Zvi. 12 - Bhaibheri Rakachena muChindau

Miriamu Unojeziswa

¹ Miriamu naAroni vakaereketa vechiitira ndaa Mosi ngendaa yomukadzi weKhushi uwo waakaroora; ngokuti waiya akaroora mukadzi muKhushi.

² Navo vakati, “Ngegwinyiso Mambo Mwari wakaereketa kubudikidza ndiMosi ega here? Aazi kuereketa kubudikidza tisuwo here?” NaMambo Mwari wakazvizwa.

³ (Zvino munhu uyu Mosi waiya munhu wakapfaa, kupinda vanhu veshe vaiya panyika.)

⁴ Ngokukasira Mambo Mwari wakaereketa kunaMosi, Aroni, nokunaMiriamu echiti, “Budai imwimwi vatatu muuye kutende romushongano.” Navo vatatu vakabuda.

⁵ NaMambo Mwari wakadzaka ari mumvumi yegore, wakaema pamusiwo wetende romushongano, wakadaidza Aroni naMiriamu; navo vairi vakabuda.

⁶ Naye wakati, “Izwanyi zvino mazwi angu: Kudai aripo muprofeti pakati penyu, inini Mambo Mwari ndinozoita kuti ndiziikanwe kwaari muchioniso, ndinozoereketa kwaari mukurota.

⁷ Muranda wangu Mosi aazi kudaro akadi, unogondeka mumhatso yangu yeshe.

⁸ Kwaari ndinozoereketa takaringirana hope kuhope eya, pamhene, pasina chakafishika; naye unoona chiemo chaMambo Mwari. Ndizvo ngenyi musikazi kutya kuitira ndaa Mosi muranda wangu?”

⁹ Noushungu hwaMambo Mwari hwakabaka kwavari; naye wakabvapo.

¹⁰ Negore rakamiruka kubva padera petende romushongano; wonai, Miriamu waiya aanemapere, akachena kudai ngechando. NaAroni wakaringira Miriamu, akaona kuti waiya aanemapere.

¹¹ NaAroni wakati kunaMosi, “A mambo wangu, ndapota, usatijezisa, ngokuti takaita ngoupenzi, nesu takashaisha.

¹² Usatenda kuti aite kudai ngewakabarwa akafa, uwo nyama yake rupande rwayo yakaora apo echibuda mundani yamai ake.”

¹³ NaMosi wakakumbira kunaMambo Mwari echiti, “Muponesei zvino, A Mwari, ndinopota kwouri.”

¹⁴ Asi Mambo Mwari wakati kunaMosi, “Kudai baba ake vaiya vakamupfira mata muhope mwake, asaizoita unotsveruka here mazuva manomwe? Ngaabviswe akonyerwe kubanze kwekamba mazuva manomwe, ngesure kweizvo ngaaunzwezve.”

¹⁵ Ndizvo Miriamu wakakonyerwa kubanze kwekamba mazuva manomwe; nevanhu avazi kuhamba kuenda metsa Miriamu aunzwazve mukamba.

¹⁶ Nangesure kweizvo vanhu vakathutha kubva Hazerothi, vakaemesa matende avo mushango rePharani.