Zek. 2 - Bhaibheri Rakachena muChindau

Chioniso cheBote roKupimisa

¹ Ndakaringira neni ndakaona munhu anebote rokupima ndiro munyara mwake.

² Zvino ndakabvunza, “Unoenda kuri?” Naye wakati kwendiri, “Koopima Jerusarema, kuona kupamhama kwaro nourebu hwaro.”

³ Ringira, ngirosi iyo yakaereketa neni yakabuda pamberi, nengirosi imweni yakauya pamberi kooshongana nayo.

⁴ Yakati kweiri, “Rumba, ereketa kujaha iri wechiti, ‘Jerusarema rinozogarwa kudai ngemaguta asina marukumbati ngouwandu hwevanhu nemhuka dzirimwo.’

⁵ Ngokuti inini ndinozoita rukumbati rwomuriro kuritendenedza, unoronza Mambo Mwari, nokuita uthende mukati mwaro.

Vabatwa Vanodaidzwa Kuuya Kanyi

⁶ “Mirukai! Mirukai! Budai, mutize kubva kunyika yedera, unoronza Mambo Mwari; ngokuti ndakamuparadzira kudai ngemadutu marongomuna omudenga, unoronza Mambo Mwari.

⁷ Miruka, utizire Zioni, iwewe unogara nemwanasikana weBhabhuroni.”

⁸ Ngokuti izvi ndizvo zvakaronza Mambo Mwari wehondo: ngesure kwouthende wakandituma kumadzinza akamuchakata: ngokuti iye unomugwama, unogwama mboni yedziso rake.

⁹ Zvino ringira, ndinozozungunyisa nyara yangu kurwa navo, vanozoita vapambi vehloko dzavo. Zvino munozozia kuti Mambo Mwari wehondo wandituma.

¹⁰ “Emba, udakare, O mwanasikana Zioni! Ngokuti, ringira, ndinozouya, ndigare pakati pako,” unoronza Mambo Mwari.

¹¹ Madzinza akawanda anozoshonganiswa munaMambo Mwari ngeiro zuva, navo vanozoita vanhu vangu; ndinozogara pakati pako, newe unozozia kuti Mambo Mwari wehondo wandituma kwouri.

¹² Mambo Mwari unozogara nhaka yaJudha iyo ndiyo chikoaniswa chake munyika yakacheneswa, unozotsanangurazve Jerusarema.

¹³ Nyararai, imwimwi vanhu veshe, pamberi paMambo Mwari; ngokuti wamiruka muugaro hwake hwakachena.