Zek. 7 - Bhaibheri Rakachena muChindau

Mambo Mwari Unoshoora Kuera Kudya Kusina Kugondeka

¹ Mugore rechirongomuna rokutonga kwamambo Dhariusi, izwi raMambo Mwari rakauya kunaZekharia pazuva rechirongomuna romwedzi wechipfumbamwe, unozwi Khisirevhi.

² Zvino vanhu veBhetheri vaiya vatuma Shareza naRegemerekhi, nevanhu vavo kookumbira nyasha pamberi paMambo Mwari,

³ nokukumbira vapristi vomumhatso yaMambo Mwari wehondo nevaprofeti vechiti, “Ndochema here ngomwedzi wechishanu, ndechidziparadzanisa, kudai ngezvendakaita ngaaya makore akawanda kudai?”

⁴ Zvino rakauya izwi raMambo Mwari wehondo kwendiri,

⁵ “Ereketa kuvanhu veshe venyika nokuvapristi wechiti, ‘Apo mwakaera kudya mwechibonda mumwedzi wechishanu nowechinomwe, makore aya makumi manomwe, mwakaerera inini, apo pemwakaera kudya here?

⁶ Naapo mwakadya nokumwa, amuzi kudzidyira nokudzimwira here?’

⁷ “Awo andiwopi mazwi aakadaidzira Mambo Mwari ngevaprofeti vokutanga, apo Jerusarema richine vanhu nouthende, pamwepo nemadhorobha aro akaritendenedza, naapo vanhu vachakagara mubani nemarutii emitunhu here?”

Kusikapurutana Kwakaunza Usungwa

⁸ Izwi raMambo Mwari rakauya kunaZekharia rechiti,

⁹ “Izvi ndizvo zvinoronza Mambo Mwari wehondo: ‘Tongai kutonga kwakarurama, muite nyasha nokukungurira umwe kuneumweni;

¹⁰ musatambudza shirikadzi, nherera, vapara, nokuti varombo; musaronga kuitirana zvakashata mumwoyo yenyu umwe kuneumweni.’

¹¹ “Asi vakaramba kupurutana, vakafuratira pfudzi risikapurutani, vakatsiira nzee dzavo, kuti vasazozwa.

¹² Vakaita kuti mwoyo yavo ikonze kudai ngebuwe readhimanti, kuitira kuti vasazozwa mitemo, namazwi aakatuma Mambo Mwari wehondo ngoMweya wake ngevaprofeti vokutanga. Ndizvo ushungu hukuru hwakauya hwechibva kunaMambo Mwari wehondo.

¹³ Ndizvo zvakaitika, apo akadaidza, vakaramba kuzwa; ngokudaro apo vakadaidzira, neni ndakaramba kuzwa, unoronza Mambo Mwari wehondo,

¹⁴ neni ndakavaparadzira ngechipupuri pakati pemadzinza eshe evasaizia. Ndiyo nyika yevakasiya kuita shango, ndizvo akuna naumwe wakapindamwo nokubudamwo; nenyika yakanaka yakaitwa shango.”