Zvi. 10 - Bhaibheri Rakachena muChindau

Magwama eSirivha

¹ Mambo Mwari wakaereketa kunaMosi echiti,

² “Nasira magwama mairi esirivha; unozoanasira ngesirivha yakapfurwa; newe unozoashandisa kudaidza mbungano, nokuziisa vanhu vekamba kuti vahambe.

³ Naapo eshe aridzwa, mbungano yeshe inozoungana pamwepo kwouri pamusiwo wetende romushongano.

⁴ Asi kudai wechizoridza gwama rimwe rega, zvino vatungamiriri, nduna dzemadzinza evaIsuraeri vanozodziunganidza kwouri.

⁵ Naapo munozoridzisa gwama, ngokudaro makamba ari ngokumabvazuva anozohamba kuenda.

⁶ Naapo munozoridzisa gwama ngokwechipiri, makamba ari ngokubani anozohamba kuenda; vanozoridzisa gwama rokuziisa kuhamba kwavo.

⁷ Asi apo mbungano yechida kuunganidzwa pamwepo, munozoridza asi amuzoridzisi gwama.

⁸ Vakororo vaAroni, vapristi vanozoridza magwama; neizvi zvinozoita mipango kwomuri nokumibarirwana yenyu mhera nariini.

⁹ Naapo mwechienda koorwa hondo munyika yenyu namagaa avo vanomutambudza, naapo munozoridzisa magwama, kuti muzocherechedzwa pamberi paMambo Mwari, Mwari wenyu, nemwi munozoponeswa kubva kumagaa enyu.

¹⁰ Zve, ngemazuva okudakara kwenyu, nemazuva enyu emadhiri okudira, nomukuamba kwokutawa kwomwedzi yenyu munozoridza magwama muri pamidiro yenyu yokupisha, nepamidiro yenyu yokunyarara; kuti zviite chicherechedziso pamberi paMwari wenyu. Inini ndini Mambo Mwari, Mwari wenyu.”

VaIsuraeri Vanothutha

¹¹ Mugore rechipiri mumwedzi wechipiri, ngezuva remakumi mairi gore rakamirudzwa kubva padera pethabhenakeri yechapupu.

¹² Nevana vaIsuraeri vakahamba kubva mushango reSinai; negore rakaenda kooema mushango rePharani.

¹³ Navo vakatanga kuhamba muhambo wavo kudai ngokupanga kwaMambo Mwari kubudikidza ndiMosi.

¹⁴ Kutanga kwakahamba chioniso chekamba raJudha kudai ngezvikwata zvavo nenduna yehondo yake yaiya Nashoni mukororo waAminadhabhi.

¹⁵ Nenduna yedzinza raIsakha yaiya Nethaneri mukororo waZua.

¹⁶ Nenduna yedzinza raZebhuruni yaiya Eriabhi mukororo waHeroni.

¹⁷ Zvino thabhenakeri rakadzaswa pashi; vakororo vaGershoni nevakororo vaMerari vakahamba vakatwara thabhenakeri.

¹⁸ Chaiteera chioniso chekamba yaRubheni chakahamba kudai ngezvikwata zvavo nenduna yehondo yavo yaiya Erizuri mukororo waShedheuri.

¹⁹ Nenduna yedzinza raSimeoni yaiya Sherumieri mukororo waZurishadhai.

²⁰ Nenduna yehondo yevana vaGadhi yaiya Eriasafi mukororo waDheueri.

²¹ Zvino vaKohathi vakahamba kuenda, vakatwara zviro zvakacheneswa, nevamweni vakaemesa thabhenakeri ivo vasati vaguma.

²² Chioniso chekamba yevana vaEfuremu chakahamba kudai ngezvikwata zvavo nenduna yehondo yake yaiya Erishama mukororo waAmihudhi.

²³ Nenduna yehondo yevana vaManase yaiya Gamarieri mukororo waPhedhazuri.

²⁴ Nenduna yehondo yedzinza raBhenjamini yaiya Abhidhani mukororo waGidheoni.

²⁵ Chioniso chekamba chevana vaDhani chakahamba chiri chokugumisira chemakamba eshe mukati mwehondo dzavo naAhieza mukororo waAmishadhai ndiye waiya nduna yehondo yavo.

²⁶ Nenduna yehondo yevana vaAsha yaiya Phagieri mukororo waOkrani.

²⁷ Nenduna yehondo yedzinza raNafitari yaiya Ahira mukororo waEnani.

²⁸ Uku ndikwo kwaiya kuhamba kwevana vaIsuraeri kudai ngokuteererana kwezvikwata zvavo.

²⁹ NaMosi wakati kuna Hobhabhi mukororo waRueri muMidhiani, muzvere waMosi, “Tinohamba kuenda kundau yaakaronza Mambo Mwari, kuti, ‘Ndinozoipa kwomuri;’ uya nesu, nesu tinozokuitira zvakanaka, ngokuti Mambo Mwari wakagondisa zvakanaka kunaIsuraeri.”

³⁰ Asi wakati kwaari, “Andizoendi nemwi, asi ndinozohwirira kunyika yangu nokuhama dzangu.”

³¹ Naye wakati, “Usasiyana nesu, ndinokupota; kudai ngezvounozia kuti tinozoemesa matende edu mushango, newe unozoita madziso edu.

³² Kudai wechizoenda nesu, kunyazwi kunaka kwakadini ukwo kwaanozoita Mambo Mwari kwetiri, isusu tinozoitawo kudaro kwouri.”

Vanhu Vanohamba Kuenda

³³ Ndizvo vakahamba kubva pamutunhu waMambo Mwari muhambo wemazuva matatu; nebhokisi rechitenderano chaMambo Mwari rakatanga kuenda mberi kwavo, muhambo wemazuva matatu, kootsvaka ndau yavo yokuzorora.

³⁴ Negore raMambo Mwari raithibikira padera pavo masikati, apo vaihamba kubva mukamba.

³⁵ Naapo bhokisi rechitenderano roohamba kuenda, Mosi waiti, “Miruka, A Mambo Mwari, magaa ako ngaaparadzwe; naavo vanokuzonda ngavatize kubva pamberi pako.”

³⁶ Naapo roogadzikwa waiti, “Petukazve, A Mambo Mwari, kumakumi emakumi emazana akawanda evaIsuraeri.”