Vato. 9 - Bhaibheri Rakachena muChindau

Abhimerekhi

¹ Zvino Abhimerekhi mukororo waJerubhaari wakaenda Shekhemu kunehama dzamai vake, naye wakapangana navo, navo veshe vemhuri vemhatso yamai ake echiti,

² “Ereketai, ndinomupota, kunzee dzevanhu veshe vari muShekhemu, kuti ngechiri chakapinda kunaka kwomuri, kuti vakororo veshe vaJerubhaari vari makumi manomwe evanhu vatonge padera penyu, nokuti munhu umwe atonge padera penyu? Cherechedzaizve kuti inini ndiri godo renyu nenyama yenyu.”

³ Ndizvo hama dzamai ake dzakaereketa ndiye eshe aya mazwi mukuzwa kwenzee dzevanhu veshe veShekhemu; nomwoyo yavo yakaane chidisiso chokuteera Abhimerekhi, ngokuti vakati, “Ihama yedu.”

⁴ Navo vakamupa zvigurwa zvesirivha makumi manomwe kubva kumhatso yaBhaaribherithi, ndiyo Abhimerekhi wakabhadhara vanhu vakashata asina shwiro, avo vakamuteera.

⁵ Wakaenda kumhatso yababa ake muOfira, wakauraya vakoma vake vakororo vaJerubhaari, vaiya makumi manomwe evanhu, padera pebuwe rimwe; asi Jothamu chigumisirwa chaJerubhaari wakapona, ngokuti wakadzifisha.

⁶ Zvino vamuna veshe veShekhemu vakadziunganidza pamwepo, naveshe veBhethimiro, vakaenda, vakaita Abhimerekhi mambo, ngepasinde pesika yomuokhi yaiya muShekhemu.

⁷ Naapo vazvironza kunaJothamu, wakaenda akaema padera pomutunhu weGerizimu, wakaboorera ngeizwi rake, akadaidzira, akati kwavari, “Ndipurutanenyi, imwimwi vamuna veShekhemu, kuti Mwari apurutane kwomuri.

⁸ Miti yakabuda ngomukuwo kuenda koodzodza mambo kuti atonge padera payo; nayo yakati kunomuorivhi, ‘Tonga iwewe padera pedu.’

⁹ Asi muti womuorivhi wakati kweiri, ‘Ndingarekera here kubudisa mafuta angu akanaka awo kubudikidza ndiwo zvimwari nevanhu vanokudzwa ndizvo, kuti ndiende ndipepereke padera pemiti yeshe?’

¹⁰ Zvino miti yakati kunomuonde, ‘Uya iwewe, utonge padera pedu.’

¹¹ Asi muti womuonde wakati kweiri, ‘Ndingazorekera here kubudisa kutapira kwangu, nemichero yangu yakanaka, kuti ndiende ndipepereke padera pemiti yeshe?’

¹² Zvino miti yakati kunomuvhini, ‘Uya iwewe, utonge padera pedu.’

¹³ Asi muvhini wakati kweiri, ‘Ndingazorekera kubudisa vhini rangu here rinodakadzisa ndiro zvimwari nevanhu, kuti ndiende ndipepereke padera pemiti yeshe?’

¹⁴ Ndizvo miti yeshe yakati kunerukato, ‘Uya iwewe, utonge padera pedu.’

¹⁵ Norukato rwakati kweiri, ‘Kudai ngegwinyiso mwechizondidzodza kuita mambo padera penyu, ndizvo uyai muhware kumumvuri wangu; asi kudai musikaiti kudaro, muriro ngaubude kubva kurukato, upedze kupisha misedare yeRebhanoni.’

¹⁶ “Ndizvo kudai mwakaita zvakarurama nokuremeredzeka, apo mwakagadza Abhimerekhi kuita mambo, nokudai mwakaita zvakanaka kunaJerubhaari nevemhatso yake, nemwi mwakaita kwaari kudai ngezvinosisira zviito zvake

¹⁷ (ngokuti baba angu vakamurwira, akadzipinza mungozi kakurutu, akamusunhura kubva munyara dzevaMidhiani,

¹⁸ asi mwamukira mhatso yababa angu ngeiri zuva, mwauraya vakororo vake, makumi manomwe evanhu, padera pebuwe rimwe, mukaita Abhimerekhi mukororo wehloko yake yomukadzi mambo padera pevamuna veShekhemu, ngokuti iye uri hama yenyu),

¹⁹ dai ndechiti mwakaita zvakarurama nokuremeredza kunaJerubhaari, nevemhatso yake ngeiri zuva, naapo dakarai henyu kunaAbhimerekhi, nayezve ngaadakare kwomuri.

