Zvi. 11 - Bhaibheri Rakachena muChindau

Ndau Yakadudzwa kuti Thabhera

¹ Naapo vanhu vakavhuruvhuta mukuzwa kwaMambo Mwari ngendaa yemadambudziko avo naMambo Mwari azvizwa, ushungu hwake hwakabaka; nomuriro waMambo Mwari wakabaka pakati pavo, wakaparadza marupande okumagumo kwekamba.

² Asi vanhu vakachema kunaMosi; naMosi wakakumbira kunaMambo Mwari nomuriro wakadzimwa.

³ Ndizvo wakadudza zina rendau iyo kuti, “Thabhera;” ngokuti muriro waMambo Mwari wakabaka pakati pavo.

Mosi Unotsanangura Vatungamiriri Makumi Manomwe

⁴ Zvino vapara vaigara pakati pavo vakabatwa ngenhomba yenyama; nevana vaIsuraeri vakachemawo vechiti, “Ndiani unozotipa nyama yokuti tidye.

⁵ Tinokarakadza hove dzetakadya tisingatengi tiri munyika yeEgipite, makaka, makhebe, mariki, mahanyanisi nemagarikhi;

⁶ asi zvino mweya yedu yaomerwa; apachina chiro nachimwe, asi mana iyi yega iri pamberi pemadziso edu.”

⁷ Zvino mana yakadai ngetsangu yekhorianda, nomuara wayo waiya wakadai ngomuara webhidheriumu.

⁸ Vanhu vaibuda vechipararira kooiunganidza, vaikuya pamakuyo, nokuti kuitwa mumaturi, nokuibika, nokuita makhekhe ndiyo; yainaka kudai ngezvimakhekhe zvakabikwa ngemafuta matsva.

⁹ Naapo beto rawa padera pekamba usiku, nemana yaiwa naro.

¹⁰ Mosi wakazwa kuchema kwevanhu, mukati mwemhuri dzavo, munhu weshe pamusiwo wetende rake; noushungu hwaMambo Mwari hwakabaka kakurutu, Mosi naye wakashatirwa kakurutu.

¹¹ Mosi wakati kunaMambo Mwari, “Unotambudzirenyi muranda wako? Andizi kuona nyasha ngenyi mukuona kwako, kuti uise mutwaro wevanhu ava veshe padera pangu?

¹² Ndakatonha ukosha hwevanhu ava veshe here? Ndakavabara here kwokuti iwewe uti kwendiri, ‘Vafungatire paditi rako, kudai ngomureri unofungatira mwana uchaamwa, kuenda navo kunyika yewakapika ndiyo kunemadzibaba avo?’

¹³ Ndingaona pari nyama yokupa vanhu ava veshe? Ngokuti vanochemera pamberi pangu, vechiti, ‘Tipe nyama kuti tidye.’

¹⁴ Andikoni kutwara ava vanhu veshe ndega, ngokuti vanondiremera.

¹⁵ Kudai mwechida kundiitira zvakadai, ndiurayenyi ngokukasira, ndapota, kudai ndaona nyasha mukuona kwako; kuti ndisazoona kutambudzika kwangu.”

¹⁶ Ndizvo Mambo Mwari wakati kunaMosi, “Ndiunganidzire vamuna makumi manomwe evakuru vaIsuraeri, avo vounozia kuti vakuru vevanhu, nduna padera pavo; vaunze kutende romushongano, kuti vaeme apo newe.

¹⁷ Neni ndinozodzaka ndierekete newe apo; ndinozotora rupande rwomweya uri padera pako, ndiuise padera pavo; navo vanozotwara mutwaro wevanhu pamwepo newe, kuti usazoutwara wega pachako.

¹⁸ Ereketa kunevanhu kuti: Dzichenesei pachenyu ngendaa yemangwani, nemwi munozodya nyama; ngokuti mwakachema mukuzwa kwaMambo Mwari mwechiti, ‘Ndiani unozotipa nyama yokuti tidye? Ngokuti zvaiya zvakanaka kwetiri tichimunyika yeEgipite.’ Ndizvo Mambo Mwari unozomupa nyama nemwi munozodya.

