Zek. 10 - Bhaibheri Rakachena muChindau

Mambo Mwari Unogondisa Kusunhurwa

¹ Kumbirai mvura kubva kunaMambo Mwari ngomukuwo wemvura yokuteera, kunaMambo Mwari uwo unoita makore anotinhira, uwo unopa mvura yokupfunha kwevari, unomupa mwenje murubaya kumunhu weshe.

² Ngokuti miedzaniso yokudira inoereketa zvisina shwiro, neman'anga anoona manyepo, varoti vanoronza hope dzokunyepa, vechipa kuembedzera kusina shwiro. Ndizvo vanhu vanonzerereka kudai ngemakwai, vanotambudzika ngokutama muushi.

³ “Ushungu hwangu hunobaka kuvaushi, neni ndinozoorora makotokoto; ngokuti Mambo Mwari wehondo unongwarira makwai ake, mhatso yaJudha, naye unozovaita kuti vadai ngehachi rake rinodadisa muhondo.

⁴ Kubva mwevari munozobuda buwe repakhona, kubva mwevari munozobuda hoko yetende, kubva mwevari kunozobuda uta hwehondo, kubva mwevari mutungamiriri wehondo weshe.

⁵ Pamwepo vanozodai ngengwazi muhondo, dzinotsikatsika pashi magaa adzo mumatope emapato vanozorwa, ngokuti Mambo Mwari unavo, navo vanozotsverudza vagadhi vemahachi.

⁶ Neni ndinozogwinyisa mhatso yaJudha, ndinozoponesa mhatso yaJosefa. Ndinozovapetudza, ngokuti ndinenyasha kwevari, navo vanozoita kudai ngevendisikazi kuramba; ngokuti ndiri Mambo Mwari, Mwari wavo, neni ndinozovapingura.

⁷ Zvino vanhu vaEfuremu vanozoita kudai ngengwazi, nomwoyo yavo inozodakara kudai ngevamwa vhini. Vana vavo vanozozviona nokudakara; mwoyo yavo inozodakara munaMambo Mwari.

⁸ Ndinozoridza murudzi kwevari, ndivaunganidze; ngokuti ndavaripira, navo vanozowanda kudai ngezvevaiya vakaita karetu.

⁹ Kunyazwi ndakavakusha pakati pemadzinza, asi munyika dziri kuretu vanozondikarakadza; vanozorera vana vavo nokupetuka.

¹⁰ Ndinozovaunza kanyi kubva kunyika yeEgipite, nokuvaunganidza kubva Asiria; ndinozovaunza munyika yeGireadhi neRebhanoni, metsa pasisina ugaro kwevari.

¹¹ Unozohamba kupinda ngomuruandhle rwokutambudzika, mafungu oruandhle anozochairwa pashi, ndau dzeshe dzakadzama dzorwizi Naire dzinozopwa. Kudzikudza kweAsiria kunozodzaswa pashi, nendonga youmambo hweEgipite inozobviswa.

¹² Ndinozovagwinyisa munaMambo Mwari, navo vanozohamba muzina rake,” unoronza Mambo Mwari.