²⁰ Asi kudai zvisikazi kudaro, muriro ngaubude kubva kunaAbhimerekhi nokupedza vamuna veShekhemu, neBhethimiro, muriro ngaubude kubva kuvamuna veShekhemu neBhethimiro upedze Abhimerekhi.”

²¹ Zvino Jothamu wakatiza kuenda, wakatizira Bheeri, akagareyo ngendaa yokutya Abhimerekhi mukoma wake.

²² Abhimerekhi wakatonga makore matatu padera peIsuraeri.

²³ Asi Mwari wakatuma mweya wakashata pakati paAbhimerekhi nevamuna veShekhemu; nevamuna veShekhemu vakashanda ngokuchengedza kunaAbhimerekhi.

²⁴ Izvi zvakaitika kuti runya rwaakaita kunevakororo makumi manomwe vaJerubhaari ruunzidzirwe, nengazi yavo iitire ndaa kunaAbhimerekhi hama yavo, uwo wakavauraya, nepadera pevamuna veShekhemu avo vakamudetsera kuuraya vakoma vake.

²⁵ Ndizvo ngendaa yokuzondana pakati pavo vamuna veShekhemu vakamusira vahwariri padera pemitunhu. Vakabvukira veshe avo vaipinda ngenjira iyo; kwakashumirwa kunaAbhimerekhi.

²⁶ NaGaari mukororo waEbhedhi wakauya nehama dzake, vakaenda Shekhemu; nevamuna veShekhemu vakamugonda.

²⁷ Vakabuda kuenda muminda, vakakaya mavhini avo, vakakanya vhini ravo ngetsoka, vakadakara. Zvino vakapotera mumhatso yechimwari chavo, vakadya nokumwa, vakatuka Abhimerekhi.

²⁸ Gaari mukororo waEbhedhi wakati, “Abhimerekhi ndiani, isusu tiri anani kunaShekhemu, kuti isusu timushandire? Andiye here mukororo waJerubhaari naZebhuri andiye here nduna yake? Shandirai vamuna veHamori baba aShekhemu. Ngenyi zvino techisisira kumushandira?

²⁹ Kudai kwega ava vanhu vaiya munyara dzangu! Naapo ndaizobvisa Abhimerekhi, neni ndaizoti kwaari, ‘Wandisa varwi vako, ubude.’ ”

³⁰ Naapo Zebhuri nduna yedhorobha azwa mazwi aGaari mukororo waEbhedhi, ushungu hwake hwakabaka.

³¹ Naye wakatuma nhumwa kunaAbhimerekhi ngokuhwara echiti, “Ringirai, Gaari mukororo waEbhedhi nehama dzake vakauya Shekhemu; vanovherudza mweya mudhorobha wokukumukira.

³² Ndizvo zvino miruka usiku, iwewe nevanhu vako vanewe, muvahwarire mushango.

³³ Zvino mambakwedza mangwanani, apo zuva roobuda, unozofumira kumiruka, kuenda mudhorobha; naapo iye nevanhu vaanavo vanobuda koorwisana newe, unozoita kwavari kudai ngezvounokona.”

³⁴ Ndizvo Abhimerekhi nevanhu veshe vaiya naye vakamiruka usiku, vakahwarira Shekhemu vari zvikwata zvirongomuna.

³⁵ Naapo Gaari mukororo waEbhedhi abuda wakaema ngepamusiwo pedhorobha; Abhimerekhi wakamiruka nevanhu vaiya naye, kubva pevaihwarira.

³⁶ Naapo Gaari aona vanhu, wakati kunaZebhuri, “Ringira, vanhu vanodzaka kubva padera pemitunhu!” NaZebhuri wakati kwavari, “Iwewe unoona mabvute emitunhu akadai ngevanhu.”

³⁷ Gaari wakaereketazve echiti, “Wona kunodzaka vanhu ngenjira yepakati penyika, nechikwata chimweni chinodzaka ngenjira yomuokhi rweMeonenimu.”

³⁸ Naapo Zebhuri wakati kwaari, “Uri pari zvino muromo wako, wowakaereketa ndiwo wechiti, ‘Ndiani Abhimerekhi, kuti isusu timushandire?’ Ava andivo here vanhu vewakashoora? Buda zvino, urwisane navo.”

³⁹ Ndizvo Gaari wakabuda kuenda pamberi pevamuna veShekhemu, wakarwa naAbhimerekhi.

⁴⁰ NaAbhimerekhi wakamurumbirira, naye wakatiza kubva pamberi pake, nevazhinji vakaurawa nokuremadzwa metsa kuguma pakupotera pamusiwo.

⁴¹ Ndizvo Abhimerekhi wakagara muAruma; naZebhuri wakarumbirira Gaari nehama dzake, kuti vasazogara muShekhemu.

⁴² Ngechimangwani vanhu vakadarika kuenda mushango; vakashumira Abhimerekhi.

⁴³ Wakatora varwi vake, akavaparadzanisa kuita zvikwata zvitatu, wakavahwarira mushango. Wakaringira, akaona vanhu vechibuda kubva mudhorobha; naye wakamiruka kurwa navo, wakavauraya.

⁴⁴ Abhimerekhi nechikwata chaiya naye, vakarumba kuenda mberi, vakaema ngepokupotera pamusiwo wedhorobha; nezvikwata zviiri zvakamiruka zvakaenda kwavari vaiya mushango, zvakavauraya.

⁴⁵ NaAbhimerekhi wakarwisana nedhorobha ngezuva iro reshe; wakanyisa dhorobha, wakauraya vanhu vaiya umwo, akaputsira pashi dhorobha iro, akarikusha ngomunyu.

⁴⁶ Naapo vamuna veshe veThawa reShekhemu vazwa izvi, vakapotera muukona hwemhatso yechimwari Bherithi.

⁴⁷ Abhimerekhi wakaronzerwa kuti veshe vamuna veshe veThawa reShekhemu vakaungana pamwepo.

⁴⁸ Zvino Abhimerekhi wakakwira kuenda kuMutunhu weZarimoni, nevanhu veshe vaiya naye. Abhimerekhi wakatora sanho munyara dzake, wakatema dai kubva mumuti, wakaritora, akaridzvara papfudzi rake. Akati kunevarwi vaiya naye, “Icho chomunoona ndechiita inini, kasirai kuchiita.”

⁴⁹ Ndizvo vamuna veshe vehondo vakatema umwe ngaumwe dai rake, vakateera Abhimerekhi, vakaaisa pathawa, vakapisha thawa ngomuriro padera pavo; ngokudaro vanhu veshe veThawa reShekhemu vakafawo, vaida kukwana gumi remazana (1,000) revamuna nevakadzi.

⁵⁰ Zvino Abhimerekhi wakaenda Thebhezi, wakakomba Thebhezi, wakarinyisa.

⁵¹ Asi raiyapo thawa rwakagwinya pakati pedhorobha, nevamuna veshe, nevakadzi, nevanhu veshe vedhorobha vakatiziremwo, vakarikonya, vakakwira ngepadera pethawa.

⁵² NaAbhimerekhi wakauya kuthawa akarwa naro, wakakwedzera pamusiwo wethawa kuti aripishe ngomuriro.

⁵³ Asi mudzimai umweni wakakandira tsiyo yokukuya padera pesoro raAbhimerekhi, nayo yakaputsa dehenya resoro rake.

⁵⁴ Naapo wakakasira kudaidza jaha raitwara zvokurwa zvake, akati kwaari, “Shwamura shoti yako, undipedzise, kuti vanhu vasazoti, ‘Wakaurawa ngomunhu wedzimai.’ ” Nejaha rake rakamubaya rikamupotya, naye wakafa.

⁵⁵ Naapo vamuna vaIsuraeri vaona kuti Abhimerekhi waiya afa, vakaenda munhu weshe kundau yake.

⁵⁶ Ngokudaro Mwari wakaunzidzira kushata kwaAbhimerekhi, kwaakaita kunababa ake, ngokuuraya vakoma vake vaiya makumi manomwe.

⁵⁷ Nokushata kweshe kwevanhu veShekhemu Mwari wakakuunza padera pemasoro avo; nepadera pavo kwakaguma kutuka kwaJothamu mukororo waJerubhaari.