Zek. 13 - Bhaibheri Rakachena muChindau

¹ “Pairo zuva chinyuka chinozobeurirwa mhatso yaDhavhidha nevagari veJerusarema, chokusuka kushaisha nokusikasukika.

² Pazuva iro, unoronza Mambo Mwari wehondo, ndinozobvisa mazina emiedzaniso yokudira munyika, aichazokarakadzwi nakamwe. Ndinozodusa vaprofeti nemweya inetsvina kubva munyika.

³ Nokudai echizobudazve muprofeti, baba ake namai ake avo vakamubereka vanozoti kwaari, ‘Auzoponi akadi; ngokuti unoereketa manyepo ngezina raMambo Mwari.’ Vabereki vake avo vakamubereka vanozomubaya apo ooprofeta.

⁴ Pazuva iro, vaprofeti vanozotsveruka veshe umwe ngaumwe ngechioniso chake, apo vanoprofeta; avazosimiri chokufuka chinemamviri kuitira kuchengedzera,

⁵ asi umwe ngaumwe wavo unozoti, ‘Andiri muprofetipi, ndiri murimi wemavhu; ngokuti nyika ndiyo yaiya nhaka yangu kubvira muutsva hwangu.’

⁶ Kudai umwe echivabvunza kuti, ‘Ngeenyi maronda aya ari munyara dzako?’ Naapo unozopingura kuti, ‘Aya maronda endakaremadzwa mumhatso yehama dzangu.’ ”

Mupango woKuuraya Muushi waMwari

⁷ “Muka, O shoti, urwe nomuushi wangu, urwe nomunhu uri hama yangu, unoronza Mambo Mwari wehondo. Baya muushi, kuti makwai apararire kweshe; ndinozopetudza nyara yangu padera pevadoko.

⁸ Munyika mweshe, unoronza Mambo Mwari, marupande mairi ematatu anozogurwa nokufa; asi rupande rumwe rwechitatu runozosaramwo rwechipona.

⁹ Neni ndinozoisa urwu rupande rwechitatu mumuriro, ndinozoaererisa kudai ngounoeresa sirivha, nokuvaedza kudai ngounoedzwa kunoitwa mukore. Vanozodaidza ngezina rangu, neni ndinozovapingura. Ndinozoti, ‘Vanhu vangu;’ navo vanozoti, ‘Mambo Mwari ndiye Mwari wedu.’ ”