Zvi. 13 - Bhaibheri Rakachena muChindau

Vanengeri

¹ NaMambo Mwari wakaereketa kunaMosi echiti,

² “Tuma vanhu, kuti vaende koonengera nyika yeKhenani, yendinopa vana vaIsuraeri: kubva kudzinza rimwe ngarimwe remadzibaba avo unozotuma munhu umwe, munhu weshe uri nduna pakati pavo.”

³ Ndizvo Mosi wakavatuma kubva mushango rePharani, kudai ngokupanga kwaMambo Mwari, veshe ava vanhu vaiya vakuru vevana vaIsuraeri.

⁴ Naaya ndiwo mazina avo: wedzinza raRubheni, ndiShamua mukororo waZakuri;

⁵ wedzinza raSimeoni, ndiShafati mukororo waHori,

⁶ wedzinza raJudha, ndiKharebhu mukororo waJefune;

⁷ wedzinza raIsakha, ndiIgari mukororo waJosefa;

⁸ wedzinza raEfuremu, ndiHoshea mukororo waNuni;

⁹ wedzinza raBhenjamini, ndiPhariti mukororo waRafu;

¹⁰ wedzinza raZebhuruni, ndiGadhieri mukororo waSodhi;

¹¹ wedzinza raJosefa, ukwo kunoti wedzinza raManase, ndiGadhi mukororo waSusi;

¹² wedzinza raDhani, ndiAmieri mukororo waGemari;

¹³ wedzinza raAsha, ndiSethuri mukororo waMikhaeri;

¹⁴ wedzinza raNafitari, ndiNabhi mukororo waVhophisi;

¹⁵ wedzinza raGadhi, ndiGeueri mukororo waMakhi.

¹⁶ Aya ndio mazina evamuna vakatumwa ndiMosi koonengera nyika. NaMosi wakadudza Hoshea mukororo waNuni, kuti Joshua.

¹⁷ NaMosi wakavatuma kuti vaende koonengera nyika yeKhenani, wakati kwavari, “Kwirai muende muNegebhi, mukwire padera penyika yemitunhu.

¹⁸ Muringire nyika kuti yakadini; nevanhu vanogaramwo, kuti vanesimba here nokuti avana; vashomani here nokuti vakawanda;

¹⁹ nokunyazwi nyika yevanogara yakadini, kuti iri yakanaka here nokuti yakashata; nemadhorobha evanogara kuti akadini, kuti vanogara mumatende here, nokuti mumarusvingo;

²⁰ nokunyazwi nyika yakadini, kuti yakavundira here nokuti aizi, nokuti inehuni here nokuti aina. Itai vakashinga, muuye nemichero yenyikayo.” Zvino nguva iyi yaiya yemichero yemitanguro yemavhini.

²¹ Ndizvo vakakwira, vakanengera nyika kubvira mushango reZini metsa kuguma Rehobhi, pasinde pamusiwo weHamathi.

²² Navo vakakwira muNegebhi, vakaguma Hebroni; Ahimani, Sheshai naTharimai, mibarirwana yaAnaki yaiyapo. (Hebroni raiya rakaakiwa makore manomwe ngepamberi kutangira Zoani riri muEgipite.)

²³ Naavo vakaguma muBani reEshikhori, vakatemapo dai rimwe rinechikore chemavhini, rakapingatwa ngevanhu vairi; vakaunzazve maphomegranite nemaonde.

²⁴ Ndau iyo yakadudzwa kuti Bani reEshikhori, ngendaa yechikore chemavhini chevakatemapo vana vaIsuraeri.

²⁵ Navo vakapetuka kubva koonengera nyika ngesure kwemazuva makumi marongomuna.

²⁶ Navo vakauya kunaMosi, Aroni nembungano yeshe yevana vaIsuraeri mushango rePharani, paKadheshi; vakaunza izwi kwavari nokunembungano yeshe, vakavapangidzira michero yeiyo nyika.

²⁷ Vakamuronzera vechiti, “Takaguma kunyika iyo yewakatituma kweiri, eya ngegwinyiso inoerera mukaka nouchi; iyi ndiyo michero yayo.

²⁸ Asi zvakanyadaro, vanhu vanogara munyikamwo vanesimba nemadhorobha avo akakura akashosherwa ngemarukumbati, zve, takaonapo mibarirwana yaAnaki.

²⁹ VaAmareki vanogara munyika yeNegebhi, vaHiti, vaJebhusi nevaAmori vanogara munyika yemitunhu; nevaKhenani vanogara pasinde poruandhle nokumarutii eJorodhani.”

³⁰ Asi Kharebhu wakanyaradza vanhu pamberi paMosi akati, “Ngatikwireyo zvinopano, tiitore; ngokuti isusu tinesimba rokuti tiinyise.”

³¹ Zvino vanhu vakaenda naye vakati, “Atikoni kukwira kooambana naavo vanhu; ngokuti vanesimba kupinda isusu.”

³² Ndizvo vakaunza mashoko akashata kunevana vaIsuraeri, ngendaa yenyika yevakaenda koonengera vechiti, “Nyika yatakaenda koonengera, inyika inodya vagari vayo; nevanhu veshe vetakaona umwo magakanyara.

³³ Naapo takaona vaNefirimu (vakororo vaAnaki, avo vorudzi rwevaNefirimu); nesu pachedu takadziona takadai ngemadorondoro, ndizvo ngezvetaiya takaita mukuona kwavo.”