Zek. 1 - Bhaibheri Rakachena muChindau

Mambo Mwari Unodaidza Vanhu vake Kupetuka Kwaari

¹ Mumwedzi wechisere, mugore rechipiri rokutonga kwaDhariusi, izwi raMambo Mwari rakaguma kunaZekharia, muprofeti mukororo waBherekhia, mukororo waIdho rechiti,

² “Mambo Mwari wakanyangadzwa yaamho ngemadzibaba enyu.

³ Ndizvo wechiti kwevari, ‘Izvi ndizvo zvinoronza Mambo Mwari wehondo: Petukai kwendiri, unoronza Mambo Mwari wehondo, neni ndinozopetuka kwomuri, unoronza Mambo Mwari wehondo.’

⁴ Musadai ngemadzibaba enyu, avo vevakadaidza kwevari vaprofeti vokutanga vechiti, ‘Unoronza izvi Mambo Mwari wehondo: Petukai zvino kubva kunjira dzenyu dzakashata, nokubva kuzviito zvenyu zvakashata. Asi avazi kuzwa, nokuti kupurutana kwendiri, unoronza Mambo Mwari.

⁵ Madzibaba enyu ari pari? Nevaprofeti, vanopona mhera nariini here?

⁶ Asi mazwi angu nezviemeso zvangu, zvendakapanga varanda vangu vaprofeti, azvizi kubatira kumadzibaba enyu here?’ ” Ndizvo vakatenderuka, vakati, “Mambo Mwari wehondo wakatiitira, kudai ngenjira dzedu nokudai ngezviito zvedu, kudai ngezvaakaronga kuita.”

Chioniso choMuprofeti cheMahachi

⁷ Ngezuva remakumi mairi nemarongomuna romwedzi wegumi naumwe, uwo mwedzi unozwi Shebhati, mugore rechipiri rokutonga kwaDhariusi, izwi raMambo Mwari rakaguma kunaZekharia, muprofeti mukororo waBherekhia, mukororo waIdho, naye wakati

⁸ “Muusiku ndakaona, ringira, munhu echigadha hachi rakatsvuka! Waiya akaema pakati pemiti yemitire mubani; ngesure kwake kwaiyapo mahachi akatsvuka, anemaara, neakachena.”

⁹ Zvino ndakati, “Zviinyi izvi mambo wangu?” Ngirosi, iyo yakaereketa neni, yakati kwendiri, “Ndinozokuonisa kuti izvi zviinyi.”

¹⁰ Ndizvo munhu, uwo waiya akaema pakati pemiti yemitire wakapingura, akati, “Ava ndivo avo vaakatuma Mambo Mwari kuhamba hamba vechiona nyika.”

¹¹ Zvino vakaereketa kungirosi yaMambo Mwari, iyo yakaema pakati pemiti yemitire, vakati, “Tahamba hamba techiona nyika, ringira, nyika yeshe inogara mukunyarara.”

¹² Zvino ngirosi yaMambo Mwari yakapingura yechiti, “O Mambo Mwari wehondo, unozoita mukuwo wakaitawani usikaitira nyasha Jerusarema nemadhorobha aJudha, awo ewakanyangadzirwa aya makore makumi manomwe?”

¹³ Zvino Mambo Mwari wakapingura ngirosi yakaereketa neni ngemazwi akanaka anoembedzera.

¹⁴ Ndizvo ngirosi yakaereketa neni yakati kwendiri, “Daidzira izwi iri, wechiti, ‘Izvi ndizvo zvinoronza Mambo Mwari wehondo: Ndine ndurumwa huru ngendaa yeJerusarema neZioni.

¹⁵ Neni ndinonyangadzwa kakurutu ngemadzinza avo vakagarisika; ngokuti ndakanyangadzwa kadodoko kega, navo vakawanza kutambudzika.

¹⁶ Ndizvo izvi ndizvo zvinoronza Mambo Mwari: Ndapetukazve Jerusarema nenyasha; mhatso yangu inozoakwa mukati mwaro, unoronza Mambo Mwari wehondo, nebote rokupima rinozotambanudzwa muJerusarema.’ ”

¹⁷ Daidzirazve wechiti, “Izvi ndizvo zvinoronza Mambo Mwari wehondo: Madhorobha angu achazarazve ngoupfumi nokukura kuende mberi; Mambo Mwari uchazoembedzerazve Zioni, nokutsanangurazve Jerusarema.”

Chioniso cheNyanga

¹⁸ Naapo ndakamirudza madziso angu, ndikaona, ringira, nyanga murongomuna.

¹⁹ Ndakabvunza ngirosi yakaereketa neni, “Izvi zviinyi?” Yakandipingura yechiti, “Idzi ndidzo nyanga dzakaparadza Judha, Isuraeri, neJerusarema.”

²⁰ Zvino Mambo Mwari wakandionisa vapfuri varongomuna.

²¹ Neni ndakabvunza, “Ava vanouya kuitenyi?” Yakapingura yechiti, “Idzi ndidzo nyanga dzakaparadza Judha, ndizvo akuna soro raizokona kumirudzwa; asi ava vauya kudzityisidzira, kukhuwira pashi nyanga dzemadzinza, awo akamirudza nyanga dzawo padera penyika yaJudha kuparadza vanhu vayo.”