Zvi. 18 - Bhaibheri Rakachena muChindau

Mishando yeVapristi neVaRevhi

¹ Ndizvo Mambo Mwari wakati kunaAroni, “Iwewe nevakororo vako nemhatso yababa ako pamwepo newe, munozotwara kushata kwendau yakachena; iwewe nevakororo vako munozotwara kushata kwoupristi hwenyu.

² Newe unozounzawo hama dzako dzedzinza raRevhi, dzinza rababa ako, kuti vabatanidzwe newe nokukushandira, apo iwewe nevakororo vako munozoshandira pamberi petende rechapupu.

³ Vanozoita mishando yako nemishando yeshe yetende. Asi avazokwedzeri kuzvidziyo zvendau yakachena nokuarita, kuti ivo nokuti imwimwiwo musazofa.

⁴ Vakabatanidzwa newe, kuti vaite mishando yetende romushongano, kuita mishando yeshe yetende romushongano; apana mupara unozokwedzera kwomuri.

⁵ Iwewe pachako unozoita mishando yendau yakachena nearita, kuti kusachazoapozve ushungu padera pevaIsuraeri.

⁶ Ndini uwo unotora hama dzenyu vaRevhi kubva pakati pevaIsuraeri; zvino vaavenyu kudai ngechipo chakapirwa kunaMambo Mwari, kuti vaite mishando yetende romushongano.

⁷ Asi iwewe pamwepo nevakororo vako munozonasa kuita mushando woupristi, wezviro zveshe zvearita, nendau iri sure kwejira; ndakamupa mushando wenyu woupristi kuita chipo; nomupara unozokwedzera unozourawa.”

Chikoaniswa cheVapristi

⁸ Mambo Mwari wakaereketa kunaAroni echiti, “Ndakupa mushando wemidiro inopirwa kwendiri, zvipo zveshe zvakachena zvevaIsuraeri; ndakazvipa kwouri nokuvakororo vako, kuita chikoaniswa choupristi chewakaemeserwa mhera nariini.

⁹ Izvi zvinozoita zvako kubva mukati mwezviro zvakachenesesa, izvo zvakangwarirwa kubva kumuriro: mudiro wavo weshe uwo wevanounza kuita mudiro kwendiri, kudai ngechiro chakapindisisa kuchena, kunyazwi mudiro wezviyo, mudiro wokushaisha nokuti mudiro wokupauka, zvinozoita zvako nevakororo vako.

¹⁰ Kudai ngechiro chakapindisisa kuchena munozozvidya: mwamuna weshe unozozvidya. Zvinozoita zvakachenesesa kwouri.

¹¹ Izviwo ngezvako: ndazvipa kwouri pamwepo nevakororo vako nevanasikana vako, kuita chiemeso chemhera nariini, kunyazwi ngechiri chakaemeserwa parutii kubva kuzvipo zveshe zvomudiro wokuzunguzwa wevaIsuraeri; munhu weshe wakasukika wemhatso yako unozozvidya.

¹² Zveshe mafuta akanaka, nevhini reshe rakanaka, nekoroni yeshe yakanaka, mitanguro yemichero yayo yeizvo zvevanozopa kunaMambo Mwari, ndazvipa kwouri.

¹³ Mitanguro yemichero yeshe yomunyika yavo, iyo yevanozounza kunaMambo Mwari inozoita yako; munhu weshe wakasukika wemhatso yako unozozvidya.

¹⁴ Zviro zveshe zvakapirwa ngokwakaperera muIsuraeri zvinozoita zvako.

¹⁵ Zviro zveshe zvinotanga kubeura ndani yevanhu neyemhuka, zvevanozounza kunaMambo Mwari, zvinozoita zvako; asi dangwe revanhu munozoriripira, neyokutangura yezvifuyo zvisikazi kusukika munozozviripira.

¹⁶ Mutengo wokuripira munozozviripira kubvira zvaane mwedzi umwe wokubarwa kwazvo, kudai ngokuerenga kwako, ngezvigurwa zvesirivha zvishanu, kudai ngechipimo chaishandiswa mundau yakachena, (riri magera makumi mairi).

