Zvi. 2 - Bhaibheri Rakachena muChindau

Kurongwa kweMadzinza muKamba

¹ NaMambo Mwari wakaereketa kunaMosi naAroni echiti,

² “Vanhu vaIsuraeri vanozoemesa matende avo umwe ngaumwe pasinde pechioniso chekwake, panechioniso chemhatso yababa ake; vanozoemesa matende avo akaringisana netende romushongano kumarutii eshe akaritaraukira.”

³ Avo vanozoemesa matende avo ngokumabvazuva nokunobudazuva, vanozoita vechioniso chekamba raJudha ngezvikwata zvavo. Nashoni mukororo waAminadhabhi unozoita nduna yevana vaJudha.

⁴ Nechikwata chake chevakaerengwa vavo vaiya makumi manomwe namarongomuna emakumi emazana nemazana matanhatu (74,600).

⁵ Naavo vanozoemesa matende avo pasinde pavo idzinza raIsakha. NaNethaneri mukororo waZua unozoita nduna yevana vaIsakha.

⁶ Nechikwata chake chevakaerengwa vavo vaiya makumi mashanu namarongomuna emakumi emazana namazana marongomuna (54,400).

⁷ Naapo kwaiteera dzinza raZebhuruni. Eriabhi mukororo waHeroni unozoita nduna yevana vaZebhuruni.

⁸ Nechikwata chake chevakaerengwa vavo vaiya makumi mashanu namanomwe emakumi emazana namazana marongomuna (57,400).

⁹ Veshe avo vakaerengwa mukamba raJudha vaiya zana nemakumi masere namatanhatu emakumi emazana namazana marongomuna (186,400) ngezvikwata zvavo. Ava ndivo vanozotanga kuhamba.

¹⁰ Ngorutii rwokubani kunozoapo chioniso chekamba yaRubheni, kudai ngezvikwata zvavo. Erizuri mukororo waShedheuri unozoita nduna yevana vaRubheni.

¹¹ Nechikwata chake chevakaerengwa vavo vaiya makumi marongomuna namatanhatu emakumi emazana namazana mashanu (46,500).

¹² Nedzinza raSimeoni ndiro rinozoteera kuemesa matende avo pasinde pake. Sherumieri mukororo waZurishadhai unozoita nduna yevana vaSimeoni.

¹³ Nechikwata chake chevakaerengwa vavo vaiya makumi mashanu namapfumbamwe emakumi emazana namazana matatu (59,300).

¹⁴ Naapo panozoteera dzinza raGadhi. Eriasafi mukororo waDheueri unozoita nduna yevakororo vaGadhi.

¹⁵ Nechikwata chake chevakaerengwa vavo vaiya makumi marongomuna namashanu emakumi emazana namazana matanhatu namakumi mashanu (45,650).

¹⁶ Veshe avo vakaerengwa mukamba raRubheni vaiya zana namakumi mashanu narimwe emakumi emazana namazana marongomuna namakumi mashanu (151,450), kudai ngezvikwata zvavo. Naava ndivo vechipiri vanozoteera kuhamba.

¹⁷ Naapo tende romushongano roothuthiswa kuenda pamwepo nekamba yevaRevhi, iri pakati pemakamba; vanozohamba kudai ngezvevakaemesa matende avo, munhu weshe ari pandau yake pachioniso chekwake.

¹⁸ Ngokumabirirazuva kunozoapo chioniso chekamba yaEfuremu kudai ngezvikwata zvavo. Erishama mukororo waAmihudhi ndiye unozoita nduna yevakororo vaEfuremu.

¹⁹ Nechikwata chake chevakaerengwa vavo vaiya makumi marongomuna emakumi emazana namazana mashanu (40,500).

²⁰ Vanomuteera idzinza raManase. Gamarieri mukororo waPhedhazuri ndiye unozoita nduna yevakororo vaManase.

²¹ Nechikwata chake chevakaerengwa vavo vaiya makumi matatu nemairi emakumi emazana namazana mairi (32,200).

²² Zvino panoteera dzinza raBhenjamini. Abhidhani mukororo waGidheoni ndiye unozoita nduna yevakororo vaBhenjamini.

²³ Nechikwata chake chevakaerengwa vavo vaiya makumi matatu namashanu emakumi emazana namazana marongomuna (35,400).

²⁴ Veshe avo vakaerengwa mukamba yaEfuremu ngezvikwata zvavo vaiya zana nemasere emakumi emazana nezana rimwe (108,100). Ndivo vechitatu vanozoteera kuhamba.

²⁵ Nechioniso chekamba yaDhani chinozoa ngedera nezvikwata zvavo. Ahieza mukororo waAmishadhai unozoita nduna yevakororo vaDhani.

²⁶ Nechikwata chake chevakaerengwa vavo vaiya makumi matanhatu namairi emakumi emazana namazana manomwe (62,700).

²⁷ Nedzinza raAsha ndiro rinozomuteera. Phagieri mukororo waOkrani unozoita nduna yevakororo vaAsha.

²⁸ Nechikwata chake chevakaerengwa vavo vaiya makumi marongomuna narimwe emakumi emazana nemazana mashanu (41,500).

²⁹ Zvino panoteera dzinza raNafitari. Ahira mukororo waEnani ndiye unozoita nduna yevakororo vaNafitari.

³⁰ Nechikwata chake chevakaerengwa vavo vaiya makumi mashanu namatatu emakumi emazana namazana marongomuna (53,400).

³¹ Naavo vakaerengwa veshe vekamba yaDhani vaiya zana nemakumi mashanu namanomwe emakumi emazana nemazana matanhatu (157,600). Ava ndivo vanozohamba pakugumisira ngezvikwata zvavo.

³² Ava ndivo vakaerengwa vevana vaIsuraeri kudai ngemhatso dzemadzibaba avo; veshe avo vakaerengwa mumakamba muzvikwata zvavo vaiya mazana matanhatu namatatu emakumi emazana nemazana mashanu namakumi mashanu (603,550).

³³ Asi vaRevhi avazi kuerengerwa pakati pevana vaIsuraeri, kudai ngokuronza kwaMambo Mwari kunaMosi.

³⁴ Nevana vaIsuraeri vakaita zveshe kudai ngezvaakapanga Mambo Mwari kunaMosi; ndizvo vakaemesa matende avo pazvioniso zvavo, ndizvo vakaenda mberi, munhu weshe kudai ngokuteererana kwemhuri yake nokudai ngemhatso yemadzibaba avo.