Zek. 9 - Bhaibheri Rakachena muChindau

Kutongwa kweMadzinza Anogara pasinde

¹ Izwi raMambo Mwari rinorwisana nenyika yeHadhirakhi, rinozowira padera peDhamasekusi. Ngokuti kunaMambo Mwari ngerake dhorobha guru reAramu kudai ngezvinoita madzinza eshe aIsuraeri.

² Hamathiwo inoganurana nayo, Thire neSidhoni, kunyazwi vakangwara kakurutu.

³ Thire rakadziakira mangome, nokuunganidza sirivha kudai ngebukuta, nomukore kudai ngematope emapato.

⁴ Asi zvino ringira, Mambo Mwari unozotorera nhaka yaro, nokuzuwira upfumi hwaro muruandhle, naro rinozopedzwa ngomuriro.

⁵ Ashikeroni rinozozviona nokutya; Gazawo rinozoona, rechizosvipa mwoyo kakurutu; Ekironiwo, ngokuti magondero aro afota. Mambo unozopera kubva Gaza; Ashikeroni arizogarwi.

⁶ Mubvandirimwo unozogara muAshidhodhi, neni ndinozopedza kudzikudza kwevaFiristia.

⁷ Ndinozodusa ngazi yake kubva pamuromo wake, nezvinonyangadza zvake kubva pakati pemazino ake; chinosarawo chinosarira Mwari wedu, chinozodai ngedzinza mwaJudha, Ekironi rinozodai ngomuJebhusi.

⁸ Zvino ndinozodzimika kutendenedza mhatso yangu kuingwarira kuti kusaapo naumwe unofora kuenda mberi nokupetuka sure; apana mutambudzi uchazofora pakati pavo nakamwe, ngokuti zvino ndaona ngemadziso angu emene.

Mambo Uchazouya

⁹ Dakara kakurutu, O mwanasikana weZioni! Daidzira, O mwanasikana Jerusarema! Ringira, Mambo wako unouya kwouri, asi munyisi, ndiye munyisi wakapfaa, echigadha padera pechimbongoro padera pemwana wembongoro.

¹⁰ Ndinozogura ngoro dzinobva Efuremu, nemahachi ehondo kubva Jerusarema, nouta hwehondo hunozogurwa; naye unozopanga kuti kuapo kunyarara kumadzinza; nokutonga kwake kunozobva kuruandhle kuguma kuruandhle, nokubva kuRwizi kuenda kumagumo enyika.

Kupetudzwa kweVanhu vaMwari

¹¹ Asi kudai ndiwewo, ndaa yengazi yechitenderano changu newe, ndinozosunhura mabanditi ako kubva murindi apo risina mvura.

¹² Petukai kungome dzenyu, O mabanditi okugonda; nyamashi ndinoronza kuti ndinozopetudzira kairi kwomuri.

¹³ Ngokuti ndakunga Judha kudai ngouta hwangu, ndaita Efuremu misee yahwo. Ndinozomirudzira vakororo vako, O Zioni, kurwisana nevakororo vako, O Girisi, nokukuita kuti udai ngeshoti yengwazi.

¹⁴ Zvino Mambo Mwari unozooneka padera pavo, nemisee yake inozoposhwa kudai ngemheni; Mambo Mwari, Mwari unozoridza gwama, nokuhamba kudai ngezvipupuri zvokubani.

¹⁵ Mambo Mwari wehondo unozovavhikira; navo vanozoparadza nokunyisa ngemapuwe anokandirwa ngechimvii; vanozomwa, nokuita bope kudai ngepavhini; vanozozara kudai ngendiro huru, nokunyikwa ngemakhona earita.

¹⁶ Pazuva iro Mambo Mwari wavo unozovaponesa ngokuti makwai evanhu vake; ngokuti vanozodai ngemapuwe edzungudza, anozopenya padera penyika yake.

¹⁷ A kunakanyi nokuringirika kwakanaka kwake! Zviyo zvinozoita kuti majaha akure akagwinya, nevhini idzva kuti vasikana vakure vakagwinya.