¹⁹ Amuzoidyi zuva rimwe rega, nokuti mazuva mairi, nokuti mazuva mashanu, nokuti mazuva gumi, nokuti mazuva makumi mairi.

²⁰ Asi munozoidya mwedzi weshe, metsa ibude kubva ngomumiro mwenyu, metsa munyangadzwe ndiyo; ngokuti mwakashoora Mambo Mwari uri pakati penyu, mwakachema pamberi pake mwechiti, ‘Takabudirenyi kubva munyika yeEgipite?’ ”

²¹ Asi Mosi wakati, “Vanhu vendinavo mazana matanhatu emakumi emazana (600,000) vanohamba ngetsoka; newe wakati, ‘Ndinozovapa nyama yokuti vadye mwedzi weshe.’

²² Vanozourairwa n'ombe nemakwai here, kuti vakwane? Nokuti vanozounganidzirwa hove dzeshe dzomuruandhle here kuvapa, kuti vakwane?”

²³ Mambo Mwari wakati kunaMosi, “Nyara yaMambo Mwari yakafupiswa here? Zvino unozoona kuti mazwi angu anozoitika here kwouri, nokuti aazoitiki.”

²⁴ Ndizvo Mosi wakaenda kooronzera vanhu mazwi aMambo Mwari; wakaunganidza vamuna makumi manomwe vakuru vevanhu, wakavaemesa kutendenedza tende romushongano.

²⁵ Zvino Mambo Mwari wakadzaka ari mugore, wakaereketa kwaari, akatora rupande rumweni rwomweya rwaiya padera pake, wakaukoanisira kunevakuru vaiya makumi manomwe; naapo mweya wagara padera pavo, vakaprofeta. Asi avazi kuzoitazve kudaro.

²⁶ Asi kwakasara vamuna vairi mukamba, zina roumwe ndiEridhadhi, nezina roumweni ndiMedhadhi, nomweya wakagara padera pavo; navo vaiya veavo vakanyorwa, asi avazi kubuda kuenda kutende romushongano; ndizvo vakaprofeta vandorimwo mukamba.

²⁷ Jaha rakarumba rikaronzera Mosi rechiti, “Eridhadhi naMedhadhi vanoprofeta vari mukamba.”

²⁸ NaJoshua mukororo waNuni, mudetseri waMosi, umwe wemajaha ake, wakapingura echiti kwaari, “Mambo wangu Mosi, varambidzei!”

²⁹ Asi Mosi wakati kwaari, “Unendurumwa here ngendaa yangu? Ndingada kuti vanhu veshe vaMambo Mwari vaite vaprofeti, nokuti Mambo Mwari aise mweya wake padera pavo!”

³⁰ Mosi nevakuru vaIsuraeri wakapetuka mukamba.

Mambo Mwari Unotumira Zvikware

³¹ Kwakabuda dutu kubva kunaMambo Mwari, naro rakaunza zvikware zvakabva kuruandhle, nazvo zvakarigirwa pasinde pekamba, muhambo waida kukwana wezuva kumarutii eshe aro, kuritendenedza kwaida kuita mitha rimwe padera pemavhu.

³² Ndizvo vanhu vakamiruka zuva iro reshe, nousiku uhwo hweshe, nezuva reshe raiteera, vakaunganidza zvikware; uwo wakaunganidza zvishomani wakaunganidza zvaipinda makhirogramu gumi remazana (1,000) navo vakazvianika pachavo kundau dzeshe dzinotendenedza kamba.

³³ Asi nyama ichiri pakati pemazino avo, isati yatsengwa, ushungu hwaMambo Mwari hwakabaka kunevanhu, naMambo Mwari wakachaya vanhu ngenhenda huru.

³⁴ Ndizvo wakadudza zina rendau iyo kuti, “Kibrothi-hataava:” ngokuti vakatsirapo vanhu vakafa ngenhomba.

³⁵ Navanhu vakahamba kubva Kibrothi-hataava kuguma Hazerothi, vakagara Hazerothi.