Zvi. 15 - Bhaibheri Rakachena muChindau

Mipango ngendaa yeMidiro

¹ Mambo Mwari wakaereketa kunaMosi echiti,

² “Ereketa kunevana vaIsuraeri wechiti kwavari, ‘Naapo mwaguma kunyika iyo yougaro hwenyu, yendinozomupa,

³ nemwi mwechizoita mudiro wokupisha ngomuriro kunaMambo Mwari, kubva kun'ombe, nokuti makwai, nokuti mudiro wokupisha nokuti mubairo wokuripira mhiko, nokuti kupira ngomwoyo unotenda, nokuti mudiro wemadhiri, nokuita mudiro unegwema rakanaka kunaMambo Mwari,

⁴ naapo uwo unozopa mudiro wakadaro kunaMambo Mwari unozounzawo mudiro wezviyo worupande rwechegumi choufu hwakamotseka, hwakakumanidzwa norupande rwechirongomuna rweritha remafuta.

⁵ Norupande rwechirongomuna rweritha revhini kuita mudiro wokumwa, unozounasira pamwepo nomudiro wokupisha nokuti mudiro, kunegwai rimwe ngarimwe.

⁶ Nokuti kunegondohwe unozonasira kuita mudiro wezviyo marupande mairi echegumi ezvipimo zvoufu hwakamotseka, hwakakumanidzwa nemafuta orupande rwechitatu rweritha;

⁷ nokuita mudiro wokumwa unozopira rupande rwechitatu rweritha rwevhini, kuita gwema rakanaka kunaMambo Mwari.

⁸ Naapo unozonasirira mukono kuita mudiro wokupisha, nokuti kuita mudiro wokuripira mhiko, nokuti kuita mudiro wokunyarara kunaMambo Mwari,

⁹ Zvino unozounza pamwepo nomukono mudiro wezviyo wechegumi choufu hwakamotseka zvipimo zvitatu, hwakakumanidzwa norupande rweritha rwemafuta.

¹⁰ Unozounza kuita mudiro wokumwa rupande rweritha rwevhini, kuita mudiro unoitwa ngomuriro kuti uite gwema rakanaka kunaMambo Mwari.’

¹¹ “Ndizvo zvinozoitwa kumukono umwe, nokuti kugondohwe rimwe, nokuti kagondohwe kamwe, nokuti chimbudzana chimwe.

¹² Kudai ngouwandu hwomunozonasira, ngokudaro munozoita kunaimwe ngaimwe, kudai ngouwandu hwadzo.

¹³ Veshe vakabarwa venyika iyo vanozoita izvi zviro kudai ngenjira yazvo, mukupira mudiro unoitwa ngomuriro, kuita gwema rakanaka kunaMambo Mwari.

¹⁴ Nokudai mupara echigara nemwi, kunyazwi ndiani uri pakati penyu mumibarirwana yenyu, echizoda kupira mudiro unoitwa ngomuriro, kuita gwema rakanaka kunaMambo Mwari, unozoita kudai ngezvomunoita imwimwi.

¹⁵ Ngokuti mbungano, painozoita chironzo chimwe kwomuri nokumupara unogara pakati penyu, ndichozve nokwaari mupara, chironzo chemhera nariini; kudai ngezvemuri, ndizvo zvinozoitawo mupara pamberi paMambo Mwari.

¹⁶ Chironzo chimwe nenjira imwe zviri kwomuri nokunouwozve uri mupara unogara pakati penyu.”

¹⁷ NaMambo Mwari wakaereketa kunaMosi echiti,

¹⁸ “Ereketa kunevana vaIsuraeri wechiti kwevari, ‘Naapo mwaguma kunyika yendinozomuisa,

¹⁹ naapo mwoodya kudya kwenyika iyo, munozopira mudiro wokumirudzwa pamberi paMambo Mwari.

²⁰ Munozopira chingwa chimwe chemitanguro youfu hwenyu kuita mudiro wokumirudzwa; kudai ngezvomunopira mudiro wepambuwa, ngokudaro munozoupira.

²¹ Mitanguro youfu hwenyu munozoipira kunaMambo Mwari kuita mudiro wokumirudzwa kumibarirwana yenyu.’