¹⁷ Asi dangwe ren'ombe, nokuti regwai, nokuti rembudzi, amuzoaripiri; akachena. Unozofafazira ngazi yadzo padera pearita, nokupisha mafuta adzo kuita mudiro unoitwa ngomuriro, kuita gwema rakanaka kunaMambo Mwari.

¹⁸ Asi nyama yadzo inozoita yako, kudai ngechifuba chakazunguzwa nebandauko rokumudyo zviri zvako.

¹⁹ Midiro yeshe yakachena, yevanopa vaIsuraeri kunaMambo Mwari, ndapa kwouri, pamwepo nevakororo vako nevanasikana vako, kuita chiemeso chemhera nariini; chitenderano chomunyu pamberi paMambo Mwari kwouri nokumibarirwana yako newe mhera nariini.”

²⁰ Zvino Mambo Mwari wakaereketa kunaAroni echiti, “Iwewe auzoane nhaka munyika yavo, zve, auzoane chikoaniswa pakati pavo; inini ndini chikoaniswa chako nenhaka yako pakati pevaIsuraeri.

Chikoaniswa cheVaRevhi

²¹ “KuvaRevhi ndakapa zveshe zvechegumi muIsuraeri kuita nhaka yavo, ngendaa yomushando wavo wevanoshanda mutende romushongano.

²² Kubvira zvinopano kuenda mberi vaIsuraeri vasazokwedzera pasinde petende romushongano, kuti vasazoa nokushaisha, vafe.

²³ Asi vaRevhi vanozoita mushando wetende romushongano, vanozotwara kushata kwavo; chinozoita chiemeso chemhera nariini kumibarirwana yenyu. Asi pakati pevaIsuraeri vasazoa nenhaka,

²⁴ ngendaa yokuti ndakapa vaRevhi kuita nhaka yavo zvegumi zvevaIsuraeri, zvevanopa kuita mudiro kunaMambo Mwari. Ndizvo ndakati kwavari, ‘Avazoa nenhaka pakati pevaIsuraeri.’ ”

Chegumi cheVaRevhi

²⁵ Zvino Mambo Mwari wakaereketa kunaMosi echiti,

²⁶ “Unozoereketa kuvaRevhi, wechiti kwavari, ‘Apo mwechiashira kubva kuvaIsuraeri zvechegumi izvo zvendinomupa kubva pakati pavo kuita nhaka yenyu, munozopa kuita mudiro kunaMambo Mwari chegumi chezvegumi.

²⁷ Chinozoerengwa kwouri kuita chipo chako, kudai ngezviyo zvembuwa nokudai ngezvinozarisa ndau yokukamurira vhini.

²⁸ Ngokudaro munozopa mudiro kunaMambo Mwari kwezviri zveshe zvechegumi zvenyu zvomunoashira kubva kuvaIsuraeri; nemwi munozopa kubva kwezviri kunaAroni mupristi kuita mudiro waMambo Mwari.

²⁹ Kubva kuzvipo zvenyu zveshe munozopa midiro yeshe yakaemeserwa Mambo Mwari, yeyakapinda kunaka yayo yeshe, urwo rupande ndirwo ruchazocheneswa.’

³⁰ Ndizvo unozotizve kwavari, ‘Apo mwaemesa rupande urwo rwakapinda kunaka, naapo inozoerengwa kunevaRevhi kudai ngezvinobuda pandau yembuwa yokupurira, nokudai ngezvinobuda pandau yokukamurira vhini.

³¹ Nemwi munozozvidya kundau dzeshe, imwimwi nemhuri dzenyu; ngokuti zviri mutuso wenyu womushando wenyu wetende romushongano.

³² Nemwi amuzoa nokushaisha ngendaa yazvo, apo mwakapira zvezvakapinda kunaka zvazvo. Asi musazosvipisa zvipo zvakachena zvevaIsuraeri, kuti musazofa.’ ”