Zek. 11 - Bhaibheri Rakachena muChindau

Kuwa kwoUtongi hwoMubvuki

¹ Beura misiwo yako, O Rebhanoni, kuti muriro upedze misidhari yako.

² Boorera, O musaiprusi, ngokuti musidhari wawa, ngokuti miti yakagwinya yaitwa shango. Boorerai, miokhi yeBhashani, ngokuti gwasha rakagwinya rarigirwa pashi.

³ Purutanai izwi rokuboorera kwavaushi! Ngokuti uthende hwavo hwapambwa. Purutanai kubhonga kwemhondoro itsva! Ngokuti makanyi omuJorodhani aparadzwa.

Vaushi Vairi

⁴ Izvi ndizvo zvinoronza Mambo Mwari, Mwari wangu: “Ita muushi wemakwai akaemeserwa kuurawa.

⁵ Avo vanoatenga vanoauraya, vechienda vasina kuororwa; naavo vanoatengesa vanoti, ‘Unomuchena Mambo Mwari, ngokuti ndaita mupfumi;’ nevaushi vawo vemene avarwadziwi mwoyo ndiwo.

⁶ “Ngokuti andichazorwadziwi mwoyo ndivo avo vanogara munyika iyi, unoronza Mambo Mwari. Ringira, ndinozovaita veshe uwo nouwo kuti awire munyara yomuakirwana wake, uwo nouwo awire munyara yamambo wake; naavo vanozoparadza nyika, andizovanunuri naumwe kubva kunyara yavo.”

⁷ Ndizvo, ndakaemera vatengesi nevatengi vemakwai, ndakaita muushi wemakwai akaemeserwa kuurawa. Ndakatora ndonga mbiri; imwe ndakaidudza kuti, “Unaku,” neimweni ndakaidudza kuti, “Zvisungo;” neni ndakausha makwai.

⁸ Ndakauraya vaushi vatatu ngomwedzi umwe; ngokuti mweya wangu wakaremba ndivo, navo vakandinyenya.

⁹ Ndizvo ndakati, “Andichaiti muushi wenyu. Iyo inofa ngaife; neiyo inourawa ngaiurawe; neidzo dzakasara ngadzidye nyama yeimweni.”

¹⁰ Ndakatora ndonga yangu inozwi “Unaku,” ndikaigura, kuti ndigure chitenderano changu chendakaita nevanhu veshe.

¹¹ Ndizvo chakagurwa ngeiro zuva; vatengesi nevatengi vemakwai vaindiringira vakazia raiya izwi raMambo Mwari.

¹² Ndakati zvino kwevari, “Kudai mwechipinimidza kuti zvakanaka kwemuri, ndipei musharo wangu; asi kuti zvisikazi kunaka, ungwarirenyi.” Ndizvo vakapima zvigurwa makumi matatu zvesirivha kuita musharo wangu.

¹³ Zvino Mambo Mwari wakati kwendiri, “Zvikandire kumuumbi,” uwo mutengo mukuru, mutengo wendakaemeserwa ndivo! Ndizvo ndakatora izvo zvigurwa makumi matatu zvesirivha, ndikazvikandira kumuumbi, mumhatso yaMambo Mwari.

¹⁴ Zvino ndakagura ndonga yangu imweni yechipiri, inozwi “Zvisungo,” kuti ndigure ukama pakati paJudha naIsuraeri.

¹⁵ Zvino Mambo Mwari wakati kwendiri, “Torazve ndonga dzomuushi uri benzi.

¹⁶ Ngokuti, ringira, zvino ndinomirudza muushi munyika, uwo usikahambiri idzo dzinopera, nokuti kutsvaka vana vemakwai, nokuti kurapa idzo dzakaguka, nokuti kugutsa dzinopona, asi kudya nyama yedzakakora, nokugura masondo adzo kuita zvigurwa.

¹⁷ O muushi wangu usina shwiro, uwo unotiza makwai! Shoti ngaibaye pamuoko wake, nepadziso rake rokumudyo! Muoko wake ngauonyane yaamho, nedziso rake rokumudyo ripofomadzwe yaamho!”