²² “Asi kudai mwechipauka kuneizvi asiri maone, musikangwariri mipango iyi yeshe, yaakaereketa Mambo Mwari kunaMosi,

²³ zveshe zvaakamupanga Mambo Mwari ndiMosi, kubvira ngeiro zuva raakapa mupango ndiro Mambo Mwari, nokuenda mberi pakati pemibarirwana yenyu,

²⁴ zvino, kudai chiro chechizoitwa ngokusikazia, ngokubanze chisikaziikanwi kumbungano, mbungano yeshe inozopira mukono umwe kuita mudiro wokupisha, kuita gwema rakanaka kunaMambo Mwari, pamwepo nomudiro wezviyo, nomudiro wokumwa, kudai ngenjira yakaemeswa, gotokoto rimwe rokuita mudiro wokushaisha.

²⁵ Nomupristi unozoita muripo wembungano yeshe yevana vaIsuraeri, navo vanozorekererwa; ngokuti chaiya chishaishi chokusikazia; navo vaunza mudiro wavo womuriro kunaMambo Mwari, nomudiro wavo wokushaisha pamberi paMambo Mwari.

²⁶ Mbungano yeshe inozorekererwa yevana vaIsuraeri, nevapara vanogara pakati pavo; ngokuti vanhu veshe vaiya vakashaisha mukusikazia.

²⁷ “Kudai munhu echizoshaisha ngokusikazia, unozounza thokazi rembudzi regore rimwe kuita mudiro wokushaisha.

²⁸ Nomupristi unozoitira uwo munhu muripo pamberi paMambo Mwari wokushaisha ngokusikazia, apo akashaisha ngokusikazia, kumuitira muripo, naye unozorekererwa.

²⁹ Unozoa nechironzo chimwe kunouwo unoshaisha ngokusikazia, kwaari weshe unobarwa pakati pevana vaIsuraeri, nokuti mupara uri chigarandimo pakati pavo.

³⁰ Asi munhu uwo unoshaisha ngokuda, kunyazwi wakabarwa munyika yenyu nokuti mupara, munhu uwo unotuka Mambo Mwari; munhuwo unozoduswa kubva pakati pevanhu vake.

³¹ Ngokuti wakashoora izwi raMambo Mwari, naye wakagura mupango wake, uwo munhu unozourawa, nokushaisha kwake kunozoa padera pake.”

Munhu Wakagura Mupango weSabatha

³² Naapo vana vaIsuraeri vaiya mushango, vakaona munhu waitheza huni ngezuva reSabatha.

³³ Naavo vakaona waitheza huni vakamuunza kunaMosi naAroni, nokumbungano yeshe.

³⁴ Vakamukonyera mutirongo, ngokuti kwaiya kusati kwakaronzwa chingaitwa kwaari.

³⁵ Mambo Mwari wakati kunaMosi, “Ngegwinyiso uwo munhu unozourawa; mbungano yeshe inozomuponda ngemapuwe kubanze kwekamba.”

³⁶ Nembungano yeshe yakamubudisa kubanze kwekamba, vakamuponda ngemapuwe, naye wakafa, kudai ngezvaakapanga Mambo Mwari kunaMosi.

Chironzo ngendaa yeMahlanguyo

³⁷ Mambo Mwari wakaereketa kunaMosi echiti,

³⁸ “Ereketa kunevana vaIsuraeri, uvapange kuti vadziitire mahlanguyo kumipendero yezvokusimira zvavo kumibarirwana yavo yeshe, nokuti vaise padera pemahlanguyo emipendero yavo mutiisa wakasvipirika.

³⁹ Mune mahlanguyo okuti muaringire, nokukarakadza yeshe mipango yaMambo Mwari, muiite, kuti musapauka kuteera mwoyo yenyu nokuti madziso enyu, izvo zvemwairovedzera kuita umhombo nokuzviteera.

⁴⁰ Ndizvo mucherechedze muite mipango yangu yeshe, muite vakachena kunaMwari wenyu.

⁴¹ Inini ndini Mambo Mwari, Mwari wenyu, uwo wakamubudisa kubva munyika yeEgipite, kuti ndiite Mwari wenyu; inini ndini Mambo Mwari, Mwari wenyu.”