Zvi. 16 - Bhaibheri Rakachena muChindau

Kumukira kwaKhora, Dhathani naAbhiramu

¹ Zvino Khora mukororo waIzihari, mukororo waKohathi, mukororo waRevhi, naDhathani naAbhiramu vakororo vaEriabhi, naOni, mukororo waPherethi, vakororo vaRubheni, vakaunganidza vamuna.

² Vakamukira Mosi, pamwepo nevakatikuti vevana vaIsuraeri, mazana mairi nemakumi mashanu (250) evatungamiriri vanembiri vakatsanangurwa kubva mumbungano.

³ Navo vakadziunganidza pamwepo kumukira Mosi naAroni, vakati kwavari, “Mwanyanya! Mwechiona kuti mbungano yeshe yakachena, munhu weshe wayo, naMambo Mwari uri pakati pavo. Ngenyi mwechidzikudza kudaro, padera pembungano yaMambo Mwari?”

⁴ Naapo Mosi azvizwa izvi, wakawa ngehope yake;

⁵ zvino wakaereketa kunaKhora nokunembungano yake yeshe echiti, “Mangwanani Mambo Mwari unozopangidzira kuti ngavari vake, nokuti ndiani wakachena; unozoita kuti akwedzere pasinde pake; uwo waanozotsanangura, iye unozoita kuti akwedzere kwaari.

⁶ Itai ichi: torai imwimwi zvidziyo zvokupishira mutombo unegwema rakanaka, iwewe Khora nechikwata chako cheshe;

⁷ muise muriro mukati mwazvo, muise mutombo unegwema rakanaka mukati mwazvo mangwani pamberi paMambo Mwari; kunozoitika kuti uwo waanozotsanangura Mambo Mwari, ndiye unozoita wakachena. Imwimwi mwanyanya, vakororo vaRevhi!”

⁸ NaMosi wakati kunaKhora, “Izwai, ndinomupota, imwimwi vakororo vaRevhi.

⁹ Ichi chiro chakanyanya kutsonga here kuti Mwari waIsuraeri wakamuparadzanisa kubva pakati pembungano yaIsuraeri, kumuunza pasinde pake kuti muite mushando muthabhenakeri raMambo Mwari, nokuema pamberi pembungano kuvashandira;

¹⁰ naye wakamukwedzedza pasinde pake, nehama dzenyu dzeshe vakororo vaRevhi nemwi? Mwotsvakawo noupristi here?

¹¹ Ndizvo ndiMambo Mwari wewamukira iwewe nechikwata chako cheshe; Aroni ndiani womunovhuruvhutira?”

¹² NaMosi wakadaidza Dhathani naAbhiramu vakororo vaEriabhi; asi vakati, “Atikwireyo isusu.

¹³ Chiro chidodoko here kuti iwewe wakatibvisa kubva munyika inoerera mukaka nouchi, kuti utiuraye mushango muno, kwega kuti waakudziita muzvare padera pedu?

¹⁴ Zve, auzi kutiunza kunyika inoerera mukaka nouchi, nokuti kutipa nhaka yeminda neminda yemivhini. Unozotumbura madziso eava vanhu here? Isusu atizokwiriyo.”

¹⁵ NaMosi wakanyangadzwa kakurutu, wakati kunaMambo Mwari, “Usaremeredza midiro yavo. Andizi kutongotora mbongoro imwe yavo, zve, andina wendakakuvadza wavo.”

¹⁶ NaMosi wakati kunaKhora, “Iwewe unozoapo nechikwata chako pamberi paMambo Mwari, iwewe, navo naAroni mangwani.

¹⁷ Mutore umwe ngaumwe chidziyo chake chokupishira mutombo unegwema rakanaka, muise mutombo mukati mwazvo, muunze munhu weshe chidziyo chake pamberi paMambo Mwari, zvidziyo zvokupishira mutombo mazana mairi nemakumi mashanu (250); iwewe naAroni munhu weshe ane chidziyo chake.”

¹⁸ Ndizvo munhu weshe wakatora chidziyo chake, wakaisa muriro mukati mwacho, wakaisamwo mutombo unegwema rakanaka umwo, wakaema pamusiwo wetende romushongano pamwepo naMosi naAroni.

¹⁹ Zvino Khora wakaunganidza chikwata cheshe kuita maringwa navo pamusiwo wetende romushongano; nouthende hwaMambo Mwari hwakaoneka kunembungano yeshe.

²⁰ NaMambo Mwari wakaereketa kunaMosi naAroni echiti,

²¹ “Dziparadzanisenyi kubva pakati peichi chikwata, kuti ndivapedze chiriporipo.”

²² Navo vakawa pashi ngehope dzavo vechiti, “A Mwari, Mwari womweya nenyama yeshe, ngokushaisha kwomunhu umwe unozotsenekera mbungano yeshe here?”

²³ NaMambo Mwari wakaereketa kunaMosi echiti,

²⁴ “Ereketa kunombungano wechiti, ‘Budai kubva pakati petende raKhora, Dhathani, neraAbhiramu.’ ”

²⁵ Zvino Mosi wakamiruka akaenda kunaDhathani naAbhiramu; nevakuru vaIsuraeri vakamuteera.

