Zek. 5 - Bhaibheri Rakachena muChindau

Chioniso cheBhuku Rakapetwa Raimbururuka

¹ Ndakaringirazve mudenga, ndikaona bhuku rakapetwa rechimbururuka.

² Nayo yakati kwendiri, “Unoonenyi?” Ndakapingura, “Ndinoona bhuku rakapetwa rechimbururuka; kureba kwaro mamitha mapfumbamwe, nemamitha marongomuna nehafu kupamhama.”

³ Zvino yakati kwendiri, “Ichi chituko chinobuda padera pehope yenyika yeshe; weshe unoba unozourawa ngouno, kudai ngezvakanyorwa kurutii kwaro; neweshe unopika mhiko dzokunyepa unozourawa, kudai ngezvakanyorwa kurutii rumweni.

⁴ Ndinozoribudisa kubanze, unoronza Mambo Mwari wehondo, naro rinozopotera mumhatso mwembavha, nomumhatso mwouwo unopika ngokunyepa ngezina rangu; naro rinozosara mukati mwemhatso iyo, nokuipedza nebasha rayo nemapuwe ayo.”

Chioniso choMukadzi Uri muChitundu

⁵ Zvino ngirosi yakaereketa neni yakabuda pamberi, ikati kwendiri, “Ringira mudenga, uone kuti chiinyi ichi chinobuda.”

⁶ Ndakati, “Chiinyi?” Nayo yakati, “Ichi chitundu chinobuda.” Yakatizve, “Ichi chishaishi chavo munyika yeshe.”

⁷ Ringira, chidumaidzo chomuthovhi chakamirudzwa, napo paiya nomukadzi akagara mukati mwechitundu.

⁸ Nayo yakati, “Ichi kushata.” Ndizvo yakamukandira sure muchitundu nokutsikirira uremu hwechidumaidzo chomuthovhi pomuromo wacho.

⁹ Zvino ndakaringira mudenga, ndikaona, ringira, ndakaona vakadzi vairi vechiuya pamberi. Dutu raiya mumaphaphiro avo. Vaiya nemaphaphiro akadai ngemaphaphiro ousore, navo vakamirudza chitundu pakati penyika nedenga.

¹⁰ Zvino ndakati kungirosi iyo yakaereketa neni, “Vanotora kuenda nacho kuri chitunducho?”

¹¹ Yakati kwendiri, “Kunyika yeShina, koochiakira mhatso munyika mweShina; naapo yanasirirwa, vanozogadzika chitundu ngemagaro acho.”