu, akamukwidza kuBhamothi-Bhaari, kubva apo waikona kuona rupande rwevanhu vaIsuraeri.