Zek. 4 - Bhaibheri Rakachena muChindau

Chioniso cheChigadzikiro cheChibani

¹ Ngirosi iyo yakaereketa neni yakauyazve, yakandimusa kudai ngomunhu unomuswa muhope dzake.

² Yakati kwendiri, “Unoonenyi?” Neni ndakati, “Ndinoona chigadzikiro chechibani cheshe chomukore, nendiro huru padera pacho; zviripo zvibani zvinomwe padera pacho, nemiromo minomwe pazvibani zvinomwe, padera pacho.

³ Pasinde pacho pane miti miiri yemiorivhi, umwe ngokumudyo kwendiro huru, noumweni ngokumuoshwe kwayo.”

⁴ Ndakati kungirosi iyo yakaereketa neni, “Izvi zviinyi, mambo wangu?”

⁵ Zvino ngirosi iyo yakaereketa neni yakandipingura, ikati kwendiri, “Auzii kuti izvi zviinyi here?” Ndakati, “Haiwa, mambo wangu.”

Chigondiso chaMwari kunaZerubhabheri

⁶ Yakati kwendiri, “Iri ndiro izwi raMambo Mwari kunaZerubhabheri, rinoti, ‘Haiwa ngesimba, nokuti ngehondo, asi ngoMweya wangu,’ unoronza Mambo Mwari wehondo.

⁷ Urianani, O mutunhu mukuru? Pamberi paZerubhabheri unozodai ngorubaya; naye unozounza buwe repadera, anokudaidzira kuti, ‘Nyasha, nyasha kweriri!’ ”

⁸ Zve, izwi raMambo Mwari rakauya kwendiri rechiti,

⁹ “Nyara dzaZerubhabheri dzakaisa tsikiro remhatso iyi; nyara dzake dzinozoipedza. Zvino unozozia kuti Mambo Mwari wehondo wandituma kwouri.

¹⁰ Ngokuti ndiani washoora zuva rezviro zvidoodoko? Vanozodakara kuona tambo inebuwe yokupimisa munyara yaZerubhabheri. Aya manomwe madziso aMambo Mwari, anorumba apa naapo munyika yeshe.”

¹¹ Zvino ndakati kweiri, “Ngeyenyi iyi miti miiri yemiorivhi iri ngokumudyo kwechigadzikiro chechibani, nokumuoshwe kwacho?”

¹² Nenguva yechipiri ndakati kweiri, “Ngedzenyi nhai mbiri dzomuorivhi dzinobudisa mafuta omukore ngomupopi mbiri dzomukore?”

¹³ Yakati kwendiri, “Auzii kuti izvi zviinyi here?” Ndakati, “Haiwa, mambo wangu.”

¹⁴ Zvino yakati, “Ava ndivo vairi vakadzodzwa, avo vanoema pasinde paMambo wenyika yeshe.”