Zvi. 14 - Bhaibheri Rakachena muChindau

Vanhu Vanogunun'una

¹ Zvino mbungano yeshe yakamirudza izwi rayo, ikachema; nevanhu vakachema ngouhwo usiku.

² Nevana veshe vaIsuraeri vakagunun'unira Mosi naAroni; nembungano yeshe yakati kwavari, “Dai taiya takafira hedu munyika yeEgipite! Nokuti dai taiya takafira hedu mushango!

³ Ngenyi Mambo Mwari akatiunza kunyika iyi kuti tiurawe ngeshoti, vakadzi vedu nevana vedu vaite vakachakatwa? Akuzi kupinda kunaka here kuti tihwirire Egipite?”

⁴ Ndizvo vakati umwe kunoumweni, “Ngatitsanangure nduna, tihwirire Egipite.”

⁵ Zvino Mosi naAroni vakawa ngehope dzavo pashi pamberi pembungano yeshe yevana vaIsuraeri.

⁶ NaJoshua mukororo waNuni naKharebhu mukororo waJefune, avo vaiya pakati peavo vakaenda koonengera nyika, vakabaura zvokufuka zvavo,

⁷ navo vakaereketa kunembungano yeshe yevana vaIsuraeri vechiti, “Nyika yetakahamba ndiyo koonengera, inyika yakanaka kakurutu.

⁸ Kudai Mambo Mwari echidakara tisu, unozotipinza munyika iyi, nokuipa kwetiri, nyika inoerera mukaka nouchi.

⁹ Kwega musamukira Mambo Mwari, zve, musatya vanhu venyika; ngokuti vari chokudya kwetiri; kurwirwa kwavo kwabviswa kwavari, naMambo Mwari unesu; musavatya.”

¹⁰ Asi mbungano yeshe yakapanga kuti vapondwe ngemapuwe. Zvino uthende hwaMambo Mwari hwakaoneka mutende romushongano pamberi pevana vaIsuraeri.

Mosi Unokumbirira Vanhu

¹¹ NaMambo Mwari wakati kunaMosi, “Kunozoita mukuwo wakaitawani ava vanhu vechindishoora? Kunozoita mukuwo wakaitawani vasikandigondi, kunyazwi ndakaita zvioniso zveshe pakati pavo?

¹² Ndinozovaorora ngenhenda, ndiite kuti vasagara nhaka, ndinozoita ndiwe dzinza rakakura rinesimba kupinda ivo.”

¹³ Asi Mosi wakati kunaMambo Mwari, “Zvino vaEgipite vanozozwa ndizvo, ngokuti iwewe ndiwe wakakwidza vanhu ava ngesimba rako kubva pakati pavo,

¹⁴ navo vanozoronzera vagari veiyi nyika. Vakazwa kuti iwewe Mambo Mwari uri pakati peava vanhu; ngokuti iwewe Mambo Mwari wakaoneka hope kuhope, negore rako rinoema padera pavo, newe unohamba pamberi pavo, masikati ngemvumi yegore nousiku ngomurazvu womuriro.

¹⁵ Zvino kudai wechizouraya ava vanhu panguva imwe, naapo madzinza awo akazwa mbiri yako vanozoereketa vechiti,

¹⁶ ‘Ngokuti Mambo Mwari waiya aazi kukona kuunza ava vanhu munyika yaakapika kuvapa, ndizvo wakavauraya mushango.’

¹⁷ Zvino, ndinokupota, simba raMambo Mwari ngarikuriswe, kudai ngezvewakagondisa wechiti,

¹⁸ “Mambo Mwari unononoka kushatirwa, naye unenyasha huru, echirekerera kushaisha nokupauka, asi asikapembedzi uwo unendaa, echiunzidzira kushaisha kwemadzibaba padera pevana metsa kumubarirwana wechitatu nokuti wechirongomuna.

¹⁹ Rekerera, ndinokupota, kushaisha kweava vanhu kudai ngouwandu hwenyasha dzako, nokudai ngezvewakarekerera ava vanhu kubvira Egipite metsa kuguma zvino.”

²⁰ Zvino Mambo Mwari wakati, “Ndavarekerera kudai ngokukumbira kwako.

²¹ Asi kudai ngezvendinopona, nyika dzeshe dzinozozara ngouthende hwaMambo Mwari.

²² Apana noumwe wevanhu vakaona uthende hwangu nemamina angu endakaita muEgipite nomushango, asi vakandiedza zvino mikuwo iyi gumi, vasikazi kupurutana izwi rangu,

²³ ngegwinyiso avazooni nyika iyo yendakapika kupa kunamadzibaba avo; akuna noumwe weavo vakandishoora unozoiona.