²⁶ Naye wakaereketa kunombungano echiti, “Ibvai, ndinomupota, mukati mwematende eava vanhu vakashata, musagwama chiro nachimwe chavo, kuti musazopedzwa muzvishaishi zvavo zveshe.”

²⁷ Ndizvo vakabva mutende raKhora, Dhathani, neraAbhiramu kumarutii eshe; Dhathani naAbhiramu vakabuda, vakaema pamwepo pamisiwo yematende avo, vakadzi vavo, vakororo vavo nevadoko vavo.

²⁸ NaMosi wakati, “Ngeizvi munozozia kuti Mambo Mwari wakandituma kuti ndiite mishando iyi yeshe; ngokuti andizi kuzviita ngokupinimidza kwangu.

²⁹ Kudai avo vanhu vechifa ngokufa kunofa ndikwo vanhu veshe, nokuti vechihambirwa ukwo kunohambira vanhu veshe, Mambo Mwari aazi kundituma.

³⁰ Asi kudai Mambo Mwari echiita chiro chitsva, nevhu rechibeura muromo waro nokuvamedza, nazvo zveshe izvo zviri zvavo, navo vechidzaka murindi vechipona; naapo munozozia kuti ava vanhu vakashoora Mambo Mwari.”

³¹ Kwakaitika apo apedza kuereketa mazwi aya eshe kuti ivhu iro raiya pashi pavo rakabeuka.

³² Nevhu rakabeura muromo waro, rakavamedza, nematende avo, nevanhu veshe vaKhora, nezviro zvavo zveshe.

³³ Ndizvo ivo nezviro zvavo zveshe, vakadzaka murindi vechipona, nevhu rakasetera padera pavo; vakafa kubva pakati pembungano.

³⁴ NevaIsuraeri veshe vaiya vakavatendenedza vakatiza ngokuzwa kuchema kwavo; ngokuti vakati, “Pamweni ivhu rinozotimedzawo!”

³⁵ Kwakabuda muriro wakabva kunaMambo Mwari, wakapedza kuuraya vamuna vaiya mazana mairi nemakumi mashanu (250) vakapisha mutombo unegwema rakanaka.

Zviwenda zvoMuriro

³⁶ Zvino Mambo Mwari wakaereketa kunaMosi echiti,

³⁷ “Ronzera Ereaza mukororo waAroni mupristi, kuti atore zvidziyo zvokupishira mutombo kubva mumuriro uwo, newe uparadze muriro apo naapo; ngokuti zviri zvakachena.

³⁸ Zvidziyo zvokupishira mutombo zveava vanhu vashaisha varashikirwa ngokupona kwavo, ngavazvipfure kuita marusamba akapamhama kuita chifukidziro chearita, ngokuti vakazvipira pamberi paMambo Mwari, ndizvo zvakachena. Ndizvo zvinoita chioniso kuvana vaIsuraeri.”

³⁹ Ndizvo Ereaza mupristi wakatora zvidziyo zvokupishira mutombo zvethusi, zvevakapishira ndizvo avo vakapishwa; zvakaitwa marusamba akapamhama kuita chifukidziro chearita,

⁴⁰ kuita chicherechedziso kuvana vaIsuraeri, kuitira kusaapo noumwe usiri mupristi, usiri wedzinza raAroni ungakwedzera kupisha mutombo unegwema rakanaka pamberi paMambo Mwari, kuti asazodai ndiKhora nechikwata chake, kudai ngezvaakaronza Mambo Mwari kuna Ereaza kubudikidza ndiMosi.

Aroni Unoponesa Vanhu

⁴¹ Asi nechimangwani mbungano yeshe yevana vaIsuraeri vakavhuruvhutira Mosi naAroni vechiti, “Imwimwi mwakauraya vanhu vaMambo Mwari.”

⁴² Naapo mbungano yaungana kumukira Mosi naAroni, vakatenderukira kutende romushongano; penya, gore rakarifukidza, nouthende hwaMambo Mwari hwakaoneka.

⁴³ Mosi naAroni vakauya pamberi petende romushongano,

⁴⁴ naMambo Mwari wakaereketa kunaMosi echiti,

⁴⁵ “Budai kubva pakati peiyi mbungano, kuti ndivapedze chiriporipo.” Navo vakawa pashi ngehope dzavo.

⁴⁶ NaMosi wakati kunaAroni, “Tora chidziyo chokupishira mutombo, uise muriro mukati mwacho kubva paarita, uisemwo mutombo unegwema rakanaka, uende ngokukasira kumbungano, uvaitire muripo; ngokuti ushungu hwaMambo Mwari hwabudira kwavari; nhenda yauya.”

⁴⁷ Ndizvo Aroni wakachitora kudai ngezvaakapanga Mosi, wakarumba achienda pakati pembungano; penya, nhenda yaiya yaamba pakati pevanhu; naye wakaisa mutombo unegwema rakanaka, wakaitira vanhu muripo.

⁴⁸ Wakaema pakati pevakafa nevachapona; nenhenda yakaemeswa.

⁴⁹ Zvino avo vakaurawa ngenhenda vaiya gumi namarongomuna emakumi emazana nemazana manomwe (14,700), ngepabanze peavo vakafa ngendaa yaKhora.

⁵⁰ NaAroni wakahwirira kunaMosi pamusiwo wetende romushongano, apo nhenda yakaemeswa.