Zvi. 17 - Bhaibheri Rakachena muChindau

Ndonga yaAroni

¹ Mambo Mwari wakaereketa kunaMosi echiti,

² “Ereketa kuvaIsuraeri, utore kubva kunoumwe ngaumwe wavo ndonga, kudai ngokuteererana kwemhatso dzemadzibaba avo, kubva kuvatungamiriri vavo veshe kudai ngokuteererana kwemhatso dzemadzibaba avo, ndonga gumi nambiri. Nyora zina romunhu umwe ngaumwe pandonga yake.

³ Nyora zina raAroni pandonga yaRevhi, ngokuti ndonga imwe inozoemera soro remhatso yemadzibaba avo.

⁴ Zvino unozodziunganidza mutende romushongano pamberi pebhokisi rechitenderano, pendinoshongana newe.

⁵ Nendonga yomunhu wendinozotsanangura, inozobuda mashakani; ndinozoita kuti kupere kwendiri kuvhuruvhuta kwevaIsuraeri, kwevanoramba vechivhuruvhutira kwouri ndikwo.”

⁶ Mosi wakaereketa kuvaIsuraeri, nevatungamiriri vavo veshe vakamupa ndonga, mutungamiriri umwe ngaumwe ndonga imwe, kudai ngokuteererana kwemhatso dzemadzibaba avo, ndonga gumi nambiri, nendonga yaAroni yaiya pakati pendonga dzavo.

⁷ Ndizvo Mosi wakaisa ndonga idzo pamberi paMambo Mwari mukati mwetende rechapupu.

⁸ Naapo nechimangwani Mosi wakapotera mutende rechapupu; ringira, ndonga yaAroni yemhatso yaRevhi yaiya yabuda mashakani, ikaita matai, ikabuda maruva, ikabereka maonde akaibva.

⁹ Zvino Mosi wakabudisa ndonga dzeshe kubva pamberi paMambo Mwari, akadziisa kuvaIsuraeri; navo vakaringira, munhu weshe wakatora ndonga yake.

¹⁰ NaMambo Mwari wakati kunaMosi, “Petudza ndonga yaAroni pamberi pebhokisi rechapupu kuti ingwarirwe kuita chioniso kuvamukiri, kuti zviite magumo okuvhuruvhuta kwavo kwendiri, kuti vasazofa.”

¹¹ Mosi wakaita kudaro; kudai ngezvaakamupanga Mambo Mwari, ndizvo wakaita kudaro.

¹² VaIsuraeri vakaereketa kunaMosi vechiti, “Ringira, toofa, topera, teshe topera!

¹³ Munhu weshe unokwedzera pasinde pethabhenakeri raMambo Mwari unozofa. Tinozopera teshe here?”