²⁴ Asi muranda wangu Kharebhu, ngokuti iye unomweya umweni mukati mwake, naye wakanditeera ngomwoyo weshe ndinozomuunza munyika yeakaenda kweiri; nemibarirwana yake inozogara nhaka yayo.

²⁵ Zvino ngokuti vaAmareki nevaKhenani vaigara mumabani, mangwanani kunukukai imwimwi muende mushango ngenjira yoRuandhle Rwakatsvuka.”

Mambo Mwari Unojezisa Vanhu Vanogunun'una

²⁶ NaMambo Mwari wakaereketa kunaMosi naAroni echiti,

²⁷ “Kunozoitika mukuwo wakaitawani ndichisengerera iyi mbungano yakashata, yechigunun'una ndini? Ndakazwa kugunun'una kwevana vaIsuraeri kwevanondigunun'unira ndikwo.

²⁸ Ereketa kwavari, ‘Kudai ngezvendinopona, unoronza Mambo Mwari, kudai ndinozozviitawo kwomuri izvo zvendakazwa mwechiereketa.

²⁹ Miiri yenyu yakafa inozowira mushango iri; naavo veshe vakaerengwa venyu, kudai ngouwandu hwenyu hweshe, kubvira vaane makore makumi mairi kuenda mberi, avo vanondigunun'unira.

³⁰ Ngegwinyiso apana noumwe wenyu unozoguma kunyika yendakapika ndiyo kuti munozogara mukati mwayo, ngokubanze kwaKharebhu mukororo waJefune naJoshua mukororo waNuni.

³¹ Asi vadoko venyu, avo vemwakaereketa ndivo mwechiti, vanozoita vakachakatwa, ndivo vendinozogumisa munyika iyo, ivo vanozozia nyika iyo yemwakashoora.

³² Asi imwimwi, miiri yenyu yakafa inozowira mushango iri.

³³ Nevana venyu vanozonzerereka mushango kupedza makore makumi marongomuna, navo vanozotambudzika ngokusikagonda kwenyu, metsa miiri yenyu yakafa inozotsakatika mushango.

³⁴ Kudai ngouwandu hwemazuva emwakaenda koonengera nyika ndiwo, mazuva makumi marongomuna, zuva rimwe ngarimwe rinozoita gore, muzotwara kushata kwenyu makumi marongomuna emakore, nemwi munozozia kusikadakara kwangu.’

³⁵ Inini Mambo Mwari ndaereketa; ngegwinyiso ndinozozviita kuneiyi mbungano yeshe yakashata, yaungana pamwepo kundimukira; mukati mweiri shango vanozopedzwa, vanozofira muno.”

³⁶ Nevamuna vaakatuma Mosi koonengera nyika, avo vakapetuka, vakaita kuti mbungano yeshe ivhuruvhute kumumukira, ngokuunza mushumo wokushoora nyika iyo,

³⁷ vamuna vakaunza mushumo wakashata ngendaa yenyika iyo, vakafa ngenhenda pamberi paMambo Mwari.

³⁸ Asi Joshua mukororo waNuni naKharebhu mukororo waJefune, vakasara vechipona pakati peavo vakaenda koonengera nyika.

Kuedza kwoKutanga Kutora Nyika

³⁹ Naapo Mosi wakaronza mazwi aya kuvana vaIsuraeri veshe, navanhu vakachema kakarutu.

⁴⁰ Vakamuka mangwanani maishi, vakakwira padera penyika yemitunhu vechiti, “Penya, tiri pano. Nesu tinozokwira kundau yaakagondisa Mambo Mwari, ngokuti takashaisha.”

⁴¹ Asi Mosi wakati, “Zvino munoangira ngenyi kugura mupango waMambo Mwari? Izvi azvizobudiriri.

⁴² Musakwirapo, ngokuti Mambo Mwari apana pakati penyu; musadziuraisa pamberi pemagaa enyu.

⁴³ Ngokuti vaAmareki nevaKhenani vanozomurwisapo, nemwi munozowa ngeshoti; ngokuti imwimwi mwakafuratira kubva mukuteera Mambo Mwari, ndizvo Mambo Mwari aazoa nemwi akadi.”

⁴⁴ Asi vakakukumidzana kukwira padera penyika yemitunhu, kunyazwi zvakanyadaro Mosi nebhokisi rechitenderano chaMambo Mwari aazi kubuda kubva mukamba.

⁴⁵ Naapo vaAmareki nevaKhenani vaigara munyika yemitunhu iyo vakadzaka, vakavanyisa, vakavarumbirira metsa vaguma Horma.