Vato. 8 - Bhaibheri Rakachena muChindau

Kunyiswa kwoKupedzisira kweVaMidhiani

¹ Zvino vamuna vokwaEfuremu vakati kwaari, “Chiinyi ichi chewakaita kwetiri, kuti auzi kutidaidza apo pewakaenda koorwa nevaMidhiani?” Navo vakamuganyira kakurutu.

² Ndizvo wakati kwevari, “Chiinyi chendakaita inini chinoedzaniswa neimwimwi? Kuunganidzwa kwemavhini aEfuremu akuzikupinda kunaka here kunekuvhuna kwaAbhieza?

³ Mwari wakapira munyara dzenyu nduna dzevaMidhiani, Orebhi naZeebhi; chiinyi chendaikona kuita chingaedzaniswa nemwi?” Naapo ushungu hwavo hwakapora kwaari, apo akaereketa kudaro.

⁴ Zvino Gidheoni wakaguma Jorodhani, akaambuka, nevamuna mazana matatu (300) vaiya naye, varemba, kunyazwi vaiya vachandovarumbirira.

⁵ Ndizvo wakati kunevanhu veSukothi, “Ipai zvingwa, ndapota, kunevanhu vanonditeera; ngokuti vafukama, neni ndinorumbirira Zebha naZarimuna, madzimambo eMidhiani.”

⁶ Asi vatungamiriri veSukothi vakati, “Nyara dzaZebha nedzaZarimuna dzaa munyara mwako here, kuti isusu tipe zvingwa kunevarwi vako?”

⁷ Gidheoni wakati, “Ndizvo apo Mambo Mwari paanozopa Zebha naZarimuna munyara dzangu, naapo ndinozokwenga miiri yenyu ngeminzwa yomushango nerukato.”

⁸ Naye wakakwira kubvapo kuenda Phenueri, akaita chikumbiro chimwecho kwevari; nevanhu vePhenueri vakamupingura ndizvo ndizvo kudai ngevamuna veSukhothi.

⁹ Ndizvo wakaereketa kunevanhu vePhenueri echiti, “Apo ndouyazve mukunyarara, ndinozoputsira pashi urwu rusvingo.”

¹⁰ Zvino Zebha naZarimuna vaiya muKarikori, nevarwi vavo navo, vaida kukwana gumi namashanu emakumi emazana (15,000), avo vega vakasara vevarwi veshe vevanhu vokumabvazuva; ngokuti vakaurawa vamuna zana nemakumi mairi emakumi emazana (120,000) eavo vakapakatira shoti.

¹¹ Ndizvo Gidheoni wakakwira ngenjira yaavo vanogara mumatende ngokumabvazuva kweNobha naJogibheha, wakarwisa varwi; ngokuti varwi vakapinimidza kuti vakangwaririka.

¹² Naapo Zebha naZarimuna vatiza; wakavarumbirira, wakabata ao madzimambo mairi evaMidhiani, Zebha naZarimuna, wakakarudza varwi veshe.

¹³ Naapo Gidheoni mukororo waJoashi apetuka kubva koorwa ngenjira yepaMutunhu Heresi,

¹⁴ wakabata jaha rimwe revanhu veSukothi, wakaribvunza naro rakamupa mazita evatungamiriri nevakuru veSukothi makumi manomwe navanomwe.

¹⁵ Zvino wakauya kunevanhu veSukothi, akati, “Ringirai Zebha naZarimuna, avo vemwakandidadira ndivo, mwechiti, ‘Nyara dzaZebha nedzaZarimuna dzaa munyara mwako here, kuti isusu tipire chingwa vanhu vako vademera?’ ”

¹⁶ Ndizvo wakabata vakuru vedhorobha, akatora minzwa yomushango norukato, ngeizvo wakadzidzisa vanhu veSukothi.

¹⁷ Wakaputsira pashi rusvingo rwePhenueri, akauraya vamuna vedhorobha iro.

