Zvi. 19 - Bhaibheri Rakachena muChindau

Madota eN'ombe Shava

¹ Mambo Mwari wakaereketa kunaMosi naAroni echiti,

² “Uku ndikwo kuemeswa kwechironzo chaakapanga Mambo Mwari echiti, ‘Ronzera vaIsuraeri, kuti vakuunzire tsiru shava risina kuremara nokuti mukovha, risikazi kumbosungwa pajoka.

³ Unozoripa kunaEreaza mupristi, kuti ariunze ngokubanze kwekamba, unozoriuraya mukuona kwake.

⁴ Ereaza mupristi unozonomhora yengazi yaro ngechinwe chake, nokufafazira pamberi petende romushongano kanomwe.

⁵ Zvino tsiru rinozopishwa mukuona kwake; doo raro nenyama yaro, nengazi yaro, nemadisa aro, unozozvipisha.

⁶ Mupristi unozotora muti womusidare, nehisopi, zviro zvakatsvuka, nokuzvikandira mumuriro apo panopishwa tsiru.

⁷ Zvino mupristi unozosuka machira ake, unozoshamba muiri wake ngemvura, ngesure kweizvo unozouya kupotera mukamba, asi mupristi unozoita wakasvipiswa metsa madeekoni.

⁸ Nouwo unopisha tsiru unozosuka machira ake ngemvura, nokushamba muiri wake ngemvura, nayewo unozoita wakasvipiswa metsa madeekoni.

⁹ Zvino munhu umweni wakasukika unozoorera marota etsiru, aaunganidze ngokubanze kwekamba, pandau yakachena, anozongwaririrwa mbungano yevaIsuraeri okunasira mvura yokushamba, yokucheneswa kwokushaisha.

¹⁰ Nouwo wakaorera marota etsiru unozosuka machira ake, nokuita usikazi kusukika metsa madeekoni. Ichi chinozoita chiemeso chemhera nariini kuvaIsuraeri, nokumupara unogara pakati pavo.’

Kugwama Muiri Wakafa

¹¹ “Uwo unozogwama muiri womunhu wakafa kunyazwi ngouri, unozoita wakasvipiswa mazuva manomwe.

¹² Vanozodzichenesa pachavo ngemvura ngezuva rechitatu, ngezuva rechinomwe vanozoita vakasukika; asi kudai vasikazodzichenesi pachavo ngezuva rechitatu, ngezuva rechinomwe avazoiti vakasukika.

¹³ Veshe vanozogwama muiri wakafa, muiri womunhu wafa, vasikadzichenesi pachavo, vanosvipisa thabhenakeri raMambo Mwari; vanhu vakadaro vanozobviswa kubva pakati pevaIsuraeri. Ngokuti mvura yokucheneswa aizi kufafazirwa padera pavo, vanozoita vasikazi kusukika; nokusvipiswa kwavo kundori padera pako.

¹⁴ “Ichi ndicho chironzo apo munhu echizofa mutende: veshe avo vanopotera mutende nevarimwo veshe vanozoita vakasvipiswa mazuva manomwe.

¹⁵ Nechidziyo cheshe chakaduhumurwa chisina chidumhaidzo padera pacho chinozoita chakasvipiswa.

¹⁶ Kunyazwi ndiani unozogwama wakafa wakaurawa ngeshoti kundau yokubanze, nokuti muiri wakafa wega, nokuti godo romunhu, nokuti iba, unozoita wakasvipiswa mazuva manomwe.

¹⁷ Kunomunhu wakasvipiswa vanozotora marota etsiru rakapishwa kuita kucheneswa kwokushaisha, nemvura inoerera inozoiswa nayo muchidziyo.

¹⁸ Nomunhu wakasukika unozotora hisopi nokuimvota mumvura aifafazire padera petende nepadera pezvidziyo zveshe, nepadera pevanhu vaiyapo, kunyazwi ndiani wakagwama godo, wakaurawa, muiri wakafa nokuti wakagwama iba.

¹⁹ Zvino munhu wakasukika unozoifafazira padera peavo vakasvipiswa ngezuva rechitatu, nezuva rechinomwe unozovachenesa. Zvino vanozosuka machira avo, nokushamba miiri yavo mumvura, navo vanozoita vakasukika madeekoni.

²⁰ Vanhu veshe vakasvipiswa, asi vasikadzichenesi pachavo, vanhu avo vanozobviswa kubva pakati pembungano, ngokuti vakasvipisa ndau yakachena yaMambo Mwari. Ngokuti mvura yokuchenesa aizi kufafazirwa padera pavo, vakasvipiswa.

²¹ “Chinozoita chiemeso kwavari mhera nariini. Uwo unofafazira mvura yokuchenesa unozoshamba machira ake; kunyazwi ndiani unogwama mvura yokuchenesa unozoita wakasvipiswa metsa madeekoni.

²² Kunyazwi ngechiri chaanozogwama uwo wakasvipiswa chinozoita chakasvipiswa; kunyazwi ngouri unozogwama icho chiro unozoita wakasvipiswa metsa madeekoni.”