Zvi. 20 - Bhaibheri Rakachena muChindau

Zvakaitika paKadheshi

¹ VaIsuraeri, mbungano yeshe, vakaguma mushango reZini ngomwedzi wokutanga, navanhu vakagara Kadheshi. Miriamu wakafa, wakatsirwapo.

² Zvino paiya pasina mvura yokumwa; ndizvo vakaungana pamwepo kuitira ndaa Mosi naAroni.

³ Vanhu vakaita hasha naMosi, vakaereketa kuti, “Isusu dai takafawo apo pakafa hama dzedu dzakafa pamberi paMambo Mwari!

⁴ Ngenyi mwakaunza mbungano yeshe yaMambo Mwari mushango muno kuti isusu nezvifuyo zvedu tifire muno?

⁵ Mwakatibudisirenyi kubva Egipite kutiunza mundau iyi yakashata? Aisiri ndau inomera mbeu, nokuti maonde, nokuti mavhini, nokuti maphomegranite; zve, akuna nemvura yokumwa.”

⁶ Zvino Mosi naAroni vakabva pamberi pembungano kuenda kumusiwo wetende romushongano, vakawa pashi ngehope dzavo, nouthende hwaMambo Mwari hwakaoneka kwavari.

⁷ Mambo Mwari wakaereketa kunaMosi echiti,

⁸ “Tora ndonga yako, uunganidze mbungano pamwepo, iwewe naAroni mukoma wako, uerekete kubuwe mukuona kwemadziso avo, naro rinozobudisa mvura yaro. Unozovabudisira mvura kubva kunebuwe; ngokudaro unozopa mvura yokumwa kunembungano yeshe nezvifuyo zvayo.”

⁹ Ndizvo Mosi wakatora ndonga kubva pamberi paMambo Mwari, kudai ngezvaakamupanga.

¹⁰ Mosi naAroni vakaunganidza mbungano yeshe pamwepo pamberi pebuwe; naye wakati kwavari, “Izwai zvino, imwimwi vamukiri; timubudisire mvura kubva kunebuwe iri here?”

¹¹ Zvino Mosi wakamirudza nyara yake, wakachaya buwe kairi ngendonga, nemvura yakabuda apo yakawanda kakurutu; mbungano yakamwa nezvifuyo zvavo.

¹² Asi Mambo Mwari wakaereketa kunaMosi naAroni echiti, “Ngokuti amuzi kundigonda, kuonisa kucheneswa kwangu mukuona kwevaIsuraeri, ndizvo amuzoigumisi iyi mbungano kunyika yendakapa kwavari.”

¹³ Iyi ndiyo mvura yeMeribha; ngokuti vaIsuraeri vakaita hasha apo naMambo Mwari, ngenjira yaakavaonisa ndiyo kuchena kwake.

Mambo weEdhomu Unorambira VaIsuraeri kuti Vasapinda ngomuNyika mwake

¹⁴ Mosi wakatuma nhumwa kubva Kadheshi kuenda kunamambo weEdhomu echiti, “Izvi ndizvo zvinoronza munun'una wako Isuraeri: iwewe unozia madambudziko eshe akatigumira;

¹⁵ ngenjira yaakadzaka ndiyo madzibaba edu munyika yeEgipite, nesu takagara mukuwo wakareba munyika yeEgipite, nevaEgipite vakatitambudza namadzibaba edu.

¹⁶ Naapo patakachema kunaMambo Mwari, wakazwa izwi redu, naye wakatuma ngirosi yake, akatibudisa kubva muEgipite; zvino, nesu tiri muKadheshi, dhorobha riri kumagumo emigano yako.

¹⁷ Zvino tenda, tinokupota, kuti tipinde ngomunyika yako. Atizohambi ngomuminda, nokuti ngomuminda yemivhini, zve, atizomwi mvura yezvinyuka; asi tinozohamba ngomupato ramambo, atizopaukiri kuenda kumudyo nokuti kumuoshwe, metsa tidarike migano yako.”

¹⁸ Asi Edhomu wakati kwaari, “Auzopindi ngomuno, kuti ndisazouya ndiambane newe ngeshoti.”

¹⁹ VaIsuraeri vakati kwaari, “Tinozohamba ngomupato; kudai isusu nokuti n'ombe dzedu techizomwa mvura yako, tinozoiripa. Chiro chidoko; titendere tidarike ngetsoka dzedu.”

²⁰ Asi wakati, “Nemwi amuzopindi.” NaEdhomu wakabuda kuambana navo, nevanhu vakawanda kakurutu nezvokurwa ndizvo zvakawanda.

²¹ Ngokudaro Edhomu wakaramba kutendera Isuraeri kuti adarike ngomunyika yake; ndizvo Isuraeri vakapauka kubva kwaari.

Kufa kwaAroni

²² VaIsuraeri, mbungano yeshe, vakabva Kadheshi vakaguma kumutunhu unozwi Hori.

²³ Zvino Mambo Mwari wakaereketa kunaMosi naAroni vari mumutunhu unozwi Hori, ngokumugano wenyika yeEdhomu, echiti,

²⁴ “Aroni unozounganidzwa kuvanhu vake; ngokuti aazopoteri munyika yendakapa vaIsuraeri, ngokuti imwimwi mwakamukira izwi rangu pamvura yeMeribha.

²⁵ Tora Aroni naEreaza mukororo wake, uvaunze padera pomutunhu unozwi Hori;

²⁶ ukumure zvokufuka zvaAroni, uzvipfekese mukororo wake Ereaza. Asi Aroni unozounganidzwa kunevanhu vake, unozofapo.”

²⁷ Mosi wakaita kudai ngezvaakapanga Mambo Mwari; navo vakakwira padera pomutunhu unozwi Hori mukuona kwembungano yeshe.

²⁸ Mosi wakakumura zvokufuka zvaAroni, wakazvipfekesa Ereaza mukororo wake; naAroni wakafa apo padera pomutunhu. Mosi naEreaza vakadzaka kubva kumutunhu.

²⁹ Naapo mbungano yeshe yaiya yaona kuti Aroni waiya afa, mhatso yeshe yaIsuraeri yakachema Aroni mazuva makumi matatu.