Zek. 8 - Bhaibheri Rakachena muChindau

Mambo Mwari Unogondisa Kupetudza Jerusarema

¹ Izwi raMambo Mwari wehondo rakauya kwendiri rechiti,

² “Izvi ndizvo zvinoronza Mambo Mwari wehondo: Ndine ndurumwa neZioni nendurumwa huru, neni ndine ndurumwa ngendaa yaro ngoushungu hukurutu.

³ Izvi ndizvo zvinoronza Mambo Mwari: Ndinozopetuka kuZioni, neni ndinozogara pakati peJerusarema; Jerusarema rinozodaidzwa kuti Dhorobha Rakagondeka, nomutunhu waMambo Mwari wehondo unozodaidzwa kuti mutunhu wakacheneswa.

⁴ Izvi ndizvo zvinoronza Mambo Mwari wehondo: Harahwa nembuya vachazogarazve mumapato eJerusarema, umwe ngaumwe anendonga munyara ngendaa yousharuka.

⁵ Nemapato edhorobha anozozara ngevarumbwana nevasikana vechitamba mumapato aro.

⁶ Izvi ndizvo zvinoronza Mambo Mwari wehondo: Kunyazwi zvechioneka kudai ngezvisikaitiki mukuona kwevakasara vevanhu ava mumazuva aya, zvichaonekawo kudai ngezvisikaitiki mukuona kwangu here? Unoronza Mambo Mwari wehondo.

⁷ Izvi ndizvo zvinoronzaMambo Mwari wehondo: Ringira, ndinozoponesa vanhu vangu kubva kunyika yokumabvazuva nokubva kunyika yokumabirirazuva;

⁸ neni ndinozovaunza kuti vagare muJerusarema. Vanozoita vanhu vangu, neni ndinozoita Mwari wavo, mukugondeka nomukururama.

⁹ “Izvi ndizvo zvinoronza Mambo Mwari wehondo: Nyara dzenyu ngadzigwinye, imwimwi mwazwa mazwi aya ngemiromo yevaprofeti, avo vaiyapo apo pakaradzikwa madzeyo okuakisa temperi, mhatso yaMambo Mwari wehondo.

¹⁰ Ngokuti asati aguma mazuva awo, paiya pasina musharo womunhu nokuti musharo wemhuka; nokuti kunyarara kubva kugaa, nokuti avo vakabuda nokuti vakapotera, neni ndakavaemesa veshe kuti varwisane umwe neumweni.

¹¹ Asi zvino andizobati vakasara vevanhu ava kudai ngemazuva okutanga, unoronza Mambo Mwari wehondo.

¹² Ngokuti kunozoapo kukushwa kwokunyarara; muvhini unozobara michero yawo, mavhu anozobudisa michero yawo, nematenga anozobudisa beto rawo; neni ndinozoita kuti vakasara vevanhu ava vaanazvo izvi zveshe.

¹³ Kudai ngezvemwakaita chituko pakati pevemadzinza, O mhatso yaJudha nemhatso yaIsuraeri, ngokudaro ndinozomuponesa nemwi munozoita chifumiso. Musatya, asi nyara dzenyu ngadzigwinye.”

¹⁴ Ngokuti izvi ndizvo zvinoronza Mambo Mwari wehondo: “Kudai ngezvendakapinimidza kuunza dambudziko padera penyu, apo madzibaba enyu akandimukira kuti ndiite ushungu, unoronza Mambo Mwari wehondo, neni ndakarekera kutenderuka,

¹⁵ ngokudarozve ndakapinimidza mumazuva ano kuita zvakanaka kuJerusarema nokumhatso yaJudha; musatya imwimwi.

¹⁶ Izvi ndizvo zviro zvomunozoita: Ereketai gwinyiso umwe kuneumweni, itai kutonga kwakanaka kwegwinyiso, muunze kunyarara mumisiwo yenyu,

¹⁷ musaronga kuita zvakashata mumwoyo yenyu umwe kuneumweni, musazoda mhiko dzokunyepa; ngokuti izvi zveshe ndizvo zviro zvendinonyenya,” unoronza Mambo Mwari.

¹⁸ Izwi raMambo Mwari wehondo rakauya kwendiri rechiti,

¹⁹ “Izvi ndizvo zvinoronza Mambo Mwari wehondo: Kuera kudya mwedzi wechirongomuna, nokuera kudya kwemwedzi wechishanu, nokuera kudya kwemwedzi wechinomwe, nokuera kudya kwemwedzi wegumi, kunozoita kumhatso yaJudha kudakara nokudakadzwa, kudya kwakawanda kunodakadza; ndizvo idai gwinyiso nokunyarara.”

²⁰ Izvi ndizvo zvinoronza Mambo Mwari wehondo: “Vanhu vachauya vagari vemadhorobha akawanda;

²¹ vagari vomudhorobha rimwe vanozoenda kunerimweni vechiti, ‘Uyai, ngatikasire kuenda kookumbira nyasha kunaMambo Mwari, nokutsvaka Mambo Mwari wehondo; inini pachangu ndinozoenda.’

²² Vanhu vakawanda nemadzinza akagwinya vanozouya kutsvaka Mambo Mwari wehondo muJerusarema, nokukumbira nyasha kunaMambo Mwari.

²³ Izvi ndizvo zvinoronza Mambo Mwari wehondo: Mumazuva awo vanhu gumi vanobva kumadzinza endimi dzeshe dzemadzinza vanozobata muJudha, vechibatirira kumupendero wechokufuka chake vechiti, ‘Ngatiende newe, ngokuti tazwa kuti Mwari unewe.’ ”