Zvi. 21 - Bhaibheri Rakachena muChindau

VaIsuraeri Vanonyisa VaKhenani

¹ Naapo mambo Aradhi muKhenani, uwo waigara muNegebhi azwa kuti vaIsuraeri vaiuya ngenjira yokuAtharimu, wakaambana navaIsuraeri, wakatora vamweni vavo kuita usungwa.

² Zvino vaIsuraeri vakapika mhiko kunaMambo Mwari vechiti, “Ngegwinyiso kudai wechizopa ava vanhu munyara dzedu, tinozoparadza yaamho madhorobha avo.”

³ Mambo Mwari wakapurutana izwi raIsuraeri, naye wakapa vaKhenani kwavari, navo vakavapedza nemadhorobha avo; ndizvo wakadudza ndau kuti, “Horma.”

Nyoka yeThusi

⁴ Vakahamba kubva kuMutunhu Hori ngenjira yokuRuandhle Rwakatsvuka kumonerera nyika yeEdhomu; vanhu vakapera simba vari munjira.

⁵ Vanhu vakaereketa kuitira ndaa Mwari naMosi vechiti, “Mwakatikwidzirenyi kubva Egipite kuti tifire mushango muno? Ngokuti apana chingwa, zve, akuna mvura; nomweya yedu yafinhwa ngeichi chingwa chakafokosheka.”

⁶ Zvino Mambo Mwari wakatuma nyoka dzinoukaira pakati pevanhu, nadzo dzakaruma vanhu; ndizvo vaIsuraeri vazhinji vakafa.

⁷ Ndizvo vanhu vakauya kunaMosi, vakati, “Takashaisha, ngokuti takaereketa kuitira ndaa Mambo Mwari neiwewe; kumbira kunaMambo Mwari kuti atidusire nyoka idzi kubva pakati pedu.” Ndizvo Mosi wakakumbirira vanhu.

⁸ NaMambo Mwari wakati kunaMosi, “Dziitire muedzaniso wenyoka inoukaira, uiemesere padziro romuti; weshe uwo wakarumwa, apo echizoringira kweiri unozopona.”

⁹ Ndizvo Mosi wakanasira muedzaniso wenyoka yethusi, akaiisa padziro romuti; naapo nyoka yaruma munhu kunyazwi ngouri, apo aringira muedzaniso wenyoka yethusi, waipona.

Kubva paMutunhu weHori Kuenda muBani reVaMoabhi

¹⁰ VaIsuraeri vakahamba kuenda, vakaemesa matende avo muObothi.

¹¹ Vakabva Obothi, vakaemesa matende avo muIyeabharimu, mushango riri ngemberi kweMoabhi, ngokumabvazuva.

¹² Vakathutha kubva apo, vakaemesa matende avo muBani reZeredhi.

¹³ Vakathuthazve kubva apo, vakaemesa matende avo ngepamberi peArinoni mushango rinoganurirana nenyika yavaAmori; ngokuti Arinoni ndiwo mugano wevaMoabhi, pakati pevaMoabhi navaAmori.

¹⁴ Ndizvo zvinoronzwa muBhuku reHondo dzaMambo Mwari, “Dhorobha reWahebhi munharaunda yoSufa nemabani; rwizi Arinoni

¹⁵ nemidzaswa yemabani inodzaka metsa kudhorobha reAri kumugano weMoabhi.”

¹⁶ Kubvapo vakaenda Bheeri; icho ndicho chinyuka chaakaereketa ndicho Mambo Mwari kunaMosi echiti, “Unganidza pamwepo vanhu, neni ndinozovapa mvura.”

¹⁷ Zvino vaIsuraeri vakaemba urwu ruyo: “Nyuka, iwewe chinyuka! Emba kwechiri.

¹⁸ Chinyuka chakatsiwa ngevatungamiriri, icho vakuru vevanhu vakachitsa ngendonga youmambo, ngemidondoro yavo.” Vakabva mushango iro vakaenda Mathana.

¹⁹ Vakabva Mathana vakaenda Naharieri; vakabva Naharieri vakaenda Bhamothi.

²⁰ Vakabva Bhamothi mubani riri munyika yaMoabhi, vakakwira padera pePhisiga, uwo wakaringirana norubaya.

Kunyiswa KwaMambo Sihoni naMambo Ogi

²¹ Zvino vaIsuraeri vakatuma nhumwa kunaSihoni mambo wevaAmori vechiti,

²² “Nditendere kuti ndidarike ngomunyika yako; atizopaukiri muminda, nokuti muminda yemivhini; atizomwi mvura yezvinyuka: asi tinozohamba ngomuPato raMambo, metsa tadarika migano yako.”

²³ Asi Sihoni aazi kutendera vaIsuraeri kuti vadarike ngomunyika mwake. Sihoni wakaunganidza vanhu vake veshe pamwepo, wakabuda kuambana nevaIsuraeri mushango; naye wakaguma Jahazi, akaambana nevaIsuraeri.

²⁴ VaIsuraeri vakamubaya ngokupinza kweshoti, vakatora nyika yake kubvira Arinoni metsa kuguma Jabhoki, metsa kuguma kuvaAmori; ngokuti mugano wevaAmoni waiya wakagwinya.

²⁵ VaIsuraeri vakatora madhorobha eshe aya; vaIsuraeri vakagara mumadhorobha eshe evaAmori, muHeshibhoni nenharaunda yaro yeshe.

²⁶ Ngokuti Heshibhoni raiya dhorobha raSihoni mambo wevaAmoni, avo vakaambana namambo wepamberi wevaMoabhi, akatora nyika yake yeshe kubva kunyara dzake, metsa kuguma Arinoni.

²⁷ Ndizvo avo vanoereketa ngezvisana vanoti, “Uyai muHeshibhoni, ngariakwe; dhorobha raSihoni ngariakwe rinasirwe.

²⁸ Ngokuti muriro wakabuda kubva Heshibhoni, murazvu womuriro wakabva mudhorobha raSihoni. Rakamedza Ari dhorobha revaMoabhi, rakamedza mitunhu nevakuru vendau dzakakwirira dzaArinoni.

²⁹ Ihehe kwouri Moabhi! Iwewe waparadzwa, vanhu vaKhemoshi! Wakaita kuti vakororo vake vapepesheke nevanasikana vake vaite vasungwa, kunaSihoni mambo wevaAmori.

³⁰ Ndizvo mibarirwana yavo yakaparadzwa kubvira Heshibhoni metsa kuguma Dhibhoni, nesu takavaparadza metsa kuguma Nofa, metsa Medhebha.”

³¹ Ndizvo vaIsuraeri vakagara munyika yevaAmori.

³² Mosi wakatuma koonengera nyika yaJaza, vakatora maguta ayo, vakadzinga vaAmori vaigaramwo.

³³ Vakakunukuka, vakakwira ngenjira yeBhashani; Ogi mambo wevaBhashani wakabuda kuambana navo, iye navanhu vake veshe, koorwa paEdrei.

³⁴ Asi Mambo Mwari wakati kunaMosi, “Usamutya, ngokuti ndakamupa munyara dzako, navanhu vake veshe, nenyika yake yeshe; newe unozoita kwaari kudai ngezvewakaita kunaSihoni mambo wevaAmori, waitonga Heshibhoni.”

³⁵ Ndizvo vakamuuraya, nevakororo vake, nevanhu vake veshe, metsa pasisina noumwe wakasara echipona; vakagara nhaka yenyika yake.