Zvak. 12 - Bhaibheri Rakachena muChindau

Kuurawa kwaJakobe noKubatwa kwaPetro

¹ Asi ngouwo mukuwo Herodhi mambo wakatambanudza nyara dzake kutambudza vamweni vechiara.

² Wakauraya Jakobe, mukoma waJohani, ngeshoti.

³ Naapo aona kuti zvakadakadza vaJudha, wakaenda mberi kubatawo Petro. Awo aiya mazuva edhiri reChingwa chisina Mumera.

⁴ Naapo amubata, wakamukonyera mutirongo, akamuisa kuzvikwata zvirongomuna zvemajoni, kuti zvimurinde, echipinimidza kumubudisa pamberi pevanhu ngesure kwePhasika.

⁵ Ndizvo Petro wakangwarirwa mutirongo, asi chiara chakaangira kumukumbirira kunaMwari.

Petro Unosunhurwa kubva muTirongo

⁶ Ngousiku uhwo apo Herodhi paaizomuka echimubudisa, Petro waiya akaata pakati pemajoni mairi, akasungwa ngemaketani mairi, nevarindi vaiya pamusiwo vechingwarira tirongo.

⁷ Apapo ngirosi yaMambo yakaemapo, nokujeka kwakajeka mukamera retirongo; nayo yakatsungudza Petro ngeparutii, ikamumusa yechiti, “Kasira kumiruka.” Nemaketani akarungunuka kubva munyara dzake.

⁸ Nengirosi yakati kwaari, “Dzisimidze usunge magwada ako”, naye wakaita kudaro. Yakati kwaari, “Pfeka chokufuka chako, unditeere.”

⁹ Petro wakabuda kubanze akaiteera; aazi kunasa kuzia zvaiitwa ngengirosi, asi wakapinimidza kuti waiona chioniso.

¹⁰ Naapo vapinda varindi vokutanga nevechipiri, vakaguma pamusiwo wesimbi wokupotera ndiwo mudhorobha. Nawo wakavabeukira wemene; vakabuda, vakahamba ngepato rimwe; paripo ngirosi yakamusiya.

¹¹ Naapo Petro apembenuka, wakati, “Zvino ndinozia ngegwinyiso kuti Mambo wakatuma ngirosi yake, akandinunura kubva munyara yaHerodhi nokubva mukukarira kweshe kwevanhu vevaJudha.”

¹² Naapo azia ngeizvi, wakaenda kumhatso yaMaria, mai aJohani, mutupo wake waizwi Marako; apo pevaiya vakaungana vazhinji vechikumbira.

¹³ Asi adododza pamusiwo, musikana waizwi ndiRodha wakauya koodaira.

¹⁴ Asi apo azia izwi raPetro, aazi kubeura musiwo ngokudakara, asi wakarumba kupotera, akavaronzera kuti Petro wakaema pamusiwo.

¹⁵ Vakati kwaari, “Unopenga.” Asi iye wakaangira kugwinyisa kuti ndizvo. Asi vakati, “Ingirosi yake!”

¹⁶ Asi Petro wakaangira kudododza; naapo vabeura vakamuona, vakashamiswa.

¹⁷ Asi wakaita ngenyara yake kuti vanyarare, wakadudzira kwavari ngenjira yaakabudiswa ndiyo ndiMambo mutirongo. Wakati, “Ronzai izvi kunaJakobe nokunehama.” Wakabvapo, akaenda kundau imweni.

¹⁸ Zvino kwaedza, kwaitika bope guru pakati pevarindi, ngendaa yezvakaitika kunaPetro.

¹⁹ Naapo Herodhi amutsvaka, asikamuoni, wakabvunzisisa varindi, akapanga kuti vaurawe. Naye wakadzaka kubva Judhia, akaenda Sizaria, akagarayo.

Kufa kwaHerodhi

²⁰ Zvino Herodhi wakatsenekera kakurutu vanhu veThire neveSidhoni; navo vakauya kwaari muchiunga chimwe, naapo vaiyana naBrastusi, nduna yekamera ramambo, vakakumbira kuti vaiyaniswe, ngokuti nyika yavo yaiona zvokudya kubva munyika yamambo.

²¹ Ngezuva rakaemeswa, Herodhi wakadzisimidza zvokufuka zvoumambo, akagara pachigaro choumambo, wakaereketa kwavari.

²² Nevanhu vakadaidzira vechiti, “Iri izwi raMwari, haiwa romunhu!”

²³ Paripo ngirosi yaMambo yakamurova, ngokuti aazi kukudza Mwari; naye wakadyiwa ngehonye, akafa.

²⁴ Asi izwi raMwari rakaangira kupararira nokuwanziswa.

²⁵ Zvino Bhanabhasi naSauri vakahwirira Jerusarema, apo vaiya vapedza mushando wavo, vechitora navo Johani uwo waizwi Marako.