¹⁸ Zvino wakati kunaZebha nokunaZarimuna, “Vaiya vanhu vakaitawani vemwakauraya Thabhori?” Navo vakamupingura vakati, “Kudai ngezvouriazvo iwewe, navo vaiya vakadaro; umwe ngaumwe wavo waitodzana nevakororo vamambo.”

¹⁹ Naye wakati, “Vaiya vakoma vangu, vakororo vamai vangu; kudai ngezvaanopona Mambo Mwari, dai mwaiya mwakavaponesa, inini ndisaizomuuraya.”

²⁰ Ndizvo wakati kunaJetha, dangwe rake, “Miruka uvauraye.” Asi murumbwana aazi kushwamura shoti yake; ngokuti waitya, ngokuti waiya achiri murumbwana mudoko.

²¹ Naapo Zebha naZarimuna vakati, “Miruka iwewe, utiuraye: ngokuti kudai ngokukura kwomwamuna, rakadaro simba rake.” Ndizvo Gidheoni wakamiruka wakauraya Zebha naZarimuna, akatora zvinemeso zvaiya mumitsipa yemakamera avo.

²² Zvino vamuna vaIsuraeri vakati kunaGidheoni, “Tonga iwewe padera pedu, iwewe nomukororo wakozve nomukororo womukororo wako; ngokuti iwewe wakatiponesa kubva kunyara dzevaMidhiani.”

²³ Gidheoni wakati kwevari, “Andizotongi padera penyu inini, nomukororo wangu aazotongi padera penyu. Mambo Mwari unozotonga padera penyu.”

²⁴ Zvino Gidheoni wakati kwavari, “Ndinoda kukumbira chiro kubva kwomuri, kuti mundipe munhu weshe ndandazi dzezvakachakatwa zvake.” (Ngokuti magaa aiya nendandazi dzomukore, ngokuti vaiya vaIshumaeri.)

²⁵ Navo vakapingura kwaari, “Tinozodzipa kwouri ngokuda.” Ndizvo vakachinga jira, vakakandira apo munhu umwe ngaumwe ndandazi yezvakachakatwa zvake.

²⁶ Nouremu hwendandazi dzomukore dzaakakumbira kwavari hwaida kuita makhirogramu makumi mairi (ngepabanze pezvinemeso, nemativera nemachira anemiara yakatsvuka akasimirwa ngemadzimambo eMidhiani, ngepabanze pemaketani aiya mumitsipa yemakamera.)

²⁷ Gidheoni wakanasira efodhi ndizvo, wakariisa mudhorobha rake, muOfira; nevaIsuraeri veshe vakaendeyo vechiita zvoumhombo ngokuriteera; nacho chakaita murau kunaGidheoni nemhatso yake.

²⁸ Ndizvo vaMidhiani vakanyiswa pamberi pevaIsuraeri, avazi kuchamirudzazve masoro avo. Nenyika yaiya nokunyarara makore makumi marongomuna ngemazuva aGidheoni.

Rufu rwaGidheoni

²⁹ Jerubhaari mukororo waJoashi wakaenda, akagara mumhatso yake.

³⁰ Zvino Gidheoni waiya nevakororo makumi manomwe avo vakabarwa ndiye, ngokuti waiya nevakadzi vakawanda.

³¹ Nebunha rake raiya muShekhemu rakamubarirawo mukororo, wakadudza zina rake kuti Abhimerekhi.

³² Zvino Gidheoni mukororo waJoashi wakafa, aamusharuka, wakaikwa muiba rababa ake Joashi, muOfira revaAbhieza.

³³ Ngesure kwokufa kwaGidheoni, vaIsuraeri vakakunukukazve, vakaita umhombo kuteera vanaBhaari, vakaita Bhaaribherithi chimwari chavo.

³⁴ VaIsuraeri avazi kuchakarakadza Mambo Mwari, Mwari wavo, uwo wakavanunurira kubva munyara dzemagaa avo kumarutii eshe;

³⁵ avo avazi kupangidza kugondeka kumhatso yaJerubhaari, (ngokududzwa ndiye Gidheoni,) kudai ngokunaka kweshe kwaakaitira kunaIsuraeri.