Zek. 6 - Bhaibheri Rakachena muChindau

Chioniso cheNgoro Murongomuna

¹ Ndakaringirazve mudenga nokuona, ringira, dzakabuda ngoro murongomuna kubva pakati pemitunhu miiri; nemitunhu yaiya mitunhu yethusi.

² Ngoro yokutanga yaiya nemahachi akatsvuka, ngoro yechipiri mahachi matema,

³ ngoro yechitatu mahachi akachena, nengoro yechirongomuna mahachi akasvipirika neakatsvukuruka.

⁴ Zvino ndakati kungirosi iyo yakaereketa neni, “Izvi zviinyi, mambo wangu?”

⁵ Ngirosi yakandipingura, ikati kwendiri, “Izvi mweya mirongomuna yomudenga, inobuda kubanze, yapedza kuema pamberi paMambo wenyika yeshe.”

⁶ Ngoro inemahachi matema inoenda kunyika yedera; ineakachena inoenda kunyika yokumabirirazuva; ineakasvipirika inoenda kunyika yokubani.

⁷ Naapo mahachi anesimba abuda; aisundwa kuenda kuhambahamba munyika mweshe. Nayo yakati, “Endai, muhambehambe kuringira nyika. Ndizvo akahambahamba kuringira nyika.”

⁸ Zvino yakadaidzira kwendiri, yakaereketa yechiti, “Ringira, avo vanoenda kunyika yedera vanyaradza mweya wangu munyika yedera.”

Kupanga Kupfekedza Joshua Dzungudza

⁹ Izwi raMambo Mwari rakauya kwendiri rechiti,

¹⁰ “Tora kubva kuvasungwa, kubva kuHeridhai, Thobhija, neJedhaia, avo vaguma kubva Bhabhuroni, nokupetuka ngezuva ririro, kupotera mumhatso yaJosia mukororo waZefania.

¹¹ Tora sirivha nomukore, unasire dzungudza, upfekese padera pesoro romupristi mukuru Joshua mukororo waJehosadhaki;

¹² uti kwaari, ‘Izvi ndizvo zvinoronza Mambo Mwari wehondo: Ringira, uwo munhu zina rake ndiNhai; naye unozoita nhai pandau yake; unozoaka temperi raMambo Mwari.

¹³ Ndiye uwo unozoaka temperi raMambo Mwari; unozotwara kukudzwa kwoumambo, naye unozogara nokutonga padendemaro rake. Unozoapo mupristi pasinde pedendemaro rake; nokuzwisisa kwakanyarara pakati pavo vairi.’

¹⁴ Nemadzungudza anozongwarirwa ndiHeremu, Thobhija, Jedhaia, naHeni mukororo waZefania, kuita mukarakadziso mutemperi raMambo Mwari.”

¹⁵ Naavo vari kuretu vanozouya nokudetsera kuaka temperi raMambo Mwari, nemwi munozozia kuti Mambo Mwari wehondo wandituma kwomuri. Izvi zvinozoitika, kudai mwechigwinyisira kupurutana izwi raMambo Mwari